ރައްޔިތުންގެ މަޖިލީހުގެ އައްޑޫ ސިޓީ، ހިތަދޫ އުތުރު ދާއިރާގެ ބައި-އިލެކްޝަނުގައި އެ ދާއިރާގެ ރައްޔިތުން ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ކުރެއްވި ތާއީދަށްޓަކައި އެ ޕާޓީން އިޚްލާޞްތެރިކަމާއެކު ޝުކުރު އަދާކޮށްފިއެވެ.
ޕީއެންސީން ނެރުނު ނޫސްބަޔާނެއްގައި ބުނެފައިވަނީ، މިއަދު ކުރިއަށްދިޔަ މި އިންތިޚާބުގައި އެ ޕާޓީގެ ކެންޑިޑޭޓް އަޙްމަދު ސަޢީދަށް ގިނަ އަދަދެއްގެ ރައްޔިތުން ވޯޓު ދެއްވައި، ޕާޓީއަށް އޮތް ތާއީދު ދައްކުވައިދެއްވުމަކީ ލިބުނު ވަރަށް ބޮޑު ހިތްހަމަޖެހުމެއް ކަމަށެވެ.
މި އިންތިޚާބުގެ ނަތީޖާއަށް ބަލާއިރު، ހިތަދޫގައި ބެހެއްޓި ފަސް ވޯޓު ފޮށީގެ ތެރެއިން ތިން ފޮށްޓެއްގެ އަޣުލަބިއްޔަތު އަޙްމަދު ސަޢީދު ވަނީ ހޯއްދަވާފައެވެ. އަދި މާލޭގައި ބެހެއްޓި ދެ ފޮށީގެ ތެރެއިން އެއް ފޮށީގެ އަޣުލަބިއްޔަތުވެސް ލިބިވަޑައިގަތީ އޭނާއަށެވެ. މީގެ އިތުރުން، ހިތަދޫގައި ބެހެއްޓި ވޯޓު ފޮށިތަކުގެ ޖުމްލަ އަޣުލަބިއްޔަތުވެސް ކާމިޔާބު ކުރެއްވީ ޕީއެންސީގެ ކެންޑިޑޭޓެވެ.
ޕީއެންސީން ފާހަގަކުރި ގޮތުގައި، މިއީ އިދިކޮޅު ހުރިހާ ޕާޓީތަކެއް ގުޅިގެން މަސައްކަތް ކުރަމުންދިޔަ ދަނޑިވަޅެއްގައި، އިތުރު އެހެން ޕާޓީއެއްގެ ވާގިވެރިކަމެއް ނެތި ޕީއެންސީން ހޯދި ފާހަގަކޮށްލެވޭ ކާމިޔާބީއެކެވެ.
މި ބައި-އިލެކްޝަނަށް ތައްޔާރުވުމުގައި ކެންޑިޑޭޓް އަޙްމަދު ސަޢީދާއި، އޭނާގެ ކެމްޕެއިން ޓީމުތަކުން ކުރެއްވި ބުރަ މަސައްކަތުގެ އަގު ވަޒަންކޮށް، ޕާޓީގެ ފަރާތުން ވަނީ ހުރިހާ ބޭފުޅުންނަށް ޝުކުރު އަދާކޮށްފައެވެ. ހަމައެއާއެކު، ޕާޓީގެ ލީޑަރޝިޕާއި އެކި މަޤާމުތަކުގައި ތިއްބެވި ބޭފުޅުން ކެންޑިޑޭޓަށް ތާއީދު ހޯއްދަވައިދެއްވުމަށް ކުރެއްވި މަސައްކަތް ފާހަގަކޮށް، އެ ބޭފުޅުންނަށްވެސް ޕީއެންސީން ވަނީ ޝުކުރު ދަންނަވާފައެވެ.
އިލެކްޝަންސް ކޮމިޝަނުގެ ވަގުތީ ނަތީޖާ ދައްކާގޮތުން، މި އިންތިޚާބުގައި ބެހެއްޓި ޖުމްލަ 7 ވޯޓު ފޮށީގެ ތެރެއިން 4 ފޮށި ކާމިޔާބު ކުރެއްވީ ޕީއެންސީގެ ކެނޑިޑޭޓް އަހުމަދު ސައީދު (ސޮޑާ) އެވެ. ޚާއްޞަކޮށް އައްޑޫ ސިޓީގައި ބެހެއްޓުނު ފޮށިތަކުން ސައީދު ވަނީ ބޮޑު ތަރުހީބެއް ހޯއްދަވައި، އެ ފޮށިތަކުން ކުރި ހޯއްދަވާފައެވެ. މި އިންތިޚާބު އިދިކޮޅު އެމްޑީޕީގެ ކެނޑިޑޭޓް އަބްދުﷲ ސޯދިގު (ސޯބެ) ކާމިޔާބު ކުރެއްވި ނަމަވެސް، އޭނާއަށް ކުރި ލިބިވަޑައިގަތީ އެންމެ 62 ވޯޓުގެ ކުޑަ ތަފާތަކުންނެވެ. ސޯބެ އިންތިޚާބު ކާމިޔާބު ކުރެއްވުމުގައި މާލޭގައި ބެހެއްޓި ފޮށިތަކުން ލިބުނު ވޯޓު ބޮޑު ދައުރެއް އަދާކުރިއެވެ.
