ސިނގިރޭޓުގެ އަގަށް ދުވަހަކު ވެސް ބަދަލު ނުގެންނަވާނެ ކަމަށް ވިދާޅުވެފައި ނުވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ، ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ސަރުކާރުން ކުރިއަށްގެންދިއުމަށް ރާވާފައިވާ މުހިއްމު މަސައްކަތްތަކާ ގުޅޭގޮތުން މައުލޫމާތު ދެއްވަމުންނެވެ. އެމަނިކުފާނު ވިދާޅުވީ، ދުންފަތުގެ މައްސަލަ ހައްލުކުރުމަށް ކުރަމުންދާ މަސައްކަތުގައި ސަރުކާރުން ޔޫޓާނެއް ނުނަގާ ކަމަށެވެ.
ފާހަގަކޮށްލެވޭ ގޮތުގައި، ދުނިޔޭގެ ދުންފަތުގެ އިސްތިއުމާލު ނުކުރާ ދުވަހާ ގުޅިގެން އިއްޔެ ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރު ޢަލީ އިޙްސާން ވަނީ ސިނގިރޭޓުން ނަގާ އިމްޕޯރޓް ޑިއުޓީ 8 ރުފިޔާއިން 4 ރުފިޔާއަށް ކުޑަކުރުމަށް ދުނިޔޭގެ ސިއްހަތު ޖަމުއިއްޔާއިން ލަފާދީފައިވާ ކަމަށް ވިދާޅުވެފައެވެ.
މިކަމާ ގުޅިގެން ރައީސް ވިދާޅުވީ، ސަރުކާރުން އަބަދު ވެސް ކަންކަން ނިންމާނީ މަޝްވަރާގެ މަތިން ކަމަށެވެ. އަދި ދުންފަތާ ގުޅޭގޮތުން މި ސަރުކާރުން ގެންގުޅޭ ސިޔާސަތަށް އެއްވެސް ބަދަލެއް ނާންނާނެކަމުގެ ޔަގީންކަން އެމަނިކުފާނު ވަނީ ދެއްވައިފައެވެ. ދުންފަތާ ގުޅޭގޮތުން މި ސަރުކާރުން ގެންގުޅޭ ސިޔާސަތަކީ ދުންފަތާއި، ވޭޕް އަދި އީ-ސިނގިރޭޓް ފަދަ ބާވަތްތައް ހުއްޓުވުމެވެ.
ނަމަވެސް ސަރުކާރުގެ މިފަދަ ހަރުދަނާ ސިޔާސަތުތަކާ ގުޅޭގޮތުން ހަގީގަތް އޮޅޭގޮތަށް ބައެއް ފަރާތްތަކުން ވާހަކަ ފަތުރަމުން އަންނާތީ ރައީސް މުޢިއްޒު ވަނީ ކަންބޮޑުވުން ފާޅުކުރައްވައިފައެވެ. އަދި އެފަދަ ޒިންމާދާރުކަން ކުޑަ ވާހަކަތައް ނުފެތުރުމަށް އެމަނިކުފާނު ވަނީ އެދި ވަޑައިގެންފައެވެ.
