އިސްލާމީ ބޮޑު ދެ ޢީދު ކަމުގައިވާ ފިޠުރު ޢީދާއި އަޟްޙާ ޢީދު، މާލެއާއި އަތޮޅުތަކުގައި ކުލަގަދަކޮށް ފާހަގަކުރުމަށްޓަކައި އިސްލާމިކް މިނިސްޓްރީން ޚާއްޞަ ޕްލޭނެއް އެކުލަވައިލުމުގެ މަސައްކަތް ފަށައިފިއެވެ.
އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު މިއަދު ހާމަކުރެއްވި ގޮތުގައި، މި ޕްލޭނަކީ 1448 ވަނަ އަހަރުން ފެށިގެން ކޮންމެ އަހަރަކު ވެސް އިސްލާމީ ޢީދުތައް ރާއްޖޭގެ އެކި ކަންކޮޅުތަކުގައި ތަރުތީބުވެގެންވާ ނިޒާމެއްގެ ދަށުން ފާހަގަކުރުމަށް އެކުލަވައިލާ ޕްލޭނެކެވެ. މި މަސައްކަތް ކުރިއަށް ގެންދިއުމަށްޓަކައި މިނިސްޓްރީގެ ތެރޭގައި މިހާރު ވަނީ ޚާއްޞަ ކޮމިޓީއެއް އެކުލަވައިލާ، އަމަލީ މަސައްކަތް ފަށާފައެވެ.
މި ޕްލޭންގެ ދަށުން ރަށްރަށުގެ ކައުންސިލްތަކާ މަޝްވަރާކޮށްގެން، އަތޮޅުތަކުގައި ޙަރަކާތްތެރިވާ އިސްލާމީ ޚިދުމަތްދޭ މަދަނީ ޖަމިއްޔާތައް ބައިވެރިކޮށްގެން ގިނަ ޙަރަކާތްތަކެއް ހިންގުމަށް ވަނީ ރޭވިފައެވެ. ވަކިން ޚާއްޞަކޮށް، ރާއްޖޭގެ ސިޓީތަކުގައި ޢީދު ފާހަގަކުރުމުގެ ގޮތުން މުހިންމު އިވެންޓްތަކެއް ކުރިއަށް ގެންދިއުމަށް ހަމަޖެހިފައިވާއިރު، މިކަމުގައި ދިވެހި ބަހާއި ސަގާފަތާއި ތަރިކައާ ބެހޭ މިނިސްޓްރީއާއި، ގުޅިގެން މަސައްކަތް ކުރާނެ ކަމަށް ވެސް އެ މިނިސްޓްރީ އިން މަޢުލޫމާތު ދެއެވެ.
މި ޕްލޭނާ ގުޅޭގޮތުން އާންމުންގެ މެދުގައި އުފެދިދާނެ ބައެއް ސުވާލުތަކަށް އިޝާރާތް ކުރައްވައި މިނިސްޓަރު ޝަހީމް ވިދާޅުވީ، މިއީ އައު ޤަވާއިދުތަކެއް ހެދުމަށް ކުރާ މަސައްކަތެއް ނޫން ކަމަށެވެ.
”ޕްލޭންއެކޭ މި ބުނަނީ ގަވާއިދުތަކެއް ހަދާ ވާހަކައެއް ނޫން. މިއީ ކައުންސިލްތަކާއި ޖަމިއްޔާތަކާ ގުޅިގެން ޢީދު ދުވަހުގެ މުނާސަބަތުގައި ހިންގާނެ ހަރަކާތްތަކެއްގެ ވާހަކަ،“ މިނިސްޓަރު ވިދާޅުވިއެވެ.
މި ޕްލޭންގެ މައިގަނޑު މަޤުޞަދަކީ އިސްލާމީ އުޞޫލުތަކާއި ދިވެހި ސަޤާފީ ރީތި އާދަކާދަތަކާ އެއްގޮތްވާ ގޮތުގެ މަތިން، އެއްބައިވަންތަކަމާއެކު ޢީދުގެ އުފާ ފާޅުކުރުމުގެ ފުރުޞަތު ހުރިހާ ރައްޔިތުންނަށް ފޯރުކޮށްދިނުމެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އިސްލާމީ ޝިޢާރުތައް އާލާކުރުމަށް ދެއްވާ އަހައްމިއްޔަތުގެ ދަށުން ކުރިއަށް ގެންދާ މުހިންމު މަސައްކަތެއް ގޮތުގައި އިސްލާމިކް މިނިސްޓްރީން ބުނެއެވެ.
