ކުރީގެ ރައީސް މުޙައްމަދު ނަޝީދަކީ އަދިވެސް ޒުވާން ޖޯޝެއްގައި ހުންނެވި ބޭފުޅެއް ކަމަށާއި، އެމަނިކުފާނު އުމުރުން ދުވަސްވަމުން އަންނަތަން ފެނިވަޑައިނުގަންނަވާ ކަމަށް ހުޅުމާލެ އުތުރު ދާއިރާގެ ކައުންސިލަރު ޒަހިއްޔާ ވިދާޅުވެއްޖެއެވެ.
ޒަހިއްޔާ މިހެން ވިދާޅުވީ ރޭ އެމްޑީޕީގެ ރައީސް ނަޝީދުގެ ފެކްޝަނުން ހުޅުމާލޭގައި ބޭއްވި ޖަލްސާއެއްގައި ވާހަކަދައްކަވަމުންނެވެ. އޭނާ ވިދާޅުވީ ރައީސް ނަޝީދަކީ ފަހަތުން ދުވެގެން އަތުލެވޭނެ ގޮތަށް އުފެދިފައި ހުރި އިންސާނެއް ނޫން ކަމަށާއި، އެމަނިކުފާނު ދެން ހިފަހައްޓައި ނުލެވޭނެ ކަމަށެވެ. ”ނިކަން މޮޅިއްޔާ މި މީހާ އަތުލަބަލަ،“ ޒަހިއްޔާ ވިދާޅުވިއެވެ.
ރޭގެ ޖަލްސާގައި ޒަހިއްޔާ ވިދާޅުވީ، އެ ޖަލްސާއިން ފެނިގެންދަނީ އެމްޑީޕީގެ އަސްލު ވިންދު ކަމަށެވެ. އަދި އެމްޑީޕީއަކީ އަބަދުވެސް ޖޯޝާއި އުންމީދާއި މުސްތަގުބަލުގެ ޕާޓީކަން ފާހަގަކުރައްވަމުން އޭނާ ވިދާޅުވީ، މިއީ ގެއްލުނުތަން ހޯދައި ޕާޓީގެ ވިންދު އަނބުރާ ގެނައުމަށް ދިއްލާލި އަލިގަދަ ދަންމަރެއް ކަމަށެވެ.
ޒުވާނުން އިސްވުމާ ގުޅޭގޮތުން ވާދަވެރިން ދައްކާ ވާހަކަތަކަށް ރައްދު ދެއްވަމުން ޒަހިއްޔާ ވިދާޅުވީ، ލީޑަރުކަމަކީ އުފަންދުވަހުގެ ސެޓްފިކެޓުގައި އޮންނަ އެއްޗެއް ނޫން ކަމަށެވެ.
”ލީޑަރު ކަމަކީ ކުރެވޭ ހިތްވަރަކާ ވަކި ކަހަލަ ކޮލިޓީއެއް. ރައީސް ނަޝީދަކީ ޒުވާންދުވަސްވަރު ވަކި މީހެއްގެ ހުއްދައަކަށް ބެލުމެއްނެތި ދިވެހިންނަށްޓަކާ ޖާނާ މާލުން ގުރުބާންވެ ވަޑައިގެންނެވި، މިނިވަންކަމުގެ މި މާހައުލު އަޅުގަނޑުމެންނަށް ހޯދައިދެއްވި އޭރުގެ ޒުވާން ލީޑަރު،“ ޒަހިއްޔާ ވިދާޅުވިއެވެ.
ޒަހިއްޔާ އިތުރަށް ވިދާޅުވީ ރައީސް ނަޝީދަކީ ކޮންމެ ކަމެއް ބަދަލުކޮށްލުމުގެ ޒުވާން ހިތްވަރާއި ޖޯޝު ހުރި ބޭފުޅެއް ކަމަށެވެ. އެހެންކަމުން، ނަޝީދަކީ އަދިވެސް ޒުވާނެއް ކަމަށާއި، އުމުރުން ދުވަސްވަމުން އަންނަ މަންޒަރު ނަޝީދުގެ ކިބައިން ނުފެންނަ ކަމަށްވެސް ޒަހިއްޔާގެ ވާހަކައިގަ ފާހަގަކުރެއްވިއެވެ. މިއާއިއެކު އެއްވެސް ތިބި އެންމެންގެ ހުނުމުގެ އަޑުން ސަރަޙައްދު ގުގުމާލިއެވެ.
އެއީ ނަޝީދުއަކީ މިހާރު 60 އަހަރުގެ މީހަކަށް ވެފައި އެމްޑީޕީ ޗެއާޕާސަން އިންތިޚާބުގައި އޭނާއާއި ވާދަކުރައްވަން ނުކުންނެވީ އުމުރުން 32 އަހަރުގެ މީކާއިލް ކަމުން ގިނަބަޔަކަށް ޒަހިއްޔާގެ މި ވާހަކަތައް ޖޯކަކަށްވީކަމަށް ބެލެވެއެވެ.
