އުމުރުން 16 އަހަރުން ދަށުގެ ކުދިންނަށް ސޯޝަލް މީޑިއާގެ ވަކި އެޕްތަކެއް ބޭނުންނުކުރެވޭ ގޮތަށް ހެދުމަށް ގާނޫނަށް ގެންނަން ޖެހޭ އިސްލާހުތައް ގެނައުމުގެ މަސައްކަތް ކުރައްވަމުން ގެންދަވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ރައީސް މުއިއްޒު ވިދާޅުވީ ސޯޝަލް މީޑިއާގައި، ޒުވާން ކުދިން ވަރަށް ނުރަނގަޅު ކަންކަމުގެ ތެރެއަށް ގޮސްފައިވާ ކަމަށާއި އޭގެ ތެރޭގައި ސައިބާ ބުލީ އާއި ގްރޫމިންގެ ތެރެއަށް ވެސް ކުދިން ވަންނަމުންދާ ކަމަށެވެ.
ރައީސް ވިދާޅުވީ ރާއްޖެއަކީ އިސްލާމީ ގައުމަކަށްވެފައި އަދި އެހާ ކުޑަ މުޖުތަމައެއް އޮތް ތަނަކަށްވާއިރު އެ ކުދިން ސަލާމަތްކުރުމަކީ ސަރުކާރާއި އިދާރާތަކުގެ ޒިންމާއެއް ކަމަށް ގަބޫލުފުޅު ކުރައްވާ ކަމަށާއި އެހެންވެ، ވަނި އެޕްތަކެއް 16 އަހަރުން ދަށުގެ ކުދިންނަށް މަނާކުރައްވާނެ ކަމަށް ވިދާޅުވިއެވެ.
”ސޯޝަލް މީޑިއާގެ އެޕްތައް، ކަނޑައެޅޭ ވަކި އެޕްތަކެއް 16 އަހަރުން ދަށުގެ ޒުވާނުންނަށް ބޭނުންނުކުރެވޭ ގޮތަށް ކަނޑައެޅުމަށްޓަކައި ފިޔަވަޅުތައް އަޅަން ގަސްދުކުރަން،“ރައީސް ވިދާޅުވިއެވެ،.
ރައީސް ވިދާޅުވީ، 16 އަހަރުން ދަށަށް ސޯޝަލް މީޑިއާގެ ވަކި ޕްލެޓްފޯމްތަކެއް ބޭނުންކުރުން މަނާކުރުމުގައި ރާއްޖެއިން ނަމޫނާއަކަށް ބަލާނީ އޮސްޓްރޭލިއާގައި އެކަން ކުރާ ގޮތެވެ.
މިދިޔަ އަހަރު އޮސްޓްރޭލިއާގައި ވަނީ އުމުރުން 16 އަހަރުން ދަށުގެ ކުދިންނަށް ޓިކްޓޮކާއި އިންސްޓަގްރާމާއި ފޭސްބުކް އަދި އެކްސް އާއި ރެޑިޓާއި ޔޫޓިއުބް މަނާކޮށްފަ އެވެ.
ރައީސް އިތުރަށް ވިދާޅުވީ، 16 އަހަރުން ދަށަށް ސޯޝަލް މީޑިއާގެ ވަކި ޕްލެޓްފޯމްތަކެއް ބޭނުންކުރުން މަނާކުރުމަކީ އެ ކުދިން ޑިޖިޓަލައިޒޭޝަނާ ދުރަށް ދިއުން ނޫން ކަމަށާއި މި ސަރުކާރުގެ މައިގަނޑު ސިޔާސަތަކީ ވެސް މޯލްޑިވްސް 2.0 ކަމަށެވެ.
