ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ގެންގުޅުއްވާ ހަރުދަނާ އިޤްތިޞާދީ ސިޔާސަތުތަކުގެ ސަބަބުން، އަވަށްޓެރި ސްރީލަންކާއަށް ދިމާވި ފަދަ އިޤްތިޞާދީ ބޮޑު ކާރިސާއަކުން ރާއްޖެ ސަލާމަތްވެފައިވާ ކަމަށް ކުރީގެ ފިނޭންސް މިނިސްޓަރ މޫސާ ޒަމީރު ވިދާޅުވެއްޖެއެވެ.
ޕީއެންސީން މިރޭ ބޭއްވި ހަރުގެ ޖަލްސާގައި ވާހަކަދައްކަވަމުން ޒަމީރު ވިދާޅުވީ، ދުނިޔޭގެ މާލީ ހާލަތާއި ހަނގުރާމަތަކުގެ ސަބަބުން ކުރިމަތިވެފައިވާ ދަތިތަކާއެކުވެސް، ފިޗް ރޭޓިންގްސްއިން ރާއްޖެއަށް ’ސީސީސީ ޕްލަސް‘ (CCC+) ރޭޓިންއެއް ދީފައިވަނީ ރައީސް މުޢިއްޒުގެ އިޤްތިޞާދީ ސިޔާސަތުތަކަށް އޮތް އިތުބާރެއްގެ ބޮޑުކަމުން ކަމަށެވެ. ޒަމީރު ފާހަގަކުރެއްވި ގޮތުގައި، ރާއްޖޭގެ އިޤްތިޞާދީ ހާލަތު އޮތް ގޮތުން ފިޗްގެ ރޭޓިން ކޮމިޓީން ފުރަތަމަ ނިންމީ ރޭޓިން ’މައިނަސް‘ އަކަށް ބަދަލުކުރުމަށެވެ. ނަމަވެސް، ސަރުކާރުން އަޅަމުންދާ ހަރުދަނާ ފިޔަވަޅުތަކުގެ ސަބަބުން ރާއްޖެއަށް މިހާރު އޮތް އެންމެ މަތީ ރޭޓިން ލިބިފައިވާ ކަމަށް އޭނާ ވިދާޅުވިއެވެ.
”އަޅުގަނޑުމެން މި ދަންނަވަނީ ހަނގުރާމައިގެ މި ދަތި ހާލުގަ ރައީސް ގެންގުޅުއްވާ އިޤްތިޞާދީ ސިޔާސަތު ރަނގަޅުވީމަ ނޫންތޯއޭ ފިޗުން އައިސް މިވަރުގެ ރޭޓިންއެއް ރާއްޖެއަށް ދޭނީ؟“ ޒަމީރު ސުވާލުކުރެއްވިއެވެ.
ޒަމީރުގެ ވާހަކަފުޅުގައި، އޭނާގެ ބަދަލުގައި ފިނޭންސް މިނިސްޓަރުގެ މަޤާމަށް އައްޔަންކުރެއްވި ބޭފުޅާއަކީ އެ މަޤާމަށް އެންމެ ޤާބިލް ބޭފުޅާ ކަމަށް ވިދާޅުވިއެވެ. އެގޮތުން، މިހާރުގެ ފިނޭންސް މިނިސްޓަރަކީ މީރާ އުފެދުނީއްސުރެ އެތަނުގެ އިސް މަޤާމުތަކާއި، ޑެޕިއުޓީ ކޮމިޝަނަރުގެ ފަންތީގައި މަސައްކަތް ކުރައްވައި، ރާއްޖޭގެ ރޭޓިންއާއި ރެވެނިއު ސްޓްރީމްތަކަށް ވަރަށް ބޮޑަށް އަހުލުވެރި ބޭފުޅެއްކަން އޭނާ ފާހަގަކުރެއްވިއެވެ.
ކެބިނެޓަށް ބަދަލު އައި ނަމަވެސް، ރައީސް މުޢިއްޒުގެ ފިކުރާއެކު ސާބިތުވެ ހުންނަވާނެ ކަމުގެ ޔަޤީންކަން ދެއްވަމުން ޒަމީރު ވިދާޅުވީ، އޭނާ ސިޔާސީ މައިދާނުން ގެއްލުނީ ނޫން ކަމަށެވެ. އަދި ރައީސްއަކީ ލަފާ ގަބޫލުކުރައްވާ ބޭފުޅެއް ކަމަށާއި، ބޭރުގައި ހުރެގެންވެސް ރައީސަށް ލަފާ އެރުވުމުގައި ދެމިހުންނަވާނެ ކަމަށް ވިދާޅުވިއެވެ.
”އަޅުގަނޑު އަބަދުވެސް ހުންނާނީ މި ފިކުރާ އެކުގޭ. ރައީސް މުއިއްޒުގެ އުފެއްދުންތެރި ފިކުރާ އެކުގޭ އަބަދުވެސް އަޅުގަނޑު ހުންނާނީ އެމަނިކުފާނު ކުރައްވާ ކޮންމެ ކަމެއްގައި އަބަދުވެސް ފަހަތުގަ ހުންނާނަމޭ،“ ޒަމީރު ވިދާޅުވިއެވެ.
ޒަމީރުގެ ވާހަކަ ނިންމަވާލެއްވީ، ރާއްޖެ ދަރަނިވެރިވެ، އިޤްތިޞާދީ ގޮތުން އިނދަޖެހިގެން ދިޔަ ނުދީ ހިފެހެއްޓެވި ކަމަށްޓަކައި ރައީސް މުޢިއްޒަށް ޝުކުރު އަދާކުރައްވަމުންނެވެ. އޭނާ ވިދާޅުވި ގޮތުގައި ރައީސް އެ ފިޔަވަޅުތައް ނޭޅުއްވިނަމަ ރާއްޖެ އޮންނާނީ ސިލޯނަށް ވީ ހާލުގައެވެ. ނަމަވެސް މިއަދު ދުނިޔޭގެ އެއްވެސް ރިޕޯޓެއްގައި ރާއްޖެ ބަނގުރޫޓުވާނެ ކަމުގެ ބިރެއް ނެތް ކަމަށް ޒަމީރު ވިދާޅުވިއެވެ.
