ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެންބަރު އަޙްމަދު އަޒާންގެ އަބުރު ކަތިލުމުގެ ނިޔަތުގައި ”ދައުރު“ ނޫހުން ޝާއިއުކުރި ދޮގު ރިޕޯޓު ވަގުތީ ގޮތުން ނެގުމަށް ސިވިލް ކޯޓުން މިއަދު އަމުރެއް ނެރެފިއެވެ.
ދައުރު ނޫހުގެ މި ރިޕޯޓަކީ އެ ނޫހުގެ އެޑިޓަރު މޫސާ ލަޠީފް، މިދިޔަ އޭޕްރީލް މަހުގެ 28 ވަނަ ދުވަހު ލިޔެ، ޝާއިއުކޮށްފައިވާ ރިޕޯޓެކެވެ. މި ރިޕޯޓާ ގުޅިގެން އަޒާން ވަނީ މޫސާ ލަޠީފާ ދެކޮޅަށް ދައުވާ ކޮށްފައެވެ. މިކަމާ ގުޅިގެން އަޒާން ސިވިލް ކޯޓަށް ހުށަހެޅުއްވި މައްސަލައިގައި ވަނީ، އެ މައްސަލަ ބަލައި ނިމެންދެން އެ ރިޕޯޓު އާންމުންނަށް ނުފެންނާނެ ގޮތް ހެދުމަށް އަމުރު ނެރެދިނުމަށް އެދިވަޑައިގެންފައެވެެ.
އަޒާންގެ އެދުމާ އެއްގޮތަށް ސިވިލް ކޯޓުން މިއަދު ނެރުނު އަމުރުގައިވަނީ، މި މައްސަލަ ބަލައި ނިމެންދެން އެ ރިޕޯޓު އާންމުންނަށް ނުފެންނާނެ ގޮތަށް ދައުރު ނޫހުގެ ވެބްސައިޓުން ނެގުމަށް އަމުރުކޮށްފައެވެ. ކޯޓުގެ މި އަމުރާއެކު އެ ނޫހުން މިހާރު ވަނީ އެ ރިޕޯޓް ވެބްސައިޓުން ނަގައިފައެވެ.
މި މައްސަލައާ ގުޅިގެން ސިވިލް ކޯޓަށް އަޒާން ހުށަހެޅުއްވި މައްސަލާގައި ވަނީ، އޭނާގެ އަބުރަށް އަރައިގަތް ކަމަށް ކަނޑައަޅައި 5،000 ރުފިޔާ ނަގައިދިނުމުގެ އިތުރުން، ގާނޫނީ ވަކީލުންނަށާއި މައްސަލަ ރަޖިސްޓްރީކުރުމަށް ހޭދަވި 28,678 ރުފިޔާއާއެކު ޖުމުލަ 33،678 ރުފިޔާ ނަގައިދިނުމަށް ވެސް އެދިވަޑައިގެންފައެވެ.
މި މައްސަލައާ ގުޅިގެން ދައުރު ނޫހާއި، އެ ނޫސް ހިންގާ ކުންފުނި ކަމަށްވާ ”ނެކްސްޓް މީޑިއާ ގްރޫޕް“ އާ ދެކޮޅަށް ވެސް އަޒާން ދައުވާކޮށްފައިވާކަން ފާހަގަކޮށްލަންޖެހެއެވެ.
