ގދ. ތިނަދޫ ސިޓީގައި ހުންނަ ޑރ. ޢަބްދުއްޞަމަދު މެމޯރިއަލް ހޮސްޕިޓަލުގައި، އޮޕަރޭޝަންތަކަށް ޚާއްޞަ ޑޮކްޓަރުންގެ ބޮޑު ކޭމްޕެއް މިއަދު ފަށައިފިއެވެ.
މިއަދުން ފެށިގެން ކުރިއަށް އޮތް ހޮނިހިރު ދުވަހުގެ ނިޔަލަށް ކުރިއަށްގެންދާ މި ކޭމްޕަކީ އެކި ބަލިތަކަށް ޚާއްޞަ 10 ޑޮކްޓަރުންގެ ޓީމަކުން އިސްނަގައިގެން ކުރިއަށްގެންދާ ހަރަކާތެކެވެ. މި ކޭމްޕުން ފަރުވާ ހޯދުމަށް ބޭނުންވާ ފަރާތްތަކަށް 1555އަށް ގުޅައިގެން އެޕޮއިންޓްމަންޓް ހެދޭނެ އިންތިޒާމު މިހާރު ވަނީ ހަމަޖައްސާފައެވެ.
މި ކޭމްޕުގައި ހިމެނޭ ޚާއްޞަ ޑޮކްޓަރުންގެ ތެރޭގައި އާންމު އަދި ލެޕްރޮސްކޯޕިކް އޮޕަރޭޝަންތަކަށް ޚާއްޞަ ޑޮކްޓަރަކާއި، ޕްލާސްޓިކް އެންޑް ރިކޮންސްޓްރަކްޓިވް އަދި އެޑްވާންސް ވޫންޑް ކެއާރއަށް ޚާއްޞަ ޑޮކްޓަރަކާއި، އަންހެނުންގެ ބަލިތަކާއި ވިހެއުމަށް ޚާއްޞަ ޑޮކްޓަރެއް ހިމެނެއެވެ. މީގެ އިތުރުން ކުޑަކަމުދާ ނިޒާމުގެ ބަލިތަކާއި، ގޮހޮރު އަދި ބެރިއޭޓްރިކް އޮޕަރޭޝަންތަކާއި، ކެންސަރުގެ އޮޕަރޭޝަންތަކުގެ އިތުރުން ނާރުގެ އޮޕަރޭޝަންތަކަށް ޚާއްޞަ ޑޮކްޓަރުން މި ކޭމްޕުގައި ބަލިމީހުން ބަލާނެއެވެ. އަދި ހޭނެއްތުމާއި ނުފިލާ ހުންނަ ތަދުތަކަށް (Pain Management) ޚާއްޞަ ޑޮކްޓަރެއްވެސް މި ޓީމުގައި ހިމެނެއެވެ.
މި ކޭމްޕުގެ ތެރެއިން ފޯރުކޮށްދޭނެ މުހިންމު ޚިދުމަތްތައް:
އޯޕީޑީގައި ބަލި މީހުން ބަލައި ފަރުވާދިނުން.
ފަސޭހަނުވެ ގިނަ ދުވަސްވެފައިވާ ފަރާތްތަކަށް ޚާއްޞަ ފަރުވާދިނުން.
ލެޕްރޮސްކޮޕިކް އޮޕަރޭޝަންތަކާއި، އާންމުކޮށް ކަފާލައިގެން ކުރާ
އޮޕަރޭޝަންތައް ކުރުން.
ގިނަދުވަސް ވެފައިވާ، ފަސޭހަނުވާ ތަދުތަކަށް ޚާއްޞަ ފަރުވާދިނުން.
ޑޮކްޓަރުންނާއި، ނަރުހުންނަށް ބޭނުންވާ ފަންނީ މަޢުލޫމާތު ދިނުމާއި ތަމްރީނު ޕްރޮގްރާމްތައް ހިންގުން.
The Multi-Specialty Surgical Outreach Program, organized by the Ministry of Health and Family Welfare, the Male’ City Group of Hospitals, and Abdul Samad Memorial Hospital (ASMH), aims to bring specialized surgical care closer to the community by providing a wide range of… pic.twitter.com/Ys1X5Ny6Jr
— Ministry of Health, Family and Welfare (@MoHmv) June 11, 2026
މި ކޭމްޕާ ގުޅޭގޮތުން އައިޖީއެމް ހޮސްޕިޓަލުން ބުނީ، މިފަދަ ކޭމްޕުތަކުގެ ސަބަބުން ޞިއްޙީ ޚިދުމަތްތަކަށް އޮތް ފުރުޞަތުތައް އިތުރުވެ، ފެންވަރު ރަނގަޅު ފަރުވާ ރައްޔިތުންނާ ގާތަށް ގެންގޮސްދެވޭނެ ކަމަށެވެ.
