ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ގޮނޑި ކާމިޔާބު ކުރެއްވި އައްޑޫ ސިޓީގެ ކުރީގެ މޭޔަރު ޢަބްދުﷲ ސޯދިގު (ސޯބެ) މެންބަރުކަމުގެ ހުވައިކުރުމުގެ ރަސްމިއްޔާތު އަންނަ ހޯމަ ދުވަހު ބޭއްވުމަށް މަޖިލީހުގެ އިދާރާއިން ނިންމައިފިއެވެ.
ސޯދިގު ހުވައިކުރުމަށް ހަމަޖެހިފައިވަނީ އަންނަ ހޯމަ ދުވަހުގެ ހެނދުނު އެކަމަށްޓަކައި ބާއްވާ ހާއްސަ ޖަލްސާގައެވެ. މި ޖަލްސާ ބޭއްވުމަށް ހަމަޖެހިފައިވަނީ އެ ދުވަހު ހެނދުނު 08:30 ގައެވެ.
މި ދާއިރާގެ މެންބަރުކަމުގައި ކުރިން ހުންނެވި އަޙުމަދު ސިނާންގެ މައްޗަށް ސާބިތު ދަރަންޏެއް އޮތުމުގެ ސަބަބުން އޭނާގެ ގޮނޑި ގެއްލިފައިވާ ކަމަށް ސުޕްރީމް ކޯޓުން ކަނޑައެޅުމާ ގުޅިގެން ބޭއްވި ބައި-އިލެކްޝަން ސޯދިގު ކާމިޔާބު ކާމިޔާބުކޮށްފައި ވަނީ ޕީއެންސީގެ ކެންޑިޑޭޓާ ވާދަކޮށް 62 ވޯޓުގެ ހަނި އަޣުލަބިއްޔަތަކުންނެވެ.
މި އިންތިހާބުގައި ސޯދިގަށް 1375 ވޯޓު ލިބިފައިވާއިރު، އޭނާއާ ވާދަކުރި ޕީއެންސީގެ ކެންޑިޑޭޓް އަޙްމަދު ސަޢީދު (ސޮޑާ) އަށް ލިބުނީ 1313 ވޯޓެވެ.
