ލޭ ހަދިޔާކުރާ ފަރާތްތަކުގެ ސަބަބުން އެތަކެއް ފުރާނައެއް ސަލާމަތްކުރެވިގެންދާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ބައިނަލްއަގްވާމީ ލޭ ހަދިޔާކުރާ ފަރާތްތަކުގެ ދުވަހާއި ގުޅިގެން މީސް މީޑިއާގައި ހިއްސާކުރެއްވި ޕޯސްޓެއްގައި ރައީސް މުޢިއްޒު ވިދާޅުވީ، ދުނިޔޭގެ ލޭ ހަދިޔާކުރާ ފަރާތްތަކުގެ ދުވަހުގެ މުނާސަބަތުގައި، ލޭ ހަދިޔާކުރާ ފަރާތްތަކުގެ ދީލަތި އެހީގެ އަގު ވަޒަންކުރައްވާ ކަމަށެވެ. އެފަދަ ފަރާތްތަކުގެ ދީލަތި އެހީއަކީ އުމުރުދުވަހަށް ބަލިތަހައްމަލުކުރާ ފަރާތްތަކާއި، ކުއްލި ފަރުވާ ބޭނުންވާ ބަލިމީހުންނަށް އެންމެ ބޭނުންޖެހޭ ވަގުތު ފުރާނަ ސަލާމަތްކުރުމަށް ފޯރުކޮށްދެވޭ ވަރަށް ބޮޑު އެހީތެރިކަމެއް ކަމަށެވެ.
On #WorldBloodDonorDay, we recognise the invaluable contribution of voluntary blood donors, whose generosity helps save lives. Their selfless act ensures that those suffering from lifelong conditions or patients requiring emergency care receive the support they need when it… pic.twitter.com/Bd9g13Giw2
— Dr Mohamed Muizzu (@MMuizzu) June 14, 2026
ބޭސްވެރިކަމާއި ޓެކްނޮލޮޖީގެ ދާއިރާއިން ދުނިޔެ ކުރިއަރައިގެން ދިޔަ ނަމަވެސް، ލޭގެ ބަދަލުގައި އެހެން އެއްވެސް އެއްޗެއް ބޭނުން ނުކުރެވޭނެކަން ފާހަގަކުރައްވަމުން ރައީސް ވިދާޅުވީ، އާންމު ސިއްހަތު ރައްކާތެރިކުރުމަށާއި، ސިއްހީ ހިދުމަތްތައް ފުރިހަމައަށް ފޯރުކޮށްދިނުމުގެ އިތުރުން ގައުމީ ފެންވަރުގައި ކުރިމަތިވެދާނެ ކުއްލި ހާލަތްތަކަށް ތައްޔާރުވެ ތިބުމަށްޓަކައި، ހިލޭސާބަހަށް ލޭ ހަދިޔާކުރުމުގެ އާދަ އަށަގެންނެވުމަކީ ކޮންމެހެން ވެސް ކުރަންޖެހިފައިވާކަމެއް ކަމަށެވެ.
ހަމައެހެންމެ ރާއްޖެފަދަ ޖިއޮގްރަފީ ގޮތުން ވަކިވަކި ރަށްތަކަކަށް ބެހިފައިވާ ޖަޒީރާ ގައުމަކަށް، ސިއްހީ ކުއްލި ހާލަތްތަކުގައި ވަގުތުން ލޭ ލިބުމަކީ ވަރަށް ބޮޑު ބަދަލެއް ގެނުވާނެކަމެއް ކަމަށް ރައީސް ވިދާޅުވިއެވެ. އެމަނިކުފާނުގެ މެސެޖުގައި، ލޭ ހަދިޔާކުރުމަށް މީހުން ހޭލުންތެރިކުރުވައި، އެއްބައިވަންތަކަމާއި އެކަކު އަނެކަކަށް އެހީތެރިވުމުގެ ރޫހު އާލާކޮށް، އެންމެންގެ ސިއްހީ ދުޅަހެޔޮކަން ކަށަވަރުކުރުމަށްޓަކައި މި ސަރުކާރުން އަބަދުވެސް ދެމިއޮންނާނެކަމުގެ ޔަގީންކަން ވަނީ ދެއްވައިފައެވެ.
