އަމިއްލަ ނަފުސަށް އިތުބާރުކުރާ، އިސްލާމީ ޢަޤީދާ ވަރުގަދަ، އަދި ޤައުމިއްޔަތަށް ލޯބިކުރާ ޒިންމާދާރު ޖީލެއް ބިނާކުރުމަށް ސަރުކާރުން ކުރިއަށްގެންދާ ”ދިވެހި ވަޠަނީ ޚިދުމަތް“ (މޯލްޑިވްސް ނޭޝަނަލް ސާވިސް) ގެ ދަށުން، ފަންނީ ތަމްރީނުތައް ފުރިހަމަކުރުމަށްޓަކައި ބައިވެރިން މިއަދު ބ. ކިހާދޫއަށް ފުރައިފިއެވެ.
މިކަން އިޢުލާނު ކުރެއްވީ ރައީސް ޑރ. މުޢިއްޒު ސޯޝަލް މީޑިއާގައި ކުރެއްވި ޕޯސްޓެއްގައެވެ.
އަމިއްލަ ނަފުސަށް އިތުބާރުކުރާ، ޢަޤީދާ ވަރުގަދަ، ރޫޙާނީ އަދި ޖިސްމާނީ ގޮތުން ދުޅަހެޔޮ، ޤައުމިއްޔަތަށް ލޯބިކުރާ، ޒިންމާދާރު، ރައްޔިތެއް ބިނާކުރުމަށް ސަރުކާރުން ފަށާފައިވާ ދިވެހި ވަޠަނީ ޚިދުމަތުގެ ތަމްރީނުގެ ދެވަނަ ބެޗް ފުރިހަމަ ކުރި ޒުވާނުންގެ ތެރެއިން، ދިވެހި ވަޠަނީ ޚިދުމަތުގެ… pic.twitter.com/h8D20SkSjy
— Dr Mohamed Muizzu (@MMuizzu) June 3, 2026
މިއަދު ބ. ކިހާދޫއަށް ފުރާފައިވަނީ ދިވެހި ވަޠަނީ ޚިދުމަތުގެ ތަމްރީނުގެ ދެވަނަ ބެޗް ފުރިހަމަކުރި ޒުވާނުންގެ ތެރެއިން، އިތުރު ފަންނީ ތަމްރީނުތައް ހާސިލުކުރުމަށް ޝައުޤުވެރިކަން ފާޅުކުރި ބައިވެރިންނެވެ.
މި ޒުވާނުން ތަމްރީނު ހޯދުމަށް ހަމަޖެހިފައިވަނީ ބ. ކިހާދޫގައި ޤާއިމުކޮށްފައިވާ އެމް.އެން.ޑީ.އެފްގެ ސްކޫލް އޮފް އިންޖިނިއަރިން އެންޑް ލޮޖިސްޓިކްސްގައެވެ. މި ބެޗުގައި ރާއްޖޭގެ 17 އަތޮޅެއްގެ 50 ރަށަކަށް ނިސްބަތްވާ، އުމުރުން 16 އަހަރާއި 19 އަހަރާ ދެމެދުގެ 77 ޒުވާނުން ބައިވެރިވެއެވެ.
މި ތަމްރީނު ޕްރޮގްރާމުގެ ތެރެއިން ތަފާތު 6 ފަންނީ ދާއިރާއަކުން ޢިލްމާއި ހުނަރު ހޯދުމުގެ ފުރުޞަތު މި ޒުވާނުންނަށް ލިބިގެންދާނެއެވެ. މިއީ ޤައުމީ ޚިދުމަތަށް ނުކުންނަ އިރު، ކޮންމެ ޒުވާނަކީވެސް މަސައްކަތުގެ މައިދާނަށް އަހުލުވެރި، ހުނަރުވެރި ބަޔަކަށް ހެދުމަށް ސަރުކާރުން ކުރަމުންދާ މަސައްކަތުގެ ތެރެއިން ކުރިއަށްދާ ހަރަކާތެކެވެ.
މި ތަމްރީނުތަކަކީ ރޫޙާނީ އަދި ޖިސްމާނީ ގޮތުން ދުޅަހެޔޮ، ޒިންމާދާރު ރައްޔިތުންތަކެއް ބިނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން ފަށާފައިވާ މުހިންމު މަޝްރޫޢެކެވެ.
މި ތަމްރީނުތަކުގެ ސަބަބުން ޒުވާނުންގެ މެދުގައި އޮންނަ އެކުވެރިކަމާއި، ޤައުމީ ރޫޙު އިތުރަށް ވަރުގަދަވެގެންދާނެ ކަމަށް ރައީސް މުޢިއްޒު ވިދާޅުވިއެވެ. ސަރުކާރުގެ އަމާޒަކީ މި ޕްރޮގްރާމުގެ ޒަރީޢާއިން، ދިވެހި ޤައުމަށް ވަފާތެރި، އަޚުލާޤު ރަނގަޅު، އަދި އަމިއްލަ ފައިމައްޗަށް ތެދުވެ ތިބި ޒުވާނުންތަކެއް މުޖުތަމަޢަށް ނެރުމެވެ.
މި ޕްރޮގްރާމް ބަހާލެވިފައިވަނީ މައިގަނޑު ދެ ބަޔަކަށެވެ. ފުރަތަމަ ބަޔަކީ އަސްކަރީ ތަރުބިއްޔަތާއި، އަޚުލާޤާއި، ދީނީ ކަންކަމަށް އަހުލުވެރިކުރުވުމުގެ ”ބޭސިކް“ ތަމްރީނެވެ. ދެވަނަ ބަޔަކީ މިހާރު ފަށާފައިވާ ”ފަންނީ ތަމްރީނު“ ތަކެވެ. މީގެ ތެރޭގައި އިންޖިނިއަރިންގ، ލޮޖިސްޓިކްސް، އަދި އެހެނިހެން ޓެކްނިކަލް ދާއިރާތަކުން ޒުވާނުން ތަމްރީނުކުރެވެއެވެ.
މި މަޝްރޫޢު ކުރިއަށް ގެންދަނީ މިނިސްޓްރީ އޮފް ޑިފެންސް އާއި މޯލްޑިވްސް ނޭޝަނަލް ޑިފެންސް ފޯސް (އެމް.އެން.ޑީ.އެފް) ގުޅިގެންނެވެ. ބ. ކިހާދޫގައި ހުންނަ އެމް.އެން.ޑީ.އެފްގެ ސްކޫލް އޮފް އިންޖިނިއަރިންގ އެންޑް ލޮޖިސްޓިކްސްއަކީ މިފަދަ ފަންނީ ތަމްރީނުތައް ދިނުމަށް ޚާއްޞަކޮށްފައިވާ މަރުކަޒެކެވެ.
ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުޙައްމަދު މުޢިއްޒު، ދިވެހި ވަޠަނީ ޚިދުމަތް އިފްތިތާހު ކޮށްދެއްވީ 1 އޮކްޓޯބަރ 2025 ގައި ޅ. އަތޮޅު މާފިލާފުށީގައި ހުންނަ ދިވެހި ގައުމީ ދިފާއީ ބާރުގެ ކޮމްޕޮސިޓް ޓްރެއިނިން ސެންޓަރގައި ބޭއްވި ރަސްމިއްޔާތެއްގައެވެ. އެ ރަސްމިއްޔާތުގައި ރައީސް ވިދާޅުވީ އެމަނިކުފާނުގެ ތަސައްވުރަކީ މި ދައުރުގައި މި ޕްރަގްރާމުން 5,000 ޒުވާނުން ތަމްރީންތައް ފުރިހަމަކޮށްގެން ނިކުތުން ކަމަށެވެ.
މި ރަސްމިއްޔާތުގައި ތަމްރީނުގެ ބައިވެރިންނަށް ރައީސް މުޢިއްޒު އިލްތިމާސްކުރެއްވީ، މި ތަމްރީނަކީ، އެ ބައިވެރިންގެ މުސްތަގްބަލު އުޖާލާކޮށް، އުފާފާގަތިކަން ކަށަވަރުކުރުމަށް ލިބުނު ފުރުސަތެއްގެ ގޮތުގައި ބަލައިގަނެގެން ކުރިއަށް ދިއުމަށެވެ. އަދި ތަމްރީނު ނިމޭއިރު އުފެދިގެންދާނީ، އުޅުންހުރި، ގައުމީ އަދި ދީނީ ލޯބި އަށަގެންފައިވާ، ބާރުވެރި ޒުވާނުންތަކެއް ކަމަށް އެމަނިކުފާނު ވިދާޅުވި އެވެ.
ދިވެހި ވަޠަނީ ޚިދުމަތުގެ 2 ވަނަ ބެޗު ފުރިހަމަ ކޮށްނިމިފައިވާއިރު މި ޕްރޮގްރާމަށް ގިނަ ރައްޔިތުންގެ ތާއީދު ދަނީ ލިބެމުންނެވެ. އަދި އެތައް ބެލެނިވެރިންގެ ޝުކުރާއި ތަޢުރީފް ރައީސް މުޢިއްޒުއާއި ސަރުކާރަށް ދަނީ އޮހެމުންނެވެ.
