އެމްޑީޕީގެ ޗެއާޕާސަން އިންތިޚާބުގެ ކެމްޕޭން ފޯރިއާއެކު ކުރިއަށްދާއިރު، ރައީސް ޑރ. މުޙައްމަދު މުޢިއްޒަށް އަމާޒުކޮށް މި އިންތިޚާބުގައި ވާދަކުރާ ކުރީގެ ރައީސް ނަޝީދު (ނަޝީދު) ފުރައްސާރަކޮށްފިއެވެ.
މިރޭ ބޭއްވި ކެމްޕޭން ޖަލްސާއެއްގައި ވާހަކަދައްކަވަމުން ނަޝީދު ވިދާޅުވީ، އޭނާ މި އިންތިޚާބުން މޮޅުވުމުން ރައީސް މުޢިއްޒު ޖެހޭނީ ”މުންޑު އަނދެގެން ގޭގައި އޮންނަން“ ކަމަށާއި ބޭރަށް ނުކުމެވަޑައިގެން އުޅުއްވައިގެން ނުވާނެ ކަމަށެވެ.
އެމްޑީޕީގެ ޗެއާޕާސަން އިންތިހާބުގަ ނަޝީދު ވާދަކުރައްވަނީ ގަލޮޅު ދެކުނު ދާއިރާގެ މެންބަރު މީކާއިލް ނަސީމްއާ އެވެ. ނަމަވެސް، މުޅި ކެމްޕޭނުގައި ނަޝީދުގެ ފޯކަސް ހުރީ އޭނާގެ ވާދަވެރި ކެންޑިޑޭޓަށް ވުރެ ބޮޑަށް ސަރުކާރަށާއި ރައީސް މުޢިއްޒަށެވެ.
އެގޮތުން ކޮންމެ ޕޯޑިއަމެއްގައިވެސް ރައީސް މުޢިއްޒާ ޒާތީ ގޮތުން ދިމާކުރައްވައި، އިޙުތިރާމް ކުޑަވާ ފަދަ ބަސްމަގުން ނަޝީދު ގެންދަވަނީ ވާހަކަދައްކަވަމުންނެވެ.
އިންތިޚާބުން ބަލިވެއްޖެ ނަމަ ރައީސް މުޢިއްޒު ގޭގައި އޮންނަވަން ޖެހޭނެ ކަމަށް ވިދާޅުވީ ކީއްވެގެންތޯ ސުވާލު ކުރުމުން ނަޝީދު ވިދާޅުވީ، ”ޑިމޮކްރަސީއެއްގައި ބަލިވާ މީހާ ދެން މާ ގަދަހަށި ނަގައިގެން އުޅޭނެ ކަމެއް ނެތް“ ކަމަށެވެ. އަދި އޭނާގެ އަސްލު ވާދަވެރިޔަކީ ފެންނަން ހުރި ކެންޑިޑޭޓް (މީކާއިލް) ނޫން ކަމަށާއި، އޭނާއާ ވާދަކުރަނީ ސަރުކާރުން ކަމަށް ނަޝީދު ތުހުމަތު ކުރެއްވިއެވެ. ”އަޅުގަނޑާ ވާދަކުރަނީ ސަރުކާރުން، ކަޓުވާލަން އުޅެނީ ސަރުކާރުން،“ ނަޝީދު ވިދާޅުވިއެވެ.
ފާހަގަކޮށްލެވޭ ގޮތުގައި ރައީސް މުޢިއްޒު ވާދަކުރެއްވި ކޮންމެ އިންތިޚާބެއްގައިވެސް ނަޝީދު ވަނީ އެމަނިކުފާނަށް ފުރައްސާރަކޮށް ވާހަކަ ދައްކަވާފައެވެ. މީގެ ކުރިން ”ރާއްޖެތެރޭ މީހެކޭ“ ކިޔައިގެންނާއި އެކި ކަހަލަ ވަނަމުން ގޮވައި ރައީސް މުޢިއްޒަށް އަމާޒުކޮށް ނަޝީދު ފާޑުކިޔުންތައް އަމާޒުކުރިއެވެ. ނަމަވެސް، މި ހުރިހާ ފުރައްސާރައަކާއި ޒާތީ ހަމަލާތަކަކަށް ރައީސް މުޢިއްޒު އިޖާބަދެއްވަމުން ގެންދަވަނީ ކެތްތެރިކަމާއެކުގައެވެ. ދުވަހަކުވެސް ސިޔާސީ އެއްވެސް ވާދަވެރިޔަކަށް ރައީސް ޑރ. މުޢިއްޒު މިފަދަ ދަށު ދަރަޖައިގެ ބަސްމަގަކުން ރައްދެއް ދެއްވާފައެއް ނުވެއެވެ.
ސިޔާސީ މަސްރަޙު ދިރާސާކުރާ ފަރާތްތަކުން ބުނާ ގޮތުގައި ނަޝީދުގެ ބަސްމަގު ހުރި ގޮތުން އެމްޑީޕީގެ އާންމު މެންބަރުންގެ ތެރޭގައިވެސް އޭނާއަށް އޮތް ތާއީދު ވަނީ ކުޑަވެފައެވެ. ގިނަ ބަޔަކު ގަބޫލުކުރާ ގޮތުގައި މިފަހަރުގެ ޗެއާޕާސަން އިންތިޚާބު ކާމިޔާބު ކުރުމުގެ ފުރުސަތު ބޮޑީ މީކާއިލް ނަސީމް އަށެވެ. ނަޝީދުގެ ރުޅިވެރިކަމާއި ޒާތީ ފާޑުކިޔުންތަކުގެ ސަބަބުން ޕާޓީގެ އެތެރޭގައިވެސް އޭނާއަށް އޮތް ނަފްރަތު ދަނީ އިތުރުވަމުންނެވެ.
