މަސްތުވާތަކެތި ބޭނުންކޮށް، ގެންގުޅެ އަދި އެ ތަކެތީގެ ވިޔަފާރިކުރާކަމަށް ތުހުމަތުކުރެވޭ މައްސަލައެއްގައި ޅ. ހިންނަވަރުން ހަތަރު މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.
މި މައްސަލައާ ގުޅިގެން ހައްޔަރުކޮށްފައިވަނީ ހިންނަވަރަށް ނިސްބަތްވާ ހަތަރު ފިރިހެނުންނެވެ. އެއީ:
ޢަބްދުލްމަޖީދު ރަޝާދު (35އ)، ކަރެޝްމާ / ޅ. ހިންނަވަރު
މުޙައްމަދު ސައްޖާދު ޢަލީ (34އ)، ސަރަހަ / ޅ. ހިންނަވަރު
ދިލްޝާދު (24އ)، ޅ. ހިންނަވަރު
ޢަހުދު އިބްރާހީމް (34އ)، ދުވާފަރު / ޅ. ހިންނަވަރު
މި ހަތަރު މީހުން ހައްޔަރުކޮށްފައިވަނީ ކައުންޓަރ ނާކޮޓިކްސް އިންޓެލިޖެންސް އާއި ނައިފަރު ޕޮލިސް ސްޓޭޝަނުގެ އިތުރުން ހިންނަވަރު ޕޮލިސް ސްޓޭޝަން ގުޅިގެން ހިންގި ޚާއްޞަ އޮޕަރޭޝަނެއްގެ ދަށުންނެވެ.
ފުލުހުން މަޢުލޫމާތު ދެއްވާގޮތުގައި، މި ޖޫން މަހުގެ 9 ވަނަ ދުވަހު ހިންނަވަރުގެ ގެއަކުން މި މީހުން ހުއްޓުވައި ބަލައިފާސްކުރިއިރު، މަސްތުވާތަކެތި ކަމަށް ބެލެވޭ އެއްޗެއް ހުރި ރަބަރު ޕެކެޓެއް ވަނީ ފެނިފައެވެ.
މި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ޢަހުދު އިބްރާހިމް 15 ދުވަހަށް ބަންދުގައި ބެހެއްޓުމަށް ވަނީ އަމުރުކޮށްފައެވެ. އަދި ދެން ތިބި ތިން މީހުން ކަމަށްވާ ޢަބްދުލްމަޖީދު ރަޝާދާއި، މުޙައްމަދު ސައްޖާދު ޢަލީގެ އިތުރުން ދިލްޝާދު 12 ދުވަހުގެ މުއްދަތަށް ބަންދުގައި ބެހެއްޓުމަށް ކޯޓުން ވަނީ އަމުރުކޮށްފައެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
