މިއަދު ބޭއްވުނު ރައްޔިތުންގެ މަޖިލީހުގެ އައްޑޫސިޓީ ހިތަދޫ އުތުރު ދާއިރާގެ ބައި-އިލެކްޝަންގައި، ވޯޓު ފޮށިތަކުގެ އަދަދަށް ބަލާއިރު ސަރުކާރު ހިންގާ ޕީޕަލްސް ނެޝަނަލް ކޮންގްރެސް (ޕީއެންސީ) އިން ބޮޑު ކުރިއެރުމެއް ހޯދިނަމަވެސް ކުޑަ ތަފާތަކުން އިންތިޚާބު ކާމިޔާބު ކުރީ އެމްޑީޕީ ކެންޑިޑޭޓެވެ.
އިލެކްޝަންސް ކޮމިޝަނުގެ ވަގުތީ ނަތީޖާ ދައްކާގޮތުން، މި އިންތިޚާބުގައި ބެހެއްޓި ޖުމްލަ 7 ވޯޓު ފޮށީގެ ތެރެއިން 4 ފޮށި ކާމިޔާބު ކުރެއްވީ ޕީއެންސީގެ ކެނޑިޑޭޓް އަހުމަދު ސައީދު (ސޮޑާ) އެވެ. ޚާއްޞަކޮށް އައްޑޫ ސިޓީގައި ބެހެއްޓުނު ފޮށިތަކުން ސައީދު ވަނީ ބޮޑު ތަރުހީބެއް ހޯއްދަވައި، އެ ފޮށިތަކުން ކުރި ހޯއްދަވާފައެވެ.
މި އިންތިޚާބު އިދިކޮޅު އެމްޑީޕީގެ ކެނޑިޑޭޓް އަބްދުﷲ ސޯދިގު (ސޯބެ) ކާމިޔާބު ކުރެއްވި ނަމަވެސް، އޭނާއަށް ކުރި ލިބިވަޑައިގަތީ އެންމެ 62 ވޯޓުގެ ކުޑަ ތަފާތަކުންނެވެ. ސޯބެ އިންތިޚާބު ކާމިޔާބު ކުރެއްވުމުގައި މާލޭގައި ބެހެއްޓި ފޮށިތަކުން ލިބުނު ވޯޓު ބޮޑު ދައުރެއް އަދާކުރިއެވެ.
މިއަދު ހެނދުނުން ފެށިގެން ހަވީރުގެ ނިޔަލަށް ކުރިއަށްދިޔަ މި ވޯޓުލުމުގައި ޖުމްލަ 2,563 މީހުން ވޯޓުލާފައިވެއެވެ. މީގެ ތެރޭގައި ހިމެނެނީ 1,370 އަންހެނުންނާއި 1,193 ފިރިހެނުންނެވެ.
މި ދާއިރާގެ ބައި-އިލެކްޝަނެއް ބާއްވަން ޖެހުނީ ކުރިން މި ގޮނޑި ފުރުއްވި މުހައްމަދު ސިނާންގެ މައްޗަށް ސާބިތު ދަރަންޏެއް އޮތް ކަމަށް ސުޕްރީމް ކޯޓުން ކަނޑައަޅައި، އޭނާގެ މެންބަރުކަމުގެ ގޮނޑި ގެއްލުމާ ގުޅިގެންނެވެ.
ޕީއެންސީން މި އިންތިޚާބުގައި ދެއްކި ވަރުގަދަ ނަތީޖާއާއެކު، އައްޑޫ ސިޓީގެ މެޖޯރިޓީ ފޮށިތައް އެ ޕާޓީން ވަނީ ކާމިޔާބުކޮށް، ދާއިރާގައި އެ ޕާޓީގެ ތަރުހީބު އިތުރުވަމުންދާކަން ސާބިތުކޮށްދީފައެވެ.
