ޙައްޖުގެ އަޅުކަން ނިންމުމަށްފަހު އެނބުރި ރާއްޖެ އަންނަ ޙައްޖުވެރިންނަށް ދަތުރުފަތުރުގެ ކަންކަން ލުއިފަސޭހަކޮށްދިނުމުގެ ގޮތުން އެމްޓީސީސީ ”މާލެ ޓެކްސީ ލައިން“ އިން ޚާއްޞަ އިންތިޒާމުތަކެއް ހަމަޖައްސައިފިއެވެ.
އެމްޓީސީސީން މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) އާ ގުޅިގެން ކުރިއަށްގެންދާ މި ޚިދުމަތުގެ މަޤްޞަދަކީ، ދިގު ދަތުރަކަށްފަހު އެނބުރި އަންނަ ޙައްޖުވެރިންނަށް އެއާޕޯޓުން ފެށިގެން އެމީހުންގެ މަންޒިލާ ހަމައަށް އެއްވެސް ތަކްލީފެއް ނެތި ދެވޭނެ މަގު ފަހިކޮށްދިނުން ކަމަށް ބުނެފައިވެއެވެ. މާލެ ޓެކްސީ ލައިންގެ ދަށުން ޙައްޖުވެރިންނަށް ޚާއްޞަ އިސްކަމެއް ދީގެން ޓެކްސީގެ ޚިދުމަތް ފޯރުކޮށްދިނުމަށް ވަނީ ރޭވިފައެވެ.
https://twittter.com/MTCCPlc/status/2062947542875431376
މިކަމާ ގުޅޭގޮތުން އެމްޓީސީސީން ބުނީ، މާތްވެގެންވާ ޙައްޖުގެ އަޅުކަން އަދާކޮށްފައި އަންނަ ޙައްޖުވެރިންނަށް ޚިދުމަތް ކުރުމަކީ އެ ކުންފުންޏަށް ލިބޭ ވަރަށް ބޮޑު ޝަރަފެއް ކަމަށެވެ. އަދި މި އިންތިޒާމުގެ ސަބަބުން ޙައްޖުވެރިންނަށް އެއާޕޯޓުގައި މަޑުކުރަންޖެހޭ ވަގުތު ކުޑަވެ، އަވަސްކަމާއެކު ގެއަށް ދެވޭނެ ކަމަށް އެ ފަރާތުން އުންމީދު ކުރެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ޙައްޖުވެރިންގެ ކަންކަމަށް ޚާއްޞަ އިސްކަމެއް ދެއްވަމުން ގެންދަވާ ދަނޑިވަޅެއްގައި، މިފަދަ ލުއިފަސޭހަ އިންތިޒާމުތައް ހަމަޖެއްސުމަކީ ފާހަގަކޮށްލެވޭ ކަމެކެވެ.
