އެމެރިކާގެ ބޮސްޓަންގައި ހުންނަ ޖިލެޓް ސްޓޭޑިއަމްގައި ކުޅުނު ގްރޫޕް ސީގެ ފުރަތަމަ މެޗުގައި ސްކޮޓްލޭންޑުން ހައިޓީގެ މައްޗަށް 1-0 އިން ކުރިހޯދައި، ކާމިޔާބު ފެށުމަކާއެކު މުބާރާތް ފަށައިފިއެވެ. މިއީ 1998 ވަނަ އަހަރުގެ ފަހުން ވޯލްޑްކަޕްގައި ސްކޮޓްލޭންޑުން ކުޅުނު ފުރަތަމަ މެޗެވެ.
މި މެޗުގައި ސްކޮޓްލޭންޑަށް ލީޑު ނަގައިދިނީ މެޗުގެ 30 ވަނަ މިނެޓުގައި އެސްޓަން ވިލާގެ ކެޕްޓަން ޖޯން މެކްގިންއެވެ. މެކްގިން ފޮނުވާލި ހަމަލާ ގޯލަށް ވަނީ އިދިކޮޅު ކުޅުންތެރިއެއްގެ ފައިގައި ޖެހި މިސްރާބު ބަދަލުވެގެންނެވެ. 64,000 ސަޕޯޓަރުންނާއެކު ފުރިފައި އޮތް މި ސްޓޭޑިއަމްގެ ބޮޑުބަޔަކީ ސްކޮޓްލޭންޑަށް ސަޕޯޓްކުރުމަށް އެމެރިކާއަށް ދަތުރުކުރި އެ ގައުމުގެ ސަޕޯޓަރުންނެވެ.
މިއީ 1990 ވަނަ އަހަރު އިޓަލީގައި އޮތް ވޯލްޑްކަޕްގައި ސްވިޑަން އަތުން 2-1 އިން މޮޅުވި ފަހުން، ސްކޮޓްލޭންޑުން ވޯލްޑްކަޕްގައި ހޯދި ފުރަތަމަ މޮޅެވެ. އަދި މިއީ 1996 ވަނަ އަހަރުގެ ޔޫރޯ މުބާރާތުގެ ފަހުން ބޮޑު މުބާރާތެއްގައި އެ ގައުމުން ހޯދި ފުރަތަމަ ކާމިޔާބީވެސް މެއެވެ.
ސްޓީވް ކްލާކްގެ އިރުޝާދުގެ ދަށުން ކުޅޭ ސްކޮޓްލޭންޑް ޓީމުގެ އަމާޒަކީ މުބާރާތުގެ ނޮކްއައުޓް މަރުހަލާއަށް ދަތުރުކޮށް ތާރީޚު ބަދަލުކޮށްލުމެވެ. މީގެ ކުރިން ބައިވެރިވި އެއްވެސް ވޯލްޑްކަޕެއްގައި އެ ގައުމަށް ގްރޫޕް ސްޓޭޖް ފަހަނައަޅައި ދެވިފައެއް ނުވެއެވެ. މި މޮޅާއެކު ސްކޮޓްލޭންޑް މިވަގުތު އޮތީ ގްރޫޕް ސީގެ އެއްވަނައިގައެވެ.
ދުނިޔޭގެ ރޭންކިންގެ 84 ވަނައިގައި އޮތް ހައިޓީން މެޗުގެ ފަހުކޮޅު ނަތީޖާ ހަމަހަމަކުރުމަށް ގިނަ މަސައްކަތްތަކެއް ކުރި ނަމަވެސް، ސްކޮޓްލޭންޑުން ވަނީ ދިފާއީ ގޮތުން ވަރުގަދަ ކުޅުމެއް ދައްކައި މެޗު ކާމިޔާބުކޮށްފައެވެ. ހައިޓީން މި މުބާރާތަށް ކޮލިފައިވުމަކީ ފާހަގަކޮށްލެވޭ ކާމިޔާބީއެކެވެ. އެއީ އެ ގައުމުގެ ދާޚިލީ ހަމަނުޖެހުންތަކުގެ ސަބަބުން ކޮލިފައިން މެޗުތައް އަމިއްލަ ގައުމުގައި ކުޅުމުގެ ފުރުސަތު ނުލިބި އޮތްވައެވެ.
ގްރޫޕް ސީގައި ހިމެނޭ މޮރޮކޯ އަދި ބްރެޒިލް ބައްދަލުކުރި މެޗު ނިމުނީ 1-1 އިން އެއްވަރުވެގެންނެވެ. ސްކޮޓްލޭންޑްގެ ދެން އޮތް މެޗުގައި އަންނަ ހުކުރު ދުވަހު ނުކުންނާނީ މޮރޮކޯއާ ދެކޮޅަށެވެ. އެއަށްފަހު ގްރޫޕްގެ ފަހު މެޗުގައި މިއާމީގައި ބްރެޒިލާ ދެކޮޅަށް ނުކުންނާނެއެވެ.
