އިޒްރޭލާއި ލުބުނާނުން ހަމަލާބަދަލުކުރުން މަޑުޖައްސާލުމުގެ އެއްބަސްވުމަކަށް އަމަލުކުރަން އެއްބަސްވެއްޖެ ކަމަށް އެމެރިކާގެ ސްޓޭޓް ޑިޕާޓްމަންޓުން ނެރުނު ބަޔާނެއްގައި ހާމަކޮށްފިއެވެ. މި އެއްބަސްވުން ފެށިގެންދާނީ އީރާނުގެ މަދަދުލިބޭ ހިޒްބުالله ޖަމާއަތުން ދެމުންދާ ހަމަލާތައް މުޅިން ހުއްޓާލުމުން ކަމަށް އެ ބަޔާނުގައިވެއެވެ.
މި އެއްބަސްވުމަށް އާދެވިފައިވަނީ، މިދިޔަ އޭޕްރިލް މަހު އެންމެ ފުރަތަމަ އެއްބަސްވި ނާޒުކު ހަނގުރާމަ ހުއްޓާލުމުގެ އެއްބަސްވުން ޓެސްޓުކޮށް، ބުދަ ދުވަހު އިޒްރޭލުން ލުބުނާނުގެ ދެކުނަށް ދިން ހަމަލާތަކެއްގައި މަދުވެގެން ނުވަ މީހުން މަރުވެ، ހިޒްބުالله އިން އިޒްރޭލުން ވެރިވެގަނެފައިވާ ފަލަޞްޠީނުގެ އުތުރަށް ރޮކެޓް ހަމަލާތަކެއް ފޮނުވާލި ހާދިސާއަށް ފަހުގައެވެ.
”އިޒްރޭލާއި ލުބުނާނުގެ ދެމެދުގައި އޮންނާނެ މުސްތަގުބަލުގެ ގުޅުން ނިންމަންވާނީ ދެ ގައުމުގެ މިނިވަން ސަރުކާރުން ކަމަށް ހުރިހާ ގައުމަކުންވެސް އަލުން ކަށަވަރުކޮށްދިނެވެ. އަދި ލުބުނާނުގެ މުސްތަގުބަލު ރަހީނުކުރުމަށް އެއްވެސް ދައުލަތަކުން ނުވަތަ ދައުލަތް ނޫން ޖަމާއަތަކުން ކުރާ އެއްވެސް މަސައްކަތެއް އެ ގައުމުތަކުން ގަބޫލެއް ނުކުރެއެވެ،“ އީރާނުގެ މަދަދުލިބޭ ހިޒްބުالله އަށް ނިސްބަތްކޮށް އެމެރިކާގެ އެ ބަޔާނުގައިވެއެވެ.
މިއަހަރުގެ އޭޕްރިލް 16 ގައި އެމެރިކާ މެދުވެރިވެގެން އިޒްރޭލާއި ލުބުނާނާ ދެމެދު އެކުލަވާލި ހަމަލާބަދަލުކުރުން މަޑުޖައްސާލުމުގެ އެއްބަސްވުމުން ހަނގުރާމަ ހުއްޓުވޭގޮތް ވަނީ ނުވެފައެވެ. އަދި އިޒްރޭލުން ވެރިވެގަނެފައިވާ ފަލަޞްޠީނުގެ އުތުރުގެ ސަރަހައްދުތަކަށް ދެމުންދިޔަ ޑްރޯން އަދި ރޮކެޓް ހަމަލާތަކަށް ރައްދުދިނުމުގެ ގޮތުން، ހިޒްބުالله އަށް ދޭ ހަމަލާތައް ވަރުގަދަކޮށް، ލުބުނާނުގެ އެތެރެއަށް އިޒްރޭލުގެ ސިފައިން ވަދެގަތުމަށް ބޮޑުވަޒީރު ބެންޖަމިން ނަތަންޔާހޫ މިދިޔަ ހަފުތާގައި ވަނީ އަމުރުކޮށްފައެވެ.
