މިދިޔަ އާދިއްތަ ދުވަހު އައްޑޫ ސިޓީގައި ހިނގި ނުރައްކާތެރި އެކްސިޑެންޓްގައި އަނިޔާވި މީހާއަށް ފަރުވާ ދެމުން އަންނަނިކޮށް ނިޔާވެއްޖެއެވެ.
އައްޑޫ ސިޓީ ބޮޑުމަގުގައި ހިނގި މި އެކްސިޑެންޓްގައި ހާލު ސީރިއަސްވެގެން އައިސީޔޫގައި ފަރުވާދެމުން ދިޔައީ ސ. ހިތަދޫ / ޖަބްރާނުގެ، ރަމީޒް ޢަބްދުﷲއެވެ. ހާލު ސީރިއަސްވުމުގެ ސަބަބުން އޭނާއަށް އެންމެ ފުރަތަމަ ފަރުވާ ދީފައިވަނީ އައްޑޫ އިކުއެޓޯރިއަލް ހޮސްޕިޓަލުގައެވެ.
އެއަށްފަހު އިތުރު ފަރުވާއަށް މާލެ ގެނެސް ރަމީޒަށް ވަނީ އޭޑީކޭ ހޮސްޕިޓަލުގައި ފަރުވާދޭން ފަށައިފައެވެ. އޭނާއަށް ފަަރުވާދީފައިވަނީ އައިސީޔޫގައި ބާއްވައިގެންނެވެ. ރަމީޒް އާއިލާގެ ފަރާތުން ބުނެފައިވާ ގޮތުގައި، މި އެކްސިޑެންޓްގައި އޭނާއަށް ލިބިފައިވަނީ ފުރާނައަށް ގެއްލުން ވާވަރުގެ އަނިޔާތަކެކެވެ.
ވިޑިއޯތަކުން ފެންނަ ގޮތުގައި މި އެކްސިޑެންޓް ހިނގުމަށް މެދުވެރިވީ ބާރު ދުވެލީގައި ނުގައިވާއިދުން ދުއްވާފައިދިޔަ ސައިކަލެއްގައި ރަމީޒު ދުއްވަމުން ދިޔަ ސައިކަލު ޖެހިގެންނެވެ.
