އިމިގްރޭޝަނުގެ ކުރީގެ ކޮންޓްރޯލަރ ޖެނެރަލް މުޙައްމަދު ޝަމްއާން ވަޙީދު ކޮށްފައިވާ ތުހުމަތުތައް ބަންޑާރަ ނައިބު އަޙްމަދު އުޝާމް ދޮގު ކުރައްވައިފިއެވެ.
ޝަމްއާންގެ މައްޗަށް ތިން ދައުވާއެއް ސާބިތުވެފައިވާއިރު، ކޯޓުން ބޭއްވި އަޑުއެހުމަށް ހާޒިރުވުމުގެ ކުރިން އޭނާ ވަނީ ނޫސްވެރިންނާ ބައްދަލުކޮށްފައެވެ. ނޫސްވެރިންނާ ބައްދަލުކުރުމަށްފަހު އޭނާ ވަނީ، ހޯމް މިނިސްޓަރު ޢަލީ އިޙުސާނަށް ސީރިއަސް ތުހުމަތުތަކެއް ކޮށްފައެވެ. އެގޮތުން، ރާއްޖޭގެ ބޯޑަރ ކޮންޓްރޯލް މިނިސްޓަރު އިޙުސާން ބޭނުންފުޅުވާ ވަކި ބަޔަކަށް ވިއްކާލާފައިވާ ކަމަށް އޭނާ ވަނީ ބުނެފައެވެ.
ޝަމްއާން ބުނެފައިވާ ގޮތުގައި، ބޯޑަރ ކޮންޓްރޯލް ވިއްކާލުމުގައި އެންމެ އިސްކޮށް ހަރަކާތްތެރިވީ ބަންޑާރަ ނައިބު އުޝާމާއި މިނިސްޓަރު އިޙުސާނެވެ. އެކަމާ ގުޅޭ ހެކި ފުލުހުންގެ އަތުގައި އޮތް އޭނާގެ ފޯނުގައި ހުންނާނެ ކަމަށާއި، މިހާރު ވެސް މިފަދަ ކަންކަން ސިއްރިއްޔާތުގައި ހިނގަމުންދާކަމުގެ ތުހުމަތު ޝަމްއާން ވަނީ ކޮށްފައެވެ.
މި ކަންކަން ހުއްޓުވުމަށް މަސައްކަތްކުރި ނަމަވެސް އެކަމާ ދެކޮޅު ހެދުމުގެ ސަބަބުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކި ފަހަރުގެ މަތިން އޭނާއަށް ގުޅުއްވި ކަމަށް ޝަމްއާން ވަނީ ބުނެފައެވެ. އެހެންކަމުން މި ކަމުގައި ރައީސް މުއިއްޒުގެ ވެސް ބައިވެރިވުމެއް އޮތް ކަމަށް އޭނާ ވަނީ ތުހުމަތުކޮށްފައެވެ.
ޝަމްއާންގެ މި ވާހަކަތަކާ ގުޅިގެން ބަންޑާރަ ނައިބު އުޝާމް ވިދާޅުވީ، ޝައްމާންގެ މައްޗަށް ދައުވާކުރީ ބިދޭސީއެއްގެ އަތުން ފައިސާ ފޭރުމުގެ މައްސަލައެއްގައި ކަމަށާއި އެެއީ ސިޔާސީ ގޮތުން ކޮށްފައިވާ ދައުވާއެއް ނޫން ކަމަށެވެ.
ޝަމްއާން ހައްޔަރުކުރީ އިމިގްރޭޝަންގެ ބެލުމުގެ ދަށަށް ގެންދިޔަ ބިދޭސީއަކު ދޫކޮށްލުމަށްފަހު އޭނާގެ އަތުން 500،000 ރުފިޔާ އަތުލިކަމުގެ ތުހުމަތުގައެވެ. މި މައްސަލައާ ގުޅިގެން ޝަމްއާން ހައްޔަރުކޮށް ޝަރީއަތް ނިމެންދެން ބަންދުކުރީ މިދިޔަ އަހަރުގެ މާރިޗު މަހުގެ ތެރޭގައެވެ. އެފަހުން މިދިޔަ ޑިސެމްބަރު މަހުގެ ތެރޭގައި ޝަރުތުތަކަކާއެކު ޝަމްއާން ވަނީ ބަންދުން ދޫކޮށްލައިފައެވެ.
