މިއަހަރުގެ ޙައްޖުގެ މަތިވެރި އަޅުކަން، ﷲ ގެ ފަޟުލުވަންތަވެރިކަމުން ކާމިޔާބުކަމާއެކު ނިމިގެން ދިއުމާ ގުޅިގެން، ދިވެހި ޙައްޖުވެރިންނަށް ދެވުނު ޚިދުމަތްތަކަށާއި އިންތިޒާމުތަކަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ތަޢުރީފު ކުރައްވައިފިއެވެ.
މިކަމާ ގުޅިގެން މިނިސްޓަރު ވިދާޅުވީ، ޙައްޖުވެރިންގެ ކަންކަން މެނޭޖް ކުރުމުގައްޔާއި ޚިދުމަތް ދިނުމުގައި ދިވެހިރާއްޖޭގެ ޙައްޖު ކޯޕަރޭޝަނުން ދައްކައިދިނީ އުފާކުރުން ޙައްޤު ނަމޫނާ ޚިދުމަތެއް ކަމަށެވެ. އަދި ދިވެހި ޙާޖީންގެ ކަންކަން ފަސޭހަަކަމާއި ފުރިހަމަކަމާއެކު ކުރިއަށް ގެންދިއުމަށް ހިތްވަރު ދެއްވައި، ވަރަށް ގާތުން އިރުޝާދާއި އެހީތެރިކަން ދެއްވަމުން ގެންދަވާތީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް މިނިސްޓަރު ޝުކުރު އަދާކުރެއްވިއެވެ. ޚާއްޞަކޮށް އިސްލާމީ ދާއިރާގެ ކަންކަމަށް ރައީސް ދެއްވާ އަހަންމިއްޔަތު މިނިސްޓަރު ފާހަގަކުރެއްވިއެވެ.
ޙައްޖުގެ މަތިވެރި އަޅުކަން، ﷲ ގެ ފަޟުލުވަންތަވެރިކަމުން ކާމިޔާބުކަމާއެކު ނިމިގެން ދިއުމާއެކު ދަންނަވާލާ ހިތްވަނީ ޙައްޖުވެރިންގެ ކަންކަން މެނޭޖް ކުރުމުގައްޔާއި ޚިދުމަތް ދިނުމުގައި ދިވެހިރާއްޖޭގެ ޙައްޖު ކޯޕަރޭޝަނުން ދައްކައި ދިނީ އެއާ މެދު އުފާކުރުން ޙައްޤު ޚިދުމަތެއްކަން. ދިވެހި… https://t.co/sttLBgcgc8
— Mohamed Shaheem Ali Saeed (@Mohamedshaheem1) June 5, 2026
މިނިސްޓަރު އިތުރަށް ވިދާޅުވީ، ދިވެހި ރައްޔިތުންނަށް ޙައްޖުގެ އަޅުކަން ފަސޭހަކަމާއެކު އަދާކުރެވޭނެ ފުރިހަމަ އިދާރީ ނިޒާމެއް ރާއްޖޭގައި ޤާއިމުވެފައިވާކަން ޙައްޖު ކޯޕަރޭޝަނުން ކަށަވަރު ކޮށްދީފައިވާ ކަމަށެވެ. އަދި ސަޢޫދީ ސަރުކާރުން ”މައްކާ ރޫޓް އިނީޝިއޭޓިވް“ ގެ ޚިދުމަތް ދިވެހިންނަށް ދެއްވުމަށް ނިންމެވި ނިންމެވުމަކީ މި ނިޒާމަށް ލިބިގެން ދިޔަ ވަރަށް ބޮޑު ފުރިހަމަކަމެއްގެ ގޮތުގައި އެމަނިކުފާނު ސިފަކުރެއްވިއެވެ.
ޙައްޖުގެ އިންތިޒާމުތައް ފުރިހަމަކުރުމަށް ކުރި މަސައްކަތުގެ އަގުވަޒަންކުރައްވައި، ޙައްޖު ކޯޕަރޭޝަންގެ މެނޭޖިން ޑިރެކްޓަރު މުޙައްމަދު ޝަކީލަށާއި، ކޯޕަރޭޝަންގެ މުވައްޒަފުންނަށާއި، ޙާޖީންގެ އެހީތެރިންގެ އިތުރުން ޞިއްޙީ ޚިދުމަތްތެރިންނަށް މިނިސްޓަރު ޝުކުރާއި ތަހުނިޔާ ދެންނެވިއެވެ. ހަމައެއާއެކު، އިސްލާމިކް މިނިސްޓްރީގެ ޙައްޖާއި ޢުމްރާ ސެކްޝަނާއި މައްކާގައި ޤާއިމުކުރި ޙައްޖު މިޝަންގެ މަސައްކަތްތައްވެސް ފާހަގަކުރެއްވިއެވެ.
ސަޢޫދީ ޢަރަބިއްޔާގެ ސަރުކާރުން ޙައްޖުގެ ކަންކަމުގައި ވެދެއްވާ މިންނެތް އެހީތެރިކަމަށްޓަކައި، ޚާދިމުލް ޙަރަމައިނިއްް ޝަރީފައިނި ރަސްގެފާނު ސަލްމާން ބިން ޢަބްދުލްޢަޒީޒް އާލު ސަޢުދުއަށާއި ވަލީ އަޙްދު މުޙައްމަދު ބިން ސަލްމާނަށް މިނިސްޓަރު ޝުކުރު އަދާކުރެއްވިއެވެ. އަދި ސަޢޫދީގެ ކަމާބެހޭ ވުޒާރާތަކުންނާއި ރައްޔިތުން ޙައްޖާޖީންނަށް ބަހައްޓާ ގާތްކަމަކީ ތާރީޚީ ކަމެއްގެ ގޮތުގައި ފާހަގަކުރެއްވިއެވެ.
މިނިސްޓަރު ޑރ. ޝަހީމް ވަނީ ރާއްޖޭގެ ރައްޔިތުންނަށް ޙައްޖާއި ޢުމްރާގެ ޚިދުމަތްތައް ދިނުމުގައި މިހާރަށްވުރެ ފުރިހަމަ ނިޒާމެއް ޤާއިމުކުރުމަށް މިނިސްޓްރީން އަބަދުވެސް މަސައްކަތް ކުރާނެ ކަމުގެ ޔަޤީންކަން ދެއްވަވާފައެވެ. ”ޙައްޖާއި ޢުމްރާ އަށް ވަޑައިގަންނަވާ ފަރާތްތަކަށް ޚިދުމަތްކުރުމަކީ އަަޅުގަނޑުމެންނަށް ލިބޭ ޝަރަފެއް،“ މިނިސްޓަރު ވިދާޅުވިއެވެ.
