ރާއްޖެއިން ލިބެން ހުންނަ ފަރުވާތަކަށް ވީނަމަވެސް، ބަލިމީހާގެ ހާލަތަށާއި ވަށައިގެންވާ ކަންކަމަށް ރިއާޔަތްކޮށް، އާސަންދަ ސްކީމުގެ ދަށުން ރާއްޖެއިން ބޭރަށް ފޮނުވޭ ގޮތަށް އުސޫލުތަކަށް ބޮޑު ބަދަލެއް ގެނެސްފިއެވެ.
ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އާއި އާސަންދަ ކުންފުނިން ގެނައި މި ބަދަލާއެކު، ސްޕެޝަލިސްޓް ޑޮކްޓަރުން ރިފަރަލް ދެއްވައިފިނަމަ، ބަލީގެ ބާވަތާއި، ބަލިމީހާގެ ހާލަތުގެ އިތުރުން ރާއްޖޭގައި އެ ފަރުވާ ހޯދުމުގައި ހުރި ދަތިތަކަށް ބަލައި ރާއްޖެއިން ބޭރަށް ފޮނުވުމުގެ ހުއްދަ ދޭނެއެވެ. މީގެ އިތުރުން ރާއްޖެއިން ބޭރުގައި އެނދުމަތިކޮށްގެން ފަރުވާ ހޯދާ ފަރާތްތަކަށް ވެސް، ރާއްޖޭގައި އެ ހިދުމަތަކަށް ހިނގާނެ ޚަރަދަށް ބަލައި އާސަންދަ ސްކީމުން އެހީތެރިކަން ފޯރުކޮށްދޭ ގޮތަށް ވަނީ ހަމަޖައްސާފައެވެ.
މި އާ ބަދަލުގެ ދަށުން، ވެލްފެއަރ ސްކީމުން ބޭރަށް ފޮނުވާ ބަލިމީހުން އިތުރު އޮޕަރޭޝަނެއް ކުރަންޖެހޭ ހާލަތްތަކުގައި ވެސް ރާއްޖޭގައި އެކަމަށް ކަނޑައެޅިފައިވާ އަގާ އެއްވަރަށް އާސަންދައިން ކަވަރުކޮށްދޭނެއެވެ. އަދި އަމިއްލަ ޚަރަދުގައި ބޭރަށް ފަރުވާއަށް ގޮސް އުޅެނިކޮށް ދިމާވާ ސިއްހީ ކުއްލި ހާލަތްތަކުގައި ވެސް މިހާރު އާސަންދަ ސްކީމުގެ އެހީތެރިކަން ލިބޭނެއެވެ.
އިންޑިއާ، ސްރީލަންކާ، ފިލިފީންސް އަދި މެލޭޝިއާގައި ދިރިއުޅޭ ދިވެހިންނަށް ހާއްސަކޮށްފައިވާ ”މެރަނަ“ ސްކީމަށް ވެސް ވަނީ މުހިންމު ލުއިތަކެއް ގެނެސްފައެވެ. އެގޮތުން ކުއްލި ހާލަތްތަކުގައި އެމްޕެނަލް ކުރެވިފައިވާ ހޮސްޕިޓަލްތަކުން ކޭޝްލެސްކޮށް ފުލް ކަވަރޭޖް ލިބޭނެ އިންތިޒާމު ވަނީ ހަމަޖައްސާފައެވެ.
އިދާރީ ގޮތުން ކުރިމަތިވާ ތަކުލީފުތައް ކުޑަކުރުމަށްޓަކައި، ރީޖަނަލް ނުވަތަ އަތޮޅު ހޮސްޕިޓަލްތަކުން ފޮނުވާ ރިކޮމެންޑޭޝަން ފޯމްތަކުގައި މައްސަލައެއް އުޅޭނަމަ، ބަލިމީހާ އިތުރު ތަހުގީގުތައް ކުރުމުގެ ބަދަލުގައި އާސަންދަ ކުންފުނިން އަމިއްލައަށް ކަމާގުޅޭ ޑޮކްޓަރުންގެ އޮޕީނިއަން ހޯދާ ގޮތަށް ވެސް މިހާރު ވަނީ ނިންމާފައެވެ.
މި ބަދަލުތަކަކީ ސަރުކާރުން ސިއްހީ ނިޒާމު ހަރުދަނާކޮށް ރައްޔިތުންނަށް ލުއިފަސޭހަ ޚިދުމަތްތަކެއް ފޯރުކޮށްދިނުމަށް ކުރަމުންދާ މަސައްކަތުގެ ތެރެއިން ގެނެވުނު ބަދަލުތަކެކެވެ.
