ހުޅުމާލެ އުތުރު ދާއިރާގެ ކައުންސިލް މެންބަރު ފާތިމަތު ޒަހިއްޔާ މަގާމަށް އިންތިހާބުކުރީ ރަސްމީ ވަގުތުތަކުގައި ކުރީގެ ރައީސް މުހައްމަދު ނަޝީދާއެކު ބަށި ކުޅެން ހެއްޔެވެ؟ މިއީ މިއަދު އެމްޑީޕީއަށް ނިސްބަތްވާ އާންމު މެންބަރުން ކުރަމުން އަންނަ ސުވާލެކެވެ.
އެމްޑީޕީގެ އާންމު މެންބަރުން މި ސުވާލު ނުކުރަންވީ އެއްވެސް ސަބަބެއް ނެތެވެ. އެގޮތުން މި ފަހުން ބޭއްވުނު ލޯކަލް ކައުންސިލްތަކުގެ އިންތިހާބުގައި، ހުޅުމާލެ އުތުރު ދާއިރާގެ ރައްޔިތުން އެ މަގާމަށް ޒަހިއްޔާ އިންތިހާބުކުރީ ވަރަށް ވެސް ފޮނި އުންމީދުތަކާއެކުގައެވެ. އެގޮތުން ކެމްޕޭނު ތެރޭގައި ކުރިއަށްގެންދިޔަ ދޮރުންދޮރަށް ހަރަކާތްތަކުގައި ޒަހިއްޔާ ތަކުރާރުކޮށް ބުނަމުން ގެންދިޔައީ އޭނާ އަބަދު ވެސް ހުންނާނީ ރައްޔިތުންގެ ހިދުމަތުގައި އެއްވެސް ވަރުބަލި ކަމެއްނެތި ކަމަށެވެ.
ރައްޔިތުންގެ ހިދުމަތުގައި ރައްޔިތުންގެ ހާދިމެއްގެ ގޮތުގައި 24 ގަޑިއިރު މަސައްކަތްކުރާނެ ކަމަށް ވައުދުވެ، ހުޅުމާލެ އުތުރު ދާއިރާގެ ރައްޔިތުންގެ ލޮލުގައި އަނދުން އެޅުވުމަށްފަހު ޒަހިއްޔާގެ އަމަލުތައް މިހާރު ފެނިގެންދަނީ އޭރު ދެއްކި ވާހަކަތަކާއި ދިމާ މުޅިން އިދިކޮޅަށެވެ. އެގޮތުން ރައްޔިތުން ހަވާލުކުރި ޒިންމާއިން ރެކިގަނެ، ޒަހިއްޔާ ފެނިގެންދަނީ ކުރިއަށް އޮތް އެމްޑީޕީގެ ޗެއަރޕާސަން އިންތިހާބުގައި ވާދަކުރައްވާ ކުރީގެ ރައީސް މުޙައްމަދު ނަޝީދުގެ ކެމްޕޭނުގައި ރެއާއި ދުވާލު ހަރަކާތްތެރިވާ މަންޒަރެވެ.
އެގޮތުން ރަސްމީ ދުވަސް ތަކުގައި ކައުންސިލަށް ހާޒިރުނުވެ، ނަޝީދާއެކު ކެމްޕޭނުގައި އަތޮޅުތެރޭގެ ރަށްރަށަށް ދަތުރުކުރުމާއި، އެ ރަށްރަށަށް ގޮސް ބަށިކުޅެ އުޅުމާއި، މާލޭގެ އެކި އަވަށްތަކުގައި ހިންގާ ދޮރުންދޮރަށް ހަރަކާތުގައި ބައިވެރިވެ ޑްރާމާ ކުޅުން ފަދަ ކަންކަމުގައި ޒަހިއްޔާ އިސްވެ ހަރަކާތްތެރިވެ އުޅޭތީ ގިނަ ބަޔަކު އަންނަނީ އޭނާއަށް ފާޑުކިޔަމުންނެވެ. މީގެ އިތުރުން ރައްޔިތުން އަމާނަތްތެރިކަމާއެކު ހަވާލުކުރި ޒިންމާއިން ރެކިގަނެ، އަދި ރައްޔިތުންގެ ޓެކްސް ފައިސާއިން މަހަކު 32 ހާސް ރުފިޔާގެ މުސާރައެއް ލިބޭއިރު، އަތޮޅުތެރޭގެ ރަށްރަށަށް ހޮލިޑޭގައި ދަތުރު ހަދާފައި ގޮސްއުޅޭ އުސޫލުން ނަޝީދުގެ ކެމްޕޭނުތަކުގައި ރަށްރަށަށް ގޮސް އުޅޭތީ އޭނާ އެމަޤާމުން އަމިއްލައަށް ވަކިވުމަށާއި، ކަން ކުރެވޭނެ ފަރާތަކަށް ފުރުސަތު ދިނުމަށް ގިނަ ބަޔަކު އަންނަނީ ގޮވާލަމުންނެވެ.
ނަޝީދުގެ ކެމްޕޭނުގައި ޒަހިއްޔާ އިސްކޮށް ހަރަކާތްތެރިވެ އުޅޭތީ ހުޅުމާލެ އުތުރު ދާއިރާގެ ރައްޔިތުން ވެސް އަންނަނީ ކަންބޮޑުވުން ފާޅުކުރަމުންނެވެ. އެގޮތުން ފަސް އަހަރުދުވަހުގެ މުއްދަތަކަށް އިންތިހާބުކުރުމުން އެ ފަސް އަހަރު ބޭކާރުގޮތުގައި ދުއްވާލާނީ ނަޝީދުގެ ”ޕަޕެޓެއް“ ގެ ގޮތުގައިތޯ އެ ދާއިރާއަށް ނިސްބަތްވާ ގިނަ ބަޔަކު އަންނަނީ ސުވާލު އުފައްދަމުންނެވެ.
