ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ގްރޭޓަރ މާލެ ކްނެކްޓިވިޓީ ބްރިޖްގެ މަސައްކަތް ހަލުވި ދުވެއްޔެއްގައި ނިންމަވަމުން ގެންދަވާތީ ބަޔަކު އެމަނިކުފާނަށް ހަސަދަވެރިވާ ކަމަށް ރައްޔިތުންގެ މަޖިލީހުގެ މައްޗަންގޮޅި އުތުރު ދާއިރާގެ މެންބަރު އިބްރާހީމް މުޙައްމަދު ވިދާޅުވެއްޖެއެވެ.
މެންބަރު އިބްރާހިމް މީސް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ، ރައީސް މުޢިއްޒާ ވަކި ބަޔަކު ހަސަދަވެގެން، ޒާތީ ގޮތުން ޖައްސާލައިގެން އުޅޭ ސަބަބަކީ ރާއްޖޭގެ ބޮޑެތި ދަރަނިތައް ދައްކަވާދެއްވައި، ކުރިއަށް އޮތް ޖީލުތަކަށް އިގްތިސާދީ މިނިވަންކަން ހޯއްދަވައިދެއްވަމުން ގެންދަވާތީ ކަމަށެވެ.
ވަކިން ހާއްސަކޮށް، ކުރީ ސަރުކާރުން ފެށި އެހެންނަމަވެސް ނުނިންމުނު ބްރިޖްގެ މަސައްކަތް މި ސަރުކާރުން ހަލުވިކަމާއެކު ކުރިއަށް ގެންގޮސް ނިންމާލުމަކީ އެފަދަ ފަރާތްތަކަށް ކެތްކުރަން ދަތި މަންޒަރެއް ކަމަށް ވެސް އޭނާ ފާހަގަކުރެއްވިއެވެ.
ރައީސް ޑރ. މުޢިއްޒާއި ވަކިބަޔަކު حسدވެގެން ޒާތީގޮތުން ޖައްސާލައިގެން اصل މިއުޅެނީ ބޮޑެތި ދަރަނިތައް ދައްކައިދީ، اقتصادي މިނިވަންކަން ދަރިންގެދަރިންނަށް ހޯއްދަވައިދެއްވާ، ނުނިމުނު ބްރިޖު ނިންމައިދޭތީ ކަމަށް މިހާރު ޔަޤީންވަނީ. ނުނިމި މިހާރު އިނީ ޗޮކްލެޓްބާރ އެއްވަރު ތަންފުކެއް. pic.twitter.com/dnuYrNqhfG
— Ibrahim Muhammad (@ibrahimjanab) June 3, 2026
ގްރޭޓަރ މާލެ ކަނެކްޓިވިޓީ ބްރިޖްގެ މަސައްކަތާ ގުޅޭގޮތުން މެންބަރު އިބްރާހިމް ވިދާޅުވީ، ބްރިޖުގެ މަސައްކަތް މިހާރު ގޮސްފައިވާ ހިސާބަށް ބަލާއިރު، މިހާރު ނުނިމި އިނީ ”ޗޮކްލެޓް ބަރއެއްވަރުގެ“ ކުޑަ ތަންކޮޅެއް ކަމަށެވެ. މިއީ ބްރިޖުގެ މަސައްކަތް ނިންމުމާ ވަރަށް ގާތްވެފައިވާކަން ހާމަކޮށްދިނުމަށް އޭނާ ބޭނުންކުރެއްވި މިސާލެކެވެ.
މެންބަރު އިބްރާހިމް މި މޭރުމުން ވިދާޅުވެފައިވާއިރު ފާހަގަކޮށްލަންޖެހޭ ކަމަކީ ރައީސް މުޢިއްޒު ވެރިކަމާ ހަވާލުވެވަޑައިގަތް އިރު ބްރިޖުގެ އެއްވެސް މަސައްކަތެއް ފެށިފައެއް ނުވެއެވެ. ނަމަވެސް ވެރިކަމާ ހަވާލުވެވަޑައިގަތުމަށްފަހު އިންޑިއާއާއެކު ކުރެވުނު މަޝްވަރާތަކުގެ ސަބަބުން ބްރިޖްގެ މަސައްކަތް މެކުހަށް ޖަހާލައި އެ މަސައްކަތް މިހާރު ވަނީ ނިމުމަކާ ގާތްވެފައެވެ.
މި މަސައްކަތް ކުރިއަށްގެންދާ އެފްކޮންސްއިން ބުނާ ގޮތުގައި ބްރިޖްގެ މަސައްކަތްތައް އެއްކޮށް ނިންމާލެވޭނީ އަންނަ 2027 ވަނަ އަހަރުގެ ތެރޭގައެވެ.
