ލޯކަލް ކައުންސިލް އިންތިހާބުގައި ދ. މީދޫ ކައުންސިލްގެ ރައީސްގެ މަގާމަށް ވާދަ ކުރެއްވި ދެ ކެނޑިޑޭޓުން އެއްވަރުވުމުގެ ސަބަބުން މިއަދު ނެގި އިތުރު ބުރުގެ ވޯޓު ވެރިކަންކުރާ ޕާޓީ ޕީއެންސީގެ ކެނޑިޑޭޓް ސުހާ އިބްރާހީމް ކާމިޔާބުކޮށްފިއެވެ.
ސުހާ މި އިންތިހާބު ކާމިޔާބުކޮށްފައިވަނީ އެމްޑީއޭގެ ކެންޑިޑޭޓް މުހައްމަދު ޝާހިދާ ވާދަކޮށެވެ. ވޯޓުގެ ރަސްމީ ނަތީޖާ ލިބިފައި ނުވި ނަމަވެސް މީދޫގައި ބަހައްޓާފައިވާ ދެ ފޮއްޓާއި މާލޭގައި ބެހެއްޓި ފޮށީގެ ނަތީޖާއަށް ބަލާއިރު ސުހާ ވަނީ އެ އިންތިހާބު ކާމިޔާބުކޮށް، އެ ރަށު ކައުންސިލްގެ ރައީސްކަން ކަށަވަރުކުރައްވައިފައެވެ.
އިލެކްޝަންސް ކޮމިޝަނުން އެންމެފަހުން އާންމުކޮށްފައިވާ އަދާހަމައަށް ބަލައިލާއިރު މި އިންތިހާބުގައި މިހާތަނަށް 890 މީހުން ވަނީ ވޯޓުލައިފައެވެ. އެއީ 398 އަންހެނުންނާއި 492 ފިރިހެނުންނެވެ. މި އިންތިހާބުގައި ވޯޓުލުމުގެ ހައްގު ލިބިފައިވަނީ 1،049 މީހަކަށެވެ.
ދ. މީދޫ ކައުންސިލް ރައީސް މަގާމަށް މީހަކު އިންތިހާބު ކުރުމަށް އިތުރުބުރެއް ބާއްވަން ޖެހުނީ ދ. މީދޫ ކައުންސިލްގެ ރައީސްގެ ނަތީޖާ އެއް ވޯޓުގެ ތަފާތެއްގައި އޮއްވާ އިތުރު ވޯޓެއް ސައްހަ ކަމަށް ހައި ކޯޓުން ހުސްވި މެއި މަހުގެ 14 ވަނަ ދުވަހު ކުރި ހުކުމާއި ގުޅިގެންނެވެ. މި މައްސަލަ ހައި ކޯޓަށް ހުށަހެޅީ ޕީއެންސީގެ ކެންޑިޑޭޓް ސުހާ އިބްރާހިމެވެ.
މި މައްސަލަ ސުހާގެ ފަރާތުން ހައި ކޯޓަށް ހުށަހެޅީ، އޭނާއަށް ލިބުނު ދެ ވޯޓެއް ގޯސްކޮށް ބާތިލްކުރި ކަމަށް ބުނެއެވެ. ހައި ކޯޓުން ކޮށްފައިވާ ހުކުމުގައިވަނީ ދެ ވޯޓުގެ ތެރެއިން އެއް ވޯޓު ބާތިލްކުރީ ގޯސްކޮށް ކަމަށެވެ. އެ ވޯޓުގައި ހެޔޮ ފާހަގައިގެ މަތިން ފަވާފައިވީ ނަމަވެސް އިތުރު ފާހަގައެއް ނުވަތަ ނިޝާނެއް ވޯޓު ކަރުދާހުގައި ނެތުމުން އެއީ ސައްހަ ވޯޓެއް ކަމަށާއި ނަމަވެސް ދެވަނަ ވޯޓު ކަރުދާހުގައި ކެންޑިޑޭޓުގެ ނަމާ ދިމާލަށް ޖަހާފައިވާ ހެޔޮ ފާހަގައިގެ އިތުރުން އިތުރު ފާހަގައެއް އޮތުމުން އެއީ ބާތިލް ވޯޓެއް ކަމަށް ނިންމި ނިންމުން ރަނގަޅު ކަމަށް ކޯޓުގެ ހުކުމުގައިވެއެވެ.
މިދިޔަ އޭޕްރީލް މަހުގެ ހަތަރު ވަނަ ދުވަހު ބޭއްވި ލޯކަލް ކައުންސިލް އިންތިހާބުގައި މީދޫ ކައުންސިލްގެ ރައީސް ކަމަށް ވެރިކަން ކުރާ ޕާޓީ ޕީއެންސީންނާއި އެމްޑީއޭގެ އިތުރުން އަމިއްލަ ކެންޑިޑޭޓަކު ވާދަކޮށްފައިވާއިރު، 392 ވޯޓާއިއެކު ހޮވުނީ އެމްޑީއޭގެ ކެންޑިޑޭޓް މުހައްމަދު ޝާހިދުއެވެ. ޕީއެންސީގެ ކެންޑިޑޭޓް ސުހާއަށް ލިބިފައިވަނީ 391 ވޯޓެވެ.
މި އިންތިހާބުން ސުހާ ހޮވިފައިވާއިރު، މީދޫ ކައުންސިލްގެ މެމްބަރަކަށް ވެސް ހޮވިފައިވަނީ ޕީއެންސީގެ ހުސައިން ރަޝީދެވެ. އޭނާ އެ އިންތިހާބު ކާމިޔާބުކޮށްފައިވަނީ އެމްޑީއޭގެ މުހައްމަދު ތައުފީގުއާއި ވާދަކޮށް 42 ވޯޓުން ކުރި ހޯއްދަވައިގެންނެވެ.
އަދި މީދޫ ކައުންސިލްގެ އަންހެނުންނަށް ހާއްސަކޮށްފައިވާ ގޮނޑި ވެސް ކާމިޔާބުކޮށްފައިވަނީ ޕީއެންސީގެ ކެންޑިޑޭޓެވެ. ޕީއެންސީގެ މިސްކާ އަބްދުލް ރަހްމާން އެ އިންތިހާބު ކާމިޔާބުކޮށްފަިއވަނީ އެމްޑީއޭގެ އާމިނަތު މައުރީންއާއި ވާދަކޮށް 94 ވޯޓުން ކުރި ހޯއްދަވައިގެންނެވެ.
