ފުލުހުންގެ ވަޒީފާ އިން ވަކިކުރިތާ 12 އަހަރު ފަހުން، އިންސްޕެކްޓަރ އޮފް ޕޮލިސް އަޙްމަދު ޝިޔާމަށް ހައިކޯޓުގެ އަމުރާ އެއްގޮތަށް އަލުން ވަޒީފާ ދީފިއެވެ.
ނޯތު ޕޮލިސް ޑިވިޝަންގެ ކޮމާންޑަރެއްގެ މަގާމުގައި ހުންނަވަނިކޮށް، މަގާމުގެ ނުފޫޒު ނަހަމަ ގޮތުގައި ބޭނުންކުރި ކަމުގެ ތުހުމަތުގައި ޝިޔާމް ވަޒީފާ އިން ވަކިކުރީ މެއި 2014 ގައެވެ. މި މައްސަލާގައި ފުރަތަމަ ސިވިލް ކޯޓުން ހުކުމްކުރީ އޭނާ އަށް އަލުން ވަޒީފާ ދޭން އަމުރު ނުކުރެވޭނެ ކަމަށެވެ. ނަމަވެސް، ހައިކޯޓުން ވަނީ އެ ހުކުމް ބާތިލްކޮށް، ޝިޔާމަށް އަލުން ވަޒީފާ ދިނުމަށާއި، ވަޒީފާ އިން ވަކިކުރި ދުވަހުން ފެށިގެން އަނބުރާ ވަޒީފާ ލިބުމާ ހަމައަށް ލިބެންޖެހޭ މުސާރަ އާއި އިނާޔަތްތައް ދިނުމަށް ދައުލަތުގެ މައްޗަށް އަމުރުކޮށްފައެވެ.
ހައިކޯޓުގެ މި ނިންމުމާ އެއްގޮތަށް ފުލުހުންގެ އިދާރާ އިން މިހާރު ވަނީ ޝިޔާމަށް ވަޒީފާ ހަމަޖައްސައިދީފައެވެ. ވަޒީފާއަށް އަލުން ނުކުންނަވަން ފެއްޓެވުމަށްފަހު ޝިޔާމް ވިދާޅުވީ، މިއީ އޭނާއަށް ލިބުނު ވަރަށް ބޮޑު ޝަރަފެއް ކަމަށާއި، ފުލުހުންގެ ވަޒީފާ އާއި ޔުނީފޯމަކީ އޭނާގެ ހަޔާތުގެ އެންމެ މުހިންމު ބައި ކަމަށެވެ.
ހައިކޯޓުގެ ހުކުމުގައި ފާހަގަކޮށްފައިވާ ގޮތުން، ވަޒީފާ އިން ވަކިކުރީ އެކަށީގެންވާ ސަބަބެއް އޮވެގެންކަން ސާބިތުކޮށްދިނުމުގެ ބުރަ އޮންނާނީ ދައުލަތަށެވެ. އަދި ފުލުހުންގެ ޑިސިޕްލިނަރީ ބޯޑުން އެކަށީގެންވާ ތަހުގީގެއް ހިންގައި، އެކަށީގެންވާ ހެކި ލިބިފައިވޭތޯ ކޯޓުތަކުން ބަލަންޖެހޭނެ ކަމަށް ސުޕްރީމް ކޯޓުން ކަނޑައަޅާފައިވާއިރު، ޝިޔާމްގެ މައްސަލާގައި އެކަން ސާބިތުކޮށްދެވޭނެ އެއްވެސް ހެއްކެއް ދައުލަތަށް ހުށަހެޅިފައެއް ނުވެއެވެ.
ޝިޔާމަށް ވަޒީފާ އަލުން ދިން ނަމަވެސް، ވަޒީފާގައި ނެތް މުއްދަތުގެ މުސާރަ އާއި އިނާޔަތްތައް ދިނުމުގެ ބައި ދައުލަތުން ވަނީ ސުޕްރީމް ކޯޓުގައި އިސްތިއުނާފުކޮށްފައެވެ. އެހެންކަމުން، އެ ފައިސާ އަދި އޭނާއަށް ދީފައެއް ނުވެއެވެ. ސުޕްރީމް ކޯޓުން ކުރިން ނިންމާފައިވާ އުސޫލެއްގައިވާ ގޮތުން، ވަޒީފާ އަނބުރާ ދޭ ހާލަތްތަކުގައި މުސާރައިގެ ގޮތުގައި ގިނަވެގެން ނަގައިދެވޭނީ ހަ މަސް ދުވަހުގެ އުޖޫރައެވެ.
