ހޯރްމުޒް ކަނޑުއޮޅީގައި އުފެދިފައިވާ އަސްކަރީ ހަމަނުޖެހުންތައް އިތުރަށް ގޯސްވެ، އެމެރިކާއާއި އީރާނާ ދެމެދު ސީދާ ޙަމަލާތަކެއް ބަދަލުކުރަން ފަށައިފިއެވެ. ހޮނިހިރު ދުވަހު އެމެރިކާގެ ސެންޓްރަލް ކޮމާންޑުން ވަނީ އީރާނުގެ އައްސޭރިފަށުގައި ހުރި ރާޑަރު މަރުކަޒުތަކަކަށް ބޮންއަޅާފައެވެ. މީގެ ރައްދުގައި އީރާނުން ވަނީ އެމެރިކާގެ އަސްކަރީ މަރުކަޒުތައް ހުރި ކުވެއިތާއި ބަޙްރައިނަށް އަމާޒުކޮށް ބެލިސްޓިކް މިސައިލް ޙަމަލާތަކެއް ދީފައެވެ.
ޑްރޯންތައް ވައްޓާލުން: މި ހަމަނުޖެހުން ފެށުނީ، އީރާނުން ހޯރްމުޒް ކަނޑުއޮޅިއަށް ފޮނުވާލި 4 ކަމިކާޒޭ ޑްރޯން އެމެރިކާ ސިފައިން ވައްޓާލުމާ ގުޅިގެންނެވެ. އެމެރިކާއިން ބުނީ މި ޑްރޯންތަކަކީ ކަނޑުބޯޓުފަހަރަށް އޮތް ބޮޑު ނުރައްކަލެއް ކަމަށެވެ.
ރާޑަރުތަކަށް ބޮންއެޅުން: ޑްރޯން ޙަމަލާގެ ރައްދުގައި އެމެރިކާއިން ވަނީ އީރާނުގެ ގޮރުކް ސިޓީއާއި ޤޭޝްމް އައިލެންޑްގައި ހުރި އީރާނުގެ ރާޑަރު މަރުކަޒުތަކަށް ބޮންއަޅައި ހަލާކުކޮށްލާފައެވެ.
އީރާނުގެ މިސައިލް ޙަމަލާތައް: އެމެރިކާގެ ޙަމަލާއާ ގުޅިގެން، އީރާނުގެ ރިވޮލިއުޝަނަރީ ގާޑްސް އިން ވަނީ ކުވެއިތާއި ބަޙްރައިނުގައި ހުރި އެމެރިކާގެ އަސްކަރީ ބޭސްތަކަށް އަމާޒުކޮށް 7 ބެލިސްޓިކް މިސައިލް ފޮނުވާލާފައެވެ. މީގެ ތެރެއިން 6 މިސައިލް ވައިގެ ތެރޭގައި ގޮއްވާލި ނަމަވެސް، ބަޙްރައިނުގައި ވަނީ ނުރައްކާތެރިކަމުގެ ސައިރަން އަޅާފައެވެ. އީރާނުން ވަނީ ހުއްދަނެތި ކަނޑުއޮޅި ހުރަސްކުރަން އުޅުނު 4 ތެޔޮ ޓޭންކަރަކަށްވެސް ޙަމަލާދީފައެވެ.
ޓްރަމްޕްގެ ބަސް: އެމެރިކާގެ ރައީސް ޑޮނަލްޑް ޓްރަމްޕް ބުނީ، އެމެރިކާއިން ދިން ޙަމަލާތަކުގެ ސަބަބުން އީރާނުގެ އަތުގައި މިހާރު ހުރީ އެމީހުންގެ މިސައިލްތަކުގެ އެންމެ ”%21 ނުވަތަ %22“ ކަމަށެވެ.
ސިޔާސީ ދިރާސާކުރާ ފަރާތްތަކުން ބުނާގޮތުގައި، މި ޙަމަލާތަކުން އެންމެ ބޮޑަށް ހާމަވަނީ ހުޅަނގުގެ ބާރުތަކުގެ ދެފުށްކެހެރިކަމެވެ. އެމެރިކާއިން އީރާނުގެ ސިޔާދަތީ ބިމަށް ބޮންއެޅުމުން އެއީ ”ދުނިޔޭގެ ވިޔަފާރި ހިމާޔަތްކުރުން“ ކަމަށް ބުނެ ހުޅަނގުން ތަޢުރީފުކުރެއެވެ. ނަމަވެސް އީރާނުން އަމިއްލަ ދިފާޢުގައި އެމެރިކާގެ ބޭސްތަކަށް ރައްދު ޙަމަލާ ދިނުމުން އެއީ ”ހޮސްޓައިލް“ ނުވަތަ ނުރައްކާތެރި ސަރަޙައްދީ ޢުދުވާނެއް ކަމަށް ސިފަކުރެއެވެ.
