ފިޗް ރޭޓިންގސްއިން ރާއްޖޭގެ ކްރެޑިޓް ރޭޓިން މަތިކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންނަވަމުންދާ މާލީ އިސްލާހުތަކުގެ ހެޔޮ ނަތީޖާ ކަމަށް އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.
މިނިސްޓަރު ސަޢީދު މި މޭރުމުން ވިދާޅުވީ، ފިޗުން ރާއްޖޭގެ ރޭޓިން ’ސީސީ‘ އިން ’ސީސީސީ މައިނަސް‘ އަށް މަތިކުރުމާ ގުޅިގެން މީސް މީޑިއާގައި ހިއްސާކުރެއްވި ޕޯސްޓެއްގައެވެ. ފިޗްއިން ބުނާ ގޮތުގައި މިއީ މިދިޔަ އޭޕްރީލް މަހު 500 މިލިއަން ޑޮލަރުގެ ސުކޫކު ދެއްކުމާ ގުޅިގެން، ގައުމު ބަނގުރޫޓުވުމުގެ ބިރު ކުޑަވުމުން ގެނައި ބަދަލެކެވެ.
މިނިސްޓަރު ސައީދު ވިދާޅުވި ގޮތުގައި، މިއީ ސަރުކާރުން އަޅަމުންދާ ހަރުދަނާ ފިޔަވަޅުތަކުގެ ސަބަބުން އިގުތިސާދަށް ލިބެމުންދާ ކުރިއެރުމެކެވެ. އެގޮތުން އާމްދަނީ އިތުރުކުރުމަށް ގެންނަ ބަދަލުތަކާއި ބޭރު ފައިސާއާ ބެހޭ އާ ގާނޫނުގެ ސަބަބުން ދައުލަތަށް ޑޮލަރު ލިބޭ މިންވަރު އިތުރުވަމުން އަންނަ ކަމަށް ފިޗްގެ ރިޕޯޓުގައި ފާހަގަކޮށްފައިވާކަން އޭނާ ވިދާޅުވިއެވެ.
ސަޢީދު ވަނީ ނިމިދިޔަ އެމްޑީޕީ ސަރުކާރުގެ ދަރަނީގެ ސިޔާސަތުތަކަށް ވެސް ވަރަށް ބޮޑަށް ފާޑުވިދާޅުވެފައެވެ. އެގޮތުން މާލީ ނިޒާމަށް ކުރިމަތިވި ހީނަރުކަމަކީ ފައިސާ ޗާޕުކުރުމާއި ދަރަނި އަދާކުރާނެ ގޮތުގެ އެކަށީގެންވާ ޕްލޭނެއް ނެތި ބޮޑެތި އިންޓަރެސްޓް ރޭޓުތަކުގައި ލޯނު ނެގުމުގެ ސަބަބުން ދިމާވި ކަމެއް ކަމަށާއި ނަމަވެސް، އަދުގެ ސަރުކާރުން އަމާޒު ހިފާފައިވަނީ އިގުތިސާދީ ހަމަޖެހުން ގާއިމުކޮށް، ދަރަނި މެނޭޖުކުރުމަށް ކަމަށް އޭނާ ވިދާޅުވިއެވެ.
