އަންނަ ބުރާސްފަތި ދުވަހުގެރޭ ފެށުމަށް ހަމަޖެހިފައިވާ ”ފީފާ ވޯލްޑް ކަޕް 2026“ އާ ގުޅިގެން ޕަބްލިކް ސާވިސް މީޑިއާ (ޕީއެސްއެމް) އިން ގެނެސްދޭ ޚާއްޞަ ކަވަރޭޖުގެ މެއިން ސްޕޮންސަރަކަށް މޯލްޑިވްސް ޕޯސްޓް ލިމިޓެޑް ހަމަޖައްސައި، އެކަމުގެ އެއްބަސްވުމުގައި ސޮއިކޮށްފިއެވެ.
ޕީއެސްއެމްގައި ބޭއްވި ޚާއްޞަ ރަސްމިއްޔާތެއްގައި، މި އެއްބަސްވުމުގައި ޕީއެސްއެމްގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ އަޙްމަދު ޝަކީބެވެ. މޯލްޑިވްސް ޕޯސްޓްގެ ފަރާތުން ސޮއިކުރެއްވީ އެ ކުންފުނީގެ ޑެޕިއުޓީ މެނޭޖިންގ ޑިރެކްޓަރ ޝަހީދު އިބްރާހިމެވެ.
މި ރަސްމިއްޔާތުގައި ކަވަރޭޖުގެ ކޯ-ސްޕޮންސަރުންގެ ގޮތުގައި ދެ ކުންފުންޏަކާއެކު ވަނީ ސޮއިކޮށްފައެވެ. އެއީ އެލައިޑް އިންޝުއަރެންސާއި މޯލްޑިވްސް ޕޯޓްސް ލިމިޓެޑް (އެމްޕީއެލް) އެވެ. އެލައިޑްގެ ފަރާތުން ޗީފް އަންޑަރައިޓިންގ އޮފިސަރ އުދުލިއާނާ ރުސެއީ ސޮއިކުރެއްވިއިރު، އެމްޕީއެލްގެ ފަރާތުން ސޮއިކުރެއްވީ ސީއީއޯ ކެޕްޓަން ޙުސެއިން ޝަފީޤެވެ.
މީގެ އިތުރުން، ކަވަރޭޖް ޕާޓްނަރުންގެ ގޮތުގައި ފަސް ފަރާތަކާއެކު ވަނީ އެއްބަސްވުމުގައި ސޮއިކޮށްފައެވެ. އެ ފަރާތްތަކަކީ:
- ވިލާ ކޮލެޖް: ސޮއިކުރެއްވީ ވައިސް ރެކްޓަރ ޑރ. އަލީ ނަޖީބް.
- އެމްޓީސީސީ: ސޮއިކުރެއްވީ ސީއޯއޯ ސިނާން އަލީ.
- އައިލެންޑް ޕާފިއުމްސް: ސޮއިކުރެއްވީ ޑިރެކްޓަރ އަބްދުﷲ ޝަބީން.
- އީޒެޕް: ސޮއިކުރެއްވީ ސީއީއޯ އަދި ސީއެފްއޯ އަބްދުﷲ މިއުވާން ޝަރީފް.
- ޕްރޮކްސީ: ސޮއިކުރެއްވީ މާކެޓިންގ ކޮންސަލްޓަންޓް އަޝީރު އަބްދުލް އަޒީޒް.
ޕީއެސްއެމްގެ ވޯލްޑް ކަޕް ކަވަރޭޖް ރަސްމީކޮށް ލޯންޗުކޮށްފައިވަނީ މިދިޔަ މެއި މަހުގެ 18 ވަނަ ދުވަހުއެވެ. މިއީ ރާއްޖޭގެ ތާރީޚުގައި ވެސް ”މުޅިން ހިލޭ“ ދިވެހިންނަށް ވޯލްޑް ކަޕް ބަލާލެވޭނެ ފުރަތަމަ ފަހަރެވެ. މީޑިއާނެޓާއި ޕީއެސްއެމް ގުޅިގެން ގެނެސްދޭ މި ކަވަރޭޖް، މީޑިއާނެޓްގެ ކަނެކްޝަން އޮންނަ ކޮންމެ ފަރާތަކަށް ވެސް އެއްވެސް އިތުރު ޗާޖަކާ ނުލައި ޕީއެސްއެމްގެ ޗެނަލްތަކުން ފެންނާނެއެވެ.
އެމެރިކާ، މެކްސިކޯ އަދި ކެނެޑާގައި 48 ގައުމާއެކު ބާއްވާ މިފަހަރުގެ ވޯލްޑް ކަޕަކީ މިހާތަނަށް ބާއްވާ އެންމެ ފޯރިގަދަ މުބާރާތަށް ވެގެންދާނެއެވެ. ޕީއެސްއެމްގެ އަމާޒަކީ މި ތިން ގައުމުގެ ދަނޑުތަކުގެ ފޯރި، ރާއްޖޭގެ ގޭގޭގެ ސިޓިންގ ރޫމްތަކާއި، ޖަގަހަތަކާއި ބޮޑު ސްކްރީންތަކާ ހަމައަށް އެންމެ ފުރިހަމައަށް ގެނެސްދިނުން ކަމަށް ޕީއެސްއެމުން ބުނެއެވެ.
