މަރާމާތުގެ މަސައްކަތަށްފަހު، ރަސްފަންނު މޫދަށް އެރޭ ސަރަހައްދު އާންމުންނަށް މާދަމާ ހުޅުވާލުމަށް ނިންމައިފިއެވެ.
މިކަމާ ގުޅިގެން ހައުސިންގ މިނިސްޓްރީން ބުނެފައިވަނީ، ރަސްފަންނު މޫދަށް އެރޭ ސަރަހައްދު މަރާމާތުކުރުމުގެ މަސައްކަތް ނިމިފައިވާ ކަމަށެވެ. އެހެން ކަމުން ޖޫން 12 ވާ ހުކުރު ދުވަހުގެ ހެނދުނުން ފެށިގެން އާންމުނަށް އެ ސަރަހައްދު ހުޅުވާލާނެ ކަމަށް އެ މިނިސްޓްރީން ވަނީ ބުނެފައެވެ.
މިދިޔަ މަހުގެ 10 ވަނަ ދުވަހު ރަސްފަންނު މަރާމާތުކުރުމުގެ މަސައްކަތް އެމްޓީސީސީން ވަނީ ފަށައިފައެވެ. މި މަޝްރޫއުގެ ދަށުން ރަސްފަންނުގެ މޫދަށް އެރޭ ސަރަޙައްދުގެ އުތުރުން ޑްރެއިނޭޖް ރަނގަޅުކުރުމުގެ ގޮތުން ފެންހިންދާ ނިޒާމެއް ގާއިމްކުރުމާއި، މޫދަށް އެރޭ ސަރަޙައްދުގައި މިހާރު ޖަހާފައިވާ ހިލަ ތޮށި ނަގައި، ފެން ދައުރުކުރުމަށް ކަލްވާޓްސްތަކެއް ހިމަނައިގެން އަލުން ހިލަ ތޮށި ޖެހުމުގެ މަސައްކަތް ވަނީ ކޮށްފައެވެ.
ރަސްފަންނު ސަރަހައްދަކީ ވަަރަށް ގިނަ ބަޔަކު މޫދަށް އެރުމާއި ހިތް ފަސޭހަ ކޮށްލުމަށް ގޮސް އުޅޭ ސަރަހައްދެކެވެ.
