މައުލޫމާތު ލިބިގަތުމުގެ ހައްގަކީ ޑިމޮކްރެޓިކް ވެރިކަމުގެ ނިޒާމުގެ އެންމެ މުހިންމު އެއް ބިންގާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ސަރުކާރުން އިއްޔެ ވަނީ ރައީސް އޮފީހާއި ހުރިހާ މިނިސްޓްރީއެއްގެ އާރްޓީއައިތަކަށް ޖަވާބު ދީފައެވެ.
ރައީސް މުއިއްޒު އެކްސްގައި މިއަދު ކުރެއްވި ޕޯސްޓެއްގައި ވިދާޅުވީ 2014 ވަނަ އަހަރު މައުލޫމާތު ހޯދައި ލިބިގަތުމުގެ ހައްގުގެ ގާނޫނަށް އަމަލުކުރަން ފެށި ފަހުން، މިއީ ރައީސް އޮފީހާއި ހުރިހާ ވުޒާރާތަކަކުން 100 ޕަސަންޓު އާރްޓީއައިތަކަށް ޖަވާބު ދިން ފުރަތަމަ ފަހަރު ކަމަށެވެ.
ރައީސް ވިދާޅުވީ މީގެ ކުރިން އާންމުންނަށް ލިބެން ނެތް އެތައް މައުލޫމާތެއް މިހާރު ހާމަކޮށްފައިވާ ކަމަށެވެ.
ރައީސް ވިދާޅުވީ، މި ސަރުކާރުން ގަބޫލުކުރާ ގޮތުގައި މައުލޫމާތު ލިބިގަތުމުގެ އަސާސީ ހައްގަކީ ރައްޔިތުންގެ އިތުބާރާއި ޑިމޮކްރެޓިކް ވެރިކަމުގެ ނިޒާމުގެ އެންމެ މުހިންމު އެއް ބިންގާ ކަމަށެވެ. އަދި މިއީ ދެފުށް ފެންނަ ގޮތަށް ކަންކަން ކުރުން ކުރިއެރުވުމަށާއި ރައްޔިތުންނަށް މައުލޫމާތު ލިބޭނެ މަގުތައް ހަރުދަނާކުރުމުގެ އިތުރުން، ޖަވާބުދާރީވުން އިތުރުކުރުމަށް އެޅުނު ވަރަށް މުހިންމު ފިޔަވަޅެއް ކަމަށްވެސް އެ މަނިކުފާނު ވިދާޅުވިއެވެ.
Since the enactment of the RTI Act in 2014, this marks the first time in the history of the Maldives that the President’s Office and all Ministries have achieved 100% compliance with proactive disclosure requirements. Information that had not previously been accessible to the… https://t.co/ILyqSFAk9p
— Dr Mohamed Muizzu (@MMuizzu) June 8, 2026
ރައީސް ވަނީ ކުރިމަގުގެ ޖަވާބުދާރީވަނިވި ސަރުކާރެއް ބިނާކުރުމަށް ކުރަމުންދާ ދަތުރުގައި މި މުހިންމު ލަނޑުދަނޑި ހާސިލުކުރުމަށް މަސައްކަތްކޮށްދެއްވި ހުރިހާ މުއައްސަސާތަކަށާއި ދައުލަތުގެ މުވައްޒަފުންނަށް ޝުކުރު އަދާކުރައްވައިފައެވެ.
ރައީސް އިތުރަށް ވިދާޅުވީ ސަރުކާރުގެ ހަރަކާތްތަކާއި ނިންމުންތައް ނިންމުމުގައި އާންމު ރައްޔިތުންގެ ބައިވެރިވުން މިހާރަށްވުރެ ފުޅާކުރުމަށް އަމާޒު ހިފާފައިވާ ކަމަށެވެ.
