އެމްޑީޕީގެ ކުރިމަގަށް ވިސްނާ ބަޔަކު، މައާފަށް އެދުމަށްފަހު ކުރިއަށް ދިއުމަށް ފަސްޖެހިގެން ނުވާނެ ކަމަށާއި، އެ ޕާޓީއަށް މުސްތަގުބަލުގައި ކުރިއެރުން އޮތީ އެންމެން އެކީ އެކަތިގަނޑަކަށް ވެގެން ކަމަށް ވިދާޅުވެ ރައްޔިތުންގެ މަޖިލީހުގެ އައްޑޫ މީދޫ ދާއިރާގެ ކުރީގެ މެންބަރު ރޮޒައިނާ އާދަމް ދެއްކެވި ވާހަކަތަކަށް ކުރީގެ ރައީސް އިބްރާހީމް މުޙައްމަދު ޞާލިޙުގެ އަނބިކަނބަލުން ފަޒްނާ އަޙްމަދު ހޫނު ރައްދެއް ދެއްވައިފިއެވެ.
މީސް މީޑިއާގައި ހިއްސާކުރެއްވި ޕޯސްޓެއްގައި ފަޒްނާ ވިދާޅުވީ، ރޮޒައިނާ އެފަދަ މޭރުމަކުން ވާހަކަ ދެއްކެވި ހިސާބުން އެކުވެރިކުރުމުގެ މަގަށް ހުރަސްއެޅިފައިވާ ކަމަށެވެ. އަދި ބަޔަކު އެކުވެރިކުރުމަށް ބޭނުންވާ މައިގަނޑު އެއް އަސާސަކީ ހަމަހަމަ އުސޫލެއް ގެންގުޅުން ކަމަށް ފަޒްނާ ވިދާޅުވިއެވެ.
”ބަޔަކު އެކުވެރިކުރުމަށް ބޭނުންވާ މައިގަނޑު އެއް އަސާސަކީ ހަމަހަމަ އުސޫލެއް ގެންގުޅުން، ވަކިމީހަކު ގޮވައިގެން ނުކުމެ އިންސާފުވެރިކަމާއެކު ޗެއަރޕާސަންކަން ކުރައްވާނެ ގޮތެއް އަޅުގަނޑަކަށް ނުވިސްނޭ،“ – ފަޒްނާ ވިދާޅުވިއެވެ.
ފަޒްނާ ވިދާޅުވީ، ކުރީގެ ރައީސް މުޙައްމަދު ނަޝީދު އަދި އެމްޑީޕީގެ ކުރީގެ ޗެއަރޕާސަން ފައްޔާޒު އިސްމާޢީލް ދެ ބޭފުޅުން ކުރެ ކޮންމެ ބޭފުޅަކު ބޮޑުވަޒީރު ކަމަށް ވަޑައިގެންނެވި ނަމަވެސް މައްސަލައެއް ނެތް ކަމަށާއި އެފަދަ މަގާމަށް ވަޑައިގަތުމަށް މަސައްކަތް ކުރެއްވުމަކީ މައްސަލައެއް ނޫން ކަމަށެވެ. ނަމަވެސް ވަކި އަތަކަށް ނުޖެހި އިންސާފުވެރިކަމާއެކު މަސައްކަތް ކުރަންޖެހޭ މަގާމަކަށް ވަކިއަތަކަށް ޖެހިގެން ހުރި މީހަކު އައިސްގެން ޕާޓީގެ އެކުވެރިކަމެއް ދެމެހެއްޓޭނެ އެއްވެސް ގޮތެއް ނެތް ކަމަށް ފަޒްނާ ވިދާޅުވިއެވެ.
ފަޒްނާ ވިދާޅުވި ގޮތުގައި، އެމްޑީޕީ ޗެއަރޕާސަން އިންތިހާބުގައި އޭނާ މީކާއީލް އަޙްމަދު ނަސީމަށް ތާއީދުކުރައްވަން ނިންމެވީ ޒުވާން ޖީލަކަށް ޕާޓީ ހިންގަން ހަވާލު ކުރަންވެއްޖެ ކަމަށް ގަބޫލުކުރެވޭތީ ކަމަށެވެ. އަދި އެ ތާއީދު ބޮޑުވީ ”ޕްރިންސިޕަލް ސެންޓާޑް ލީޑަރޝިޕް“ އަކަށް ވަކާލާތު ކުރައްވާތީ ކަމަށް ވެސް އޭނާ ވަނީ އިތުރަށް ވިދާޅުވެފައެވެ.
