20 ވަނަ ރައްޔިތުންގެ މަޖިލީހުގެ ނައިބު ރައީސްގެ މަގާމަށް، އޭދަފުށީ ދާއިރާގެ މެންބަރު އަހްމަދު ސަލީމް (ރެޑްވޭވް ސަލީމް) މިއަދު އިންތިޚާބު ކޮށްފިއެވެ.
ރައްޔިތުންގެ މަޖިލީހުގެ ނައިބު ރައީސްގެ މަގާމަށް އަހްމަދު ސަލީމްގެ ނަން ހުށަހެޅީ ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ފަރާތުންނެވެ. ސަލީމްގެ ނަން މަޖިލީހަށް ހުށަހެޅުއްވީ ޕީއެންސީގެ ޕާލިމަންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހްއެވެ.
މަޖިލީހުގެ ނައިބު ރައީސް ހޮވުމަށް މިއަދު ނެގި ސިއްރު ވޯޓުގައި ސަލީމް މި މަގާމަށް އިންތިޚާބުވެވަޑައިގަތީ ބޮޑު އަޣުލަބިއްޔަތަކުންނެވެ. މި ވޯޓުގައި ޖުމްލަ 74 މެންބަރުން ބައިވެރިވެވަޑައިގެންނެވިއިރު، ސަލީމަށް ލިބިވަޑައިގަތީ 62 ވޯޓެވެ. ސަލީމާ ވާދަކުރެއްވި ވައިކަރަދޫ ދާއިރާގެ އެމްޑީޕީ މެންބަރު ހުސައިން ޒިޔާދަށް ލިބިވަޑައިގަތީ 10 ވޯޓެވެ. މި ވޯޓުގައި ބާތިލު 2 ވޯޓު ހިމެނެއެވެ.
އަހްމަދު ސަލީމަކީ ރައްޔިތުންގެ މަޖިލީހުގައި މިހާތަނަށް އެންމެ ގިނަ ދުވަސްވީ އަދި އެންމެ ތަޖުރިބާކާރު މެންބަރުންގެ ތެރޭގައި ހިމެނިވަޑައިގަންނަވާ ބޭފުޅެކެވެ. މިއީ ސަލީމް މަޖިލީހުގެ މެންބަރުކަން ކުރައްވާ ހަތަރުވަނަ ދައުރެވެ.
މަޖިލީހުގެ ނައިބު ރައީސްގެ މަގާމު ހުސްވެފައިވަނީ، އެ މަގާމުގައި ކުރިން ހުންނެވި ދިއްގަރު ދާއިރާގެ މެންބަރު އަހްމަދު ނާޒިމް އިއްޔެގެ ވަގުތެއްގައި އެ މަގާމުން އިސްތިއުފާ ދެއްވުމާ ގުޅިގެންނެވެ. ސަލީމް އިންތިޚާބުވުމާއެކު، އޭނާ ވެގެން ގޮސްފައިވަނީ 20 ވަނަ ރައްޔިތުންގެ މަޖިލީހުގެ ދެވަނަ ނައިބު ރައީސަށެވެ.
މަޖިލީހުގެ ރައީސްގެ މަގާމުގައި މިހާރު ހުންނެވީ އަބްދު ރަހީމް އަބްދުﷲ އެވެ.
