ސިޔާސީ ޕާޓީއެއް ދެމިއޮތުމަށް ލާޒިމްކުރާ އަދަދަށް މެންބަރުން ހަމަނުވާތީ، ކުރީގެ ރައީސް މުޙައްމަދު ނަޝީދު އިސްވެ ހުންނަވައި އުފެއްދެވި ”ދަ ޑިމޮކްރެޓްސް“ އާއި މޯލްޑިވްސް ލޭބަރ އެންޑް ސޯޝަލް ޑިމޮކްރަޓިކް ޕާޓީ، އިލެކްޝަނުން އުވާލައިފިއެވެ.
މިކަމާ ގުޅިގެން އިލެކްޝަންސް ކޮމިޝަނުން ކޮށްފައިވާ އިއުލާނެއްގައި ބުނެފައިވަނީ، ސިޔާސީ ޕާޓީގެ ގާނޫނުގައިވާ ގޮތުގެ މަތިން ޕާޓީއެއް ދެމިއޮތުމަށް ގާނޫނު ލާޒިމުކުރާ 3،000 މެމްބަރުން ހަމަކުރުމަށް ދިން މުއްދަތުގައި އެ އަދަދަށް މެމްބަރުން ހަމަކޮށްފައި ނުވާތީ، ދަ ޑިމޮކްރެޓްސްއާއި މޯލްޑިވްސް ލޭބަރ އެންޑް ސޯޝަލް ޑިމޮކްރަޓިކް ޕާޓީ އުވާލައި އެ ދެ ޕާޓީ ސިޔާސީ ޕާޓީތަކުގެ ދަފުތަރުން އުނިކުރުމަށް ކޮމިޝަނުން މިއަދު ނިންމާފައިވާ ކަމަށެވެ.
ދަ ޑިމޮކްރެޓްސްގެ ދަފްތަރުގައި މި ވަގުތު 1،569 މެންބަރުން ތިބިއިރު ލޭބަރ ޕާޓީގެ ދަފްތަރުގައި ތިބީ އެންމެ 1،357 މެންބަރުން ކަމަށް އިލެކްޝަންސް ކޮމިޝަނުން ވަނީ ހާމަކޮށްފައެވެ.
ފާހަގަކޮށްލެވޭ ގޮތުގައި ދަ ޑިމޮކްރެޓްސް ޕާޓީއަކީ 2023 ވަނަ އަހަރުގެ ރިޔާސީ އިންތިހާބާ ދިމާކޮށް، ކުރީގެ ރައީސް ނަޝީދާއި ކުރީގެ ރައީސް ޞާލިޙާ ދެމެދު އުފެއްދުނު ނުތަނަވަސްކަމުގެ ތެރެއިން ނަޝީދުގެ ވަފާތެރި މެންބަރުން އެމްޑީޕީން ވަކިވުމަށްފަހު އުފެއްދި ޕާޓީއެކެވެ. ޑިމޮކްރެޓްސް އުފެއްދީ 2023 ވަނަ އަހަރުގެ ޖުލައި މަހުގެ 12 ވަނަ ދުވަހުއެވެ.
ނަމަވެސް އެ ޕާޓީއަށް މާ ބޮޑު ތަރުހީބެއް ނުލިބުމުގެ ސަބަބުން، ޕާޓީ ދޫކުރައްވައި ނަޝީދާއި އޭނާގެ ވަފާތެރި މެންބަރުންގެ ގިނަ ބަޔަކު ވަނީ މި އަހަުގެ ކުރީކޮޅު އަލުން އެމްޑީޕީއާ ގުޅިވަޑައިގެންފައެވެ. ޕާޓީއާ އަލުން ގުޅިވަޑައިގެން ނަޝީދު ވަނީ، އެ ޕާޓީގެ ޗެއަރޕާސަން ކަމަށް ވާދަކުރައްވާކަން އިއުލާންކުރައްވައިފައެވެ.
