ޕާޓީ ބަދަލުކުރުމުން ވ. ތިނަދޫ ކައުންސިލްގެ ރައީސް ޝުޖާއު ޢަލީ މަގާމުގެ މަސްއޫލިއްޔަތުތަކުން ވަގުތީ ގޮތުން ދުރުކުރުމަށް ލޯކަލް ގަވަމަންޓް އޮތޯރިޓީ (އެލްޖީއޭ) އިން ނިންމައިފިއެވެ.
ޝުޖާއުއަކީ މި ފަހުން މެންބަރުން ހަމަނުވެގެން އިލެކްޝަންސް ކޮމިޝަނުން އުވާލި ޕާޓީއެއް ކަމަށްވާ ދަ ޑިމޮކްރެޓްގެ ޓިކެޓްގައި ވާދަކޮށް މަގާމަށް އިންތިހާބުވެފައިވާ ފަރާތެކެވެ. ދަ ޑިމޮކްރެޓްސް އުވާލުމާއެކު އޭނާ ވަނީ އެމްޑީޕީއަށް ސޮއިކޮށްފައެވެ.
މިކަމާ ގުޅިގެން އެލްޖީއޭއިން އެ ރަށު ކައުންސިލްގެ ނައިބު ރައީސަށް ފޮނުވި ސިޓީއެއްގައި ބުނެފައިވަނީ، ޕާޓީ ބަދަލުކުރުމާ ގުޅިގެން މަގާމުގެ މަސްއޫލިއްޔަތުތަކުން އޭނާ ވަގުތީ ގޮތުން ދުރުކޮށްފައިވާ ކަމަށެވެ. އެހެންކަމުން އޭނާގެ ބަދަލުގައި މަގާމުގެ މަސްއޫލިއްޔަތުތައް ނައިބު ރައީސް އަދާކުރުމަށް އެލްޖީއޭއިން ވަނީ އެދިފައެވެ.
ޕާޓީ ބަދަލުކުރުމުގެ ސަބަބުން ގޮނޑި ގެއްލުނު ފުރަތަމަ ކައުންސިލަރަށް ޝުޖާއު ވާނެކަން ފާހަގަކޮށްލަންޖެހެއެވެ.
