ރައްޔިތުންގެ މަޖިލީހުގެ ނައިބު ރައީސްކަން ފަދަ މަގާމެއް ބޭނުންފުޅު ނުވާ ކަމަށާއި، އެ މަގާމާ ހަވާލުވެވަޑައިގަތީ ޕާޓީގެ މަސްލަހަތާއި އެކުވެރިކަން ދެމެހެއްޓެވުމަށްޓަކައި ކަމަށް ރައްޔިތުންގެ މަޖިލީހުގެ އޭދަފުށި ދާއިރާގެ މެންބަރު އަޙްމަދު ސަލީމް ވިދާޅުވެއްޖެއެވެ.
ޕީއެންސީން މިރޭ ބޭއްވި ހަރުގެ ޖަލްސާގައި ވާހަކަދައްކަވަމުން މެންބަރު ސަލީމް ވިދާޅުވީ، މަޖިލީހުގެ ނައިބު ރައީސްކަން ފަދަ މަތީ މަގާމެއް ބޭނުންފުޅު ނުވާ ވަރަށް ބައިވަރު ސަބަބުތައް އެބަހުރި ކަމަށެވެ. އެގޮތުން އަމިއްލަ ވިޔަފާރީގައި ބުރަކޮށް އުޅެންޖެހުމަކީ މިފަދަ މަގާމެއް ބޭނުންފުޅު ނުވާ ސަބަބެއް ނަމަވެސް ޕާޓީގެ މަސްލަހަތަކީ މުހިއްމު ކަމެއް ކަމުގައި ދެކެވަޑައިގަންނަވާތީ އެ މަގާމާ ހަވާލުވެވަޑައިގަތީ ކަމަށް ސަލީމް ވިދާޅުވިއެވެ.
”ހަގީގަތުގައި ދަންނަވާ ނަމަ، އަޅުގަނޑު ވެސް މަޖިލީހުގެ ނައިބު ރައީސް ކަމެއް ބޭނުމެއް ނޫން. އެހެންނަމަވެސް، މިއަދުގެ ހާލަތާއި، މިއަދުގެ ޕާޓީގެ މަސްލަހަތާއި، ޕާޓީގެ އެކުވެރިކަމާއި، ޕާޓީގެ ގުޅުން ބަދަހިކުރުމަށްޓަކައި އަޅުގަނޑު މި މަގާމާ ހަވާލުވީ،“ – ސަލީމް ވިދާޅުވިއެވެ.
އެ މަގާމާ ހަވާލުވެވަޑައިގަތުމަށްފަހުގައި ވެސް ދައުލަތުން ލިބޭ އިނާޔަތްތަކާ މެދު ގެންގުޅުއްވާ ވިސްނުން ހާމަކުރައްވަމުން ސަލީމް ވިދާޅުވީ، ރަސްމީ ކާރުކޮޅާ ހަވާލުވުމަށް މަޖިލީހުގެ އިދާރާއިން ތަކުރާރުކޮށް އެދުމުން ވެސް ކަމަށް އިންކާރު ކުރައްވާފައިވާ ކަމަށެވެ. ސަބަބަކީ އޭނާއަކީ މާ މަތީ ފެންވަރެއްގެ ދިރިއުޅުމެއް އުޅެން ބޭނުންފުޅުވާ ބޭފުޅަކަށް ނުވާތީ ކަމަށް ސަލީމް ވަނީ ވިދާޅުވެފައެވެ.
މީގެ އިތުރުން ގާނޫނީ ގޮތުންނާއި ސަލާމަތީ ގޮތުން ސެކިއުރިޓީއަކީ ބޭނުންތެރި އެއްޗެއްކަން ގަބޫލުފުޅުކުރާ ކަމަށާއި، އެހެންނަމަވެސް ހަގީގީ ސަލާމަތާއި ރައްކާތެރިކަން ވަނީ މާތްالله އަށް ވަކީލުކުރެވިފައި ކަމަށް ސަލީމް އިތުރަށް ވިދާޅުވިއެވެ.
