ފިނޭންސް މިނިސްޓަރުކަމުގެ މަގާމުގައި ހުންނެވި މޫސާ ޒަމީރު އެ މަގާމުން މިއަދު އިސްތިއުފާ ދެއްވީ އަމިއްލައަށް އެކަމަށް އެދިގެންކަން ”އެކި އެމްވީ“ އަށް އެނގިއްޖެއެވެ.
ޒަމީރު މިއަދު އިސްތިއުފާ ދެއްވިއިރު، ބައެއް މީޑިއާތަކުން ދަނީ އެކި ގޮތްގޮތަށް ވާހަކަ ފަތުރަމުންނެވެ. އެގޮތުން ޒަމީރު އިސްތިއުފާ ދެއްވީ ރައީސް ޑރ. މުހައްމަދު މުއިއްޒު އަންގަވައިގެން ކަމާއި އެއީ ނިމިދިޔަ ބައި-އިލެކްޝަނުން ލިބުނު ނާކާމިޔާބީއާ ގުޅިގެން ނިންމި ނިންމުމެއް ކަމުގެ އަޑުތައްވެސް ވަނީ ފެތުރިފައެވެ.
ނަމަވެސް އިތުބާރު ހިފޭ މަސްދަރަކުން ”އެކި އެމްވީ“ އަށް މައުލޫމާތު ދިން ގޮތުގައި ޒަމީރު އިސްތިއުފާ ދެއްވީ ސިއްހީ ސަބަބުތަކާހުރެ އަމިއްލައަށް 2 ފަހަރެއްގެ މަތިން އެދިގެންނެވެ.
އެނގިފައިވާ ގޮތުގައި ޒަމީރުގެ އިސްތިއުފާ ސިޓީގައިވެސް ބަލި ހާލަތުގެ ވާހަަކަ ބަޔާންކޮށްފައިވެއެވެ.
މީގެ ކުރިން ވެސް މިނިސްޓަރު ޒަމީރު މަގާމުން އިސްތިއުފާ ދެއްވަން އުޅޭކަމުގެ ވާހަކަތަކެއް ވަނީ ފެންމަތިވެފައެވެ. ނަމަވެސް ސަރުކާރުން ވަނީ އޭރު އެކަން ދޮގުކޮށްފައެވެ.
މި ސަރުކާރު ވެރިކަމަށް އައިސް، އެންމެ ފުރަތަމަ ކެބިނެޓް އެކުލަވާލިއިރު، ޒަމީރު ހުންނެވީ ފޮރިން މިނިސްޓަރަކަށެވެ. ޒަމީރު މާލީ ފިނޭންސަށް އައްޔަން ކުރެއްވީ މިދިޔަ އަހަރުގެ ޑިސެމްބަރު މަސް ތެރޭގައެވެ.
