ށ. މިލަންދޫ ކައުންސިލުން މިއަހަރުގެ އަޟްޙާ ޢީދު ފާހަގަކުރުމަށް ކަމަށްބުނެ 321,000 އަށްވުރެ ގިނަ ރުފިޔާ ހަރަދުކޮށްފައިވާކަން އެ ކައުންސިލުން ހާމަކޮށްފިއެވެ.
މިލަންދޫ ކައުންސިލުން އާންމުކޮށްފައިވާ ތަފާސްހިސާބުތަކަށް ބަލާއިރު، ކޮންޓްރެކްޓް އުސޫލުން އެކި ފަރާތްތަކާ ހަވާލުކޮށްގެން ކުރިއަށްގެންދިޔަ ކަންކަމަށް ޖުމްލަ 321,940 ރުފިޔާ ވަނީ ހަރަދުވެފައެވެ. ޢީދު ފާހަގަކުރުމުގެ ގޮތުން ރަށުގައި ކުރިއަށްގެންދިޔަ މުންކަރާތްތަކަށް ހަރަދުކުރި ގޮތުގެ ތަފުސީލު މިހާރު ވަނީ އާންމުކޮށްފައެވެ.
އެގޮތުން، ”އާރޯ“ ނަމަކަށް ކިޔާ ގްރޫޕާ ހަވާލުކޮށްގެން ކުރިއަށްގެންދިޔަ ކަންކަމަށް 34,499 ރުފިޔާ ހަރަދުކޮށްފައިވާއިރު، އެ ގްރޫޕުން ކުރިއަށްގެންދިޔަ ދަފިނެގުމުގެ ހަރަކާތްތަކަށް 49,451 ރުފިޔާ ވަނީ ހަރަދުކޮށްފައެވެ. މީގެ އިތުރުން، ”ހިސް ސްޓާ އިންވެސްޓްމަންޓް“ އާ ހަވާލުކޮށްގެން ބޭއްވި ވާދެމުމުގެ މުބާރާތަށް 44,500 ރުފިޔާ ހަރަދުވެފައިވާ ކަމަށް ކައުންސިލުން ބުނެއެވެ.
މިއަހަރުގެ ޢީދު ހަރަކާތްތަކުގެ ތެރެއިން މިލަންދޫ ކައުންސިލުން އެންމެ ބޮޑު ހަރަދެއް ހިނގާފައިވަނީ އާއިލީ ހަވީރަށެވެ. ”ޑީސްޓިންގްންސްޑް ސްޕޯޓްސް ގަބީލާ“ އާ ހަވާލުކޮށްގެން ބޭއްވި މި އާއިލީ ހަވީރަށް 179,990 ރުފިޔާ ހަރަދުކޮށްފައިވެއެވެ. އަދި ”ޑިވޯފް“ ކިޔާ ބަޔަކާ ހަވާލުކޮށްގެން ކުރިއަށްގެންދިޔަ ގްރެސް ޑިޒައިންގެ މަސައްކަތްތަކަށް 13,500 ރުފިޔާ ވަނީ ހަރަދުކޮށްފައެވެ.
މިއަހަރުގެ ބޮޑު އީދާ ގުޅިގެން ރާއްޖޭގެ ބައެއް އެހެން ކައުންސިލްތަކުން ވެސް ވަނީ ނަށާ ގްރޫޕްތަކާއި، ބޮޑުބެރު ގްރޫޕްތަކުގެ އިތުރުން މިއުޒިކް ބޭންޑްތައް ރަށްރަށަށް ގެންގޮސް މުންކަރާތްތަކަށް ބޮޑެތި ހަރަދުތަކެއް ކޮށްފައެވެ. މީގެ އިތުރުން މާލި ނެރުމާއި ކުލަ ޖެހުން ފަދަ، އީދު ދުވަހުގެ މަގުސަދާ އެދެވޭ ގޮތެއްގައި ނުގުޅޭ ކަންކަމަށް ވެސް ބައެއް ރަށްރަށުން ބޮޑެތި ހަރަދުތައް ކޮށްފައިވާކަން ފާހަގަކުރެވެއެވެ.
