އެންސްޕާއިން ދެމުންއައި މެޑިކަލް ވެލްފެއާގެ ހިދުމަތްތައް އާސަންދައިގެ ދަށަށް ބަދަލުކޮށްފިއެވެ.
އެންސްޕާއިން ފޯރުކޮށްދެމުންދިޔަ މެޑިކަލް ވެލްފެއާގެ ހިދުމަތްތައް އާސަންދައިގެ ދަށަށް ބަދަލުކުރުމަށް ސަރުކާރުން ނިންމީ، ސިއްހީ އެހީތެރިކަން ހޯދުމުގައި ރައްޔިތުންނަށް ކުރިމަތިވާ އިދާރީ ހުރަސްތައް ނައްތާލައި، އެއް ފުރާޅެއްގެ ދަށުން އަވަސް އަދި ލުއިފަސޭހަ ހިދުމަތްތަކެއް ފޯރުކޮށްދިނުމުގެ މަގުސަދުގައެވެ.
މީގެކުރިން ބައެއް ހިދުމަތްތަކަށް އެދި އެންސްޕާއަށް އަދި އަނެއްބައި ހިދުމަތްތަކަށް އެދި އާސަންދައަށް ވަކިވަކިން ހުށަހަޅަންޖެހުމަކީ އާންމުންގެ ފަރާތުން ބޮޑެތި ޝަކުވާތަކެއް އަމާޒުވަމުންދިޔަ ކަމެއްކަން ފާހަގަކޮށްލަންޖެހެއެވެ.
މި ބަދަލާއެކު، އެންސްޕާއިން ކުރިން ދެމުންދިޔަ ފަސް ދާއިރާއެއްގެ ހިދުމަތް އާސަންދައިގެ ދަށަށް ބަދަލުވެގެންދާނެއެވެ. އޭގެ ތެރޭގައި ބޭސްފަރުވާއާއި، ޓެސްޓްތައް ހެދުމާއި، މެޑިކަލް ޑިވައިސްތަކަށް ބޭނުންވާ އެހީގެ އިތުރުން، ރާއްޖެއިން ބޭރުގައި ދިރިއުޅޭ ދިވެހިންނަށް ފޯރުކޮށްދޭ ސިއްހީ އެހީތެރިކަން ހިމެނެއެވެ. މީގެ އިތުރުން، ރިފަރަލްތަކާއި، ކުއްލި ފަރުވާގެ ހާލަތްތަކާއި، ތެލެސީމިއާ އަދި ބޯންމެރޯ ޓްރާންސްޕްލާންޓް ފަދަ ހާއްސަ ހާލަތްތަކުގައި ދެވޭ އެހީތެރިކަން ވެސް ދެން ލިބިގެންދާނީ އާސަންދަ މެދުވެރިކޮށެވެ.
ސަރުކާރުގެ މި ނިންމުމާ ގުޅޭގޮތުން ހެލްތު މިނިސްޓަރު ޤީލާ ޢަލީ ވިދާޅުވީ، މި ބަދަލުގެ ސަބަބުން އެންމެ އެޕްލިކޭޝަނެއް މެދުވެރިކޮށް ހުރިހާ ސިއްހީ އެހީއަކަށް އެދުމުގެ ފުރުސަތު ރައްޔިތުންނަށް ފަހިވެގެންދާނެ ކަމަށެވެ. އަދި މިގޮތަށް ބަދަލުވުމުން ހިދުމަތް ހޯދާ ފަރާތްތަކުގެ މައުލޫމާތު އެއްތަނަކުން ބެލެހެއްޓި، ފޯރުކޮށްދެވޭ އެހީތެރިކަން މިހާރަށްވުރެ ދެފުށް ފެންނަ، ހަރުދަނާ ނިޒާމެއްގެ ތެރެއަށް ބަދަލުވެގެންދާނެކަން މިނިސްޓަރު ފާހަގަކުރެއްވިއެވެ.
އެހެންކަމުން މިހާރު އެންސްޕާއަށް ހުށަހަޅާފައިވާ މެޑިކަލް ވެލްފެއާ ފޯމުތަކަށް އިއްޔެއިން ފެށިގެން އާސަންދަ ކުންފުނިން ވަނީ ޖަވާބުދޭން ފަށައިފައެވެ. އަދި ހިދުމަތްތަކާ ގުޅޭ އިތުރު މައުލޫމާތު ފޯރުކޮށްދިނުމުގެ ޒިންމާ ވެސް ދެން އުފުލާނީ އެ ކުންފުނިންނެވެ.
