ރާއްޖޭގައި ޝީޝާ މަނާކުރުމާ ގުޅޭ އެއްވެސް މަޝްވަރާއެއް ކުރަމުން ނުދާ ކަމަށް ހެލްތް މިނިސްޓަރު ޤީލާ ޢަލީ ވިދާޅުވެއްޖެއެވެ.
މިނިސްޓަރު ޤީލާ މި މޭރުމުން ވިދާޅުވީ، ދުނިޔޭގެ ދުންފަތުގެ އިސްތިއުމާލު ނުކުރާ ދުވަހާއި ގުޅިގެން ރައީސުލްޖުމްހޫރިއްޔާގެ އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ. މިނިސްޓަރު ވިދާޅުވީ، ޝީޝާ މަނާކުރުމާއި ހަކުރަށް ދެމުން އަންނަ ސަބްސިޑީ ކަނޑާލައި ހަކުރުގެ ބާވަތްތަކުން ނަގާ ޓެކްސްތައް އިތުރުކުރުންފަދަ ކަންކަމުގައި މަޝްވަރާތައް ކުރިއަށްދާ ކަމަށް ކުރީގެ ހެލްތް މިނިސްޓަރު ނާޒިމް މީގެ ކުރިން ވިދާޅުވި ކަމަށެވެ.
ނަމަވެސް އެފަދަ އެއްވެސް މަޝްވަރާއެއް ކުރިއަށް ނުދާކަން މިނިސްޓަރު ވަނީ ފާހަގަކުރައްވައިފައެވެ.
”އަޅުގަނޑުމެންގެ މަޝްވަރާތަކުގެ ތެރޭގައި ޝީޝާ މަނާކުރުމުގެ މަޝްވަރާތަކެއް އަދި ކުރިއަކަށް ނުގެންދަން,“ – މިނިސްޓަރު ޤީލާ ވިދާޅުވިއެވެ.
ފާހަގަކޮށްލަންޖެހޭ ގޮތުގައި ދުންފަތުގެ ބާވަތްތައް ކޮންޓްރޯލް ކުރުމަށް ދިވެހި ސަރުކާރުން އަންނަނީ ވަރަށް ގިނަ މަސައްކަތްތަކެއް ކުރަމުންނެވެ. އެގޮތުން ވޭޕާއި އީ-ސިނގިރެޓް މަނާކުރުމާއި، ވަކި އުފުރުފުރާ އެއްގެ ބަޔަކަށް ދުންފަތުގެ ބާވަތްތައް ބޭނުންކުރުން މަނާކޮށް ޖެނެރޭޝަނަލް ބޭންއެއް ކަނޑައެޅުން ހިމެނެއެވެ.
