ރައީސް އޮފީހުގެ ދިވެހިބަހާއި ގައުމިއްޔަތާ ބެހޭ ޚާއްސަ މުޝީރުގެ މަގާމަށް މިއަދު އައްޔަންކުރެއްވި ކުރީގެ މިނިސްޓަރު އާދަމް ނަސީރު އިބްރާހިމް، މަގާމާ ހަވާލުވެވަޑައިގެންނެވިތާ މަދު ގަޑިއިރުތަކެއްގެ ތެރޭގައި އެ މަގާމުން އިސްތިއުފާދެއްވައިފިއެވެ.
އާދަމް ނަސީރު އިބްރާހިމް ރައީސް އޮފީހުގެ ޚާއްސަ މުޝީރުކަމަށް އައްޔަންކުރެއްވިކަން ސަރުކާރުން ހާމަކުރީ މިއަދު ހެނދުނުގެ ވަގުތެއްގައެވެ.
ސަރުކާރުގެ ތަރުޖަމާނު މުހައްމަދު ހުސެއިން ޝަރީފް އޭރު ވިދާޅުވީ އާދަމް ނަސީރު މަސައްކަތް ފައްޓަވައިފައިވާ ކަމަށެވެ. ނަމަވެސް އެކަމާ ގުޅޭ ރަސްމީ މައުލޫމާތުތައް ހާމަކުރިތާ މާ ގިނައިރުތަކެއް ނުވަނީސް، މިއަދު 15:30 ގައި އޭނާ މަގާމުން އިސްތިއުފާދެއްވިކަން ތަރުޖަމާނު ވަނީ ކަށަވަރުކޮށްދެއްވައިފައެވެ.
މިދިޔަ އޭޕްރިލް މަހުގެ 14 ވަނަ ދުވަހު އާދަމް ނަސީރު އިބްރާހިމް ހިމެނޭހެން ސަރުކާރުގެ 10 މިނިސްޓަރަކު ވަނީ ކުއްލި ގޮތަކަށް މަގާމުން އިސްތިއުފާދެއްވައިފައެވެ.
ރައީސް އޮފީހުން އޭރު ބުނެފައިވާ ގޮތުގައި އެ ފިޔަވަޅު އެޅުއްވީ ރައްޔިތުންގެ ވިންދާ އެއްގޮތަށް ސަރުކާރު ހިންގެވުމަށް ރައީސް ޑރ. މުހައްމަދު މުއިއްޒު ގެންނަވަން ބޭނުންފުޅުވާ ހެޔޮ ބަދަލުތަކަށް ފުރުސަތު ދެއްވުމަށެވެ.
އެ ފަހަރު އިސްތިއުފާދެއްވި ބައެއް މިނިސްޓަރުންނަށް ފަހުން ސަރުކާރުގެ އިސް މަގާމުތައް ދީފައިވެއެވެ. އެގޮތުން ކުރީގެ ހެލްތު މިނިސްޓަރު އަބްދުالله ނާޒިމް އިބްރާހީމް ވަނީ މިނިސްޓަރު ފެންވަރުގައި ރައީސް އޮފީހުގެ މަގާމަކަށް އަލުން އައްޔަންކުރައްވައިފައެވެ. އަދި އޭގެ އިތުރުން ކުރީގެ ލޯކަލް ގަވަމެންޓް މިނިސްޓަރު އާދަމް ޝަރީފް ގަތަރަށް އަދި ކުރީގެ އެންވަޔަރަމެންޓް މިނިސްޓަރު ތޯރިގް އިބްރާހީމް ޔޫއޭއީއަށް ސަފީރުންގެ ގޮތުގައި ފޮނުއްވުމަށް ސަރުކާރުން ވަނީ ނިންމަވައިފައެވެ.
