ނިމިދިޔަ އެމްޑީޕީގެ ސަރުކާރު އޮތްއިރު، އޭރުގެ އިދިކޮޅު ފަރާތްތަކަށްވުރެ ބޮޑަށް ސަރުކާރާ ދެކޮޅަށް މަސައްކަތްކޮށް، ސަރުކާރު ފަޟީޙަތްކުރުމުގެ މަސައްކަތް ކުރީ އެމްޑީޕީގެ ތެރޭގައި ތިއްބެވި މެންބަރުން ކަމަށް ކުރީގެ ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިހު ވިދާޅުވެއްޖެއެވެ.
ރައީސް ސޯލިހު މިހެން ވިދާޅުވީ، އެމްޑީޕީގެ ޗެއާޕާސަން ކަމަށް ވާދަކުރައްވާ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް ނަސީމްގެ ކެމްޕޭން ހަރަކާތެއްގައި ބައިވެރިވެވަޑައިގެން ދެއްކެވި ވާހަކަފުޅުގައެވެ.
އެމަނިކުފާނުގެ ވެރިކަމުގެ ދުވަސްވަރު ކުރިމަތިވި ސިޔާސީ ގޮންޖެހުންތަކަށް އަލިއަޅުއްވާލައްވަމުން ރައީސް ސޯލިހު ވިދާޅުވީ، މަޖިލިސް ތެރޭގައި ވަރަށް ހަޑިހުތުރުކޮށް ސަރުކާރަށާއި އެމަނިކުފާނަށް ނިސްބަތްކޮށް ވާހަކަ ދައްކަވަން ފެށީ އޭރު އެމްޑީޕީގައި ތިއްބެވި މެންބަރުން ކަމަށެވެ.
”މަޖިލިސް ތެރޭގައި ވަރަށް ހަޑިހުތުރުކޮށް ސަރުކާރަށާއި އަޅުގަނޑަށް ނިސްބަތްކޮށް އަޅުގަނޑުމެންގެ މެންބަރުން (އޭރުގެ އެމްޑީޕީ މެމްބަރުން) ވާހަކަ ދައްކަވަން ފެށީ. ވަގަށް ވެސް ގޮވަނީ، ހަޑި ހުތުރު އެއްޗެހިވެސް ގޮވަނީ. ސަރުކާރުން ރައްޔިތުންނަށް ކަމެއް ނުކޮށްދެއޭވެސް ގޮވަނީ،“ ރައީސް ސޯލިހު ވިދާޅުވިއެވެ.
ރައީސް ސޯލިހު އިތުރަށް ވިދާޅުވީ، ޙަޤީޤަތުގައި އޭރު އޮތް އިދިކޮޅު ފަރާތްތަކަށް ވުރެ ބޮޑަށް ސަރުކާރު ފަޟީޙަތްކޮށް، ރައްޔިތުންގެ ކުރިމަތީގައި ސަރުކާރުގެ އަގު ވައްޓާލުމަށްޓަކައި މަސައްކަތް ކުރަމުން ގެންދިޔައީ އެމްޑީޕީގެ ތެރޭގައި ތިބި ބަޔަކު ކަމަށެވެ. އެމަނިކުފާނު ވެރިކަމުގެ މަސައްކަތްތައް ފަށައިގަންނަން ޖެހުނީ އެފަދަ ބޮޑެތި ދަތިތަކަކާ އެކު ކަމަށާއި، އެއީ އެއްގޮތަކަށްވެސް އުއްމީދު ކުރެއްވި ކަމެއް ނޫން ކަމަށްވެސް ރައީސް ސޯލިހު ފާހަގަކުރެއްވިއެވެ.
“މަޖިލިސް ތެރޭގައި ވަރަށް ހަޑިކޮށް ސަރުކާރަށާއި އަޅުގަނޑަށް ނިސްބަތްކޮށް އޭރުގެ އެމް ޑީޕީ މެމްބަރުން ވާހަކަ ދައްކަވަން ފެށީ. ވަގަށް ވެސް ގޮވަނީ، ހަޑި ހުތުރު އެއްޗިސް ވެސް ގޮވަނީ. އެ ދަތީގައި އަޅުގަނޑު މަސައްކަތް ފަށައިގަތީ. އެއީ އަޅުގަނޑު އުއްމީދު ކުރި ކަމެއް ނޫން” ރައީސް އިބޫ… pic.twitter.com/U86pel2O6F
— Mauroof-TEAM (@MateyZakir) June 8, 2026
މި ވާހަކަފުޅުގައި ރައީސް ސޯލިހު އިޝާރާތް ކުރެއްވީ އޭރުގެ އެމްޑީޕީގެ ތެރޭގައި އުފެދުނު ބައިބައިވުންތަކާއި، އޭގެ ސަބަބުން ސަރުކާރު ހިންގުމަށް ކުރިމަތިވި ހުރަސްތަކަށެވެ. މީކާއިލް ނަސީމްގެ ކެމްޕޭން ހަރަކާތުގައި ދެއްކެވި މި ވާހަކަފުޅަކީ ކުރީގެ ސަރުކާރުގެ ދުވަސްވަރު އެ ޕާޓީގެ އެތެރޭގައި ހިނގާދިޔަ ސިޔާސީ ކަންތައްތަކާ ގުޅޭގޮތުން އެމަނިކުފާނު މިހާތަނަށް އެންމެ ފާޅުކަން ބޮޑުކޮށް ދެއްކެވި ވާހަކަފުޅެވެ.
