ދިވެހިރާއްޖޭގެ ބައެއް ރަށްރަށުގައި ޢީދު ފާހަގަކުރުމުގެ ނަމުގައި އިސްލާމީ އުޞޫލުތަކާއި ޚިލާފު، ލަދުވެތިކަން ކުޑަ ޢަމަލުތަކެއް ހިންގަމުންދާތީ އެކަމުގެ ކަންބޮޑުވުން ދީނީ ޢިލްމުވެރިޔާ ޝެއިޚް ޒަމްޒަމް ފާރިޝް ފާޅުކުރައްވައިފިއެވެ.
ޝެއިޚް ޒަމްޒަމް ފާރިޝްގެ ފޭސްބުކް މެދުވެރިކޮށް ދެއްވި މެސެޖެއްގައި ވިދާޅުވީ، ދާދިފަހުން ސޯޝަލް މީޑިއާގައި ދައުރުވަމުންދާ ވީޑިއޯއަކުން ފެންނަ ކަންތައްތަކަކީ އިންތިހާއަށް ހިތާމަވެރި އަދި ޖާހިލު ޢަމަލުތަކެއް ކަމަށެވެ. އެއީ ކޮން ރަށެއްގައި ހިނގި ކަމެއްކަން ސާފުނުވި ނަމަވެސް، ޞަޙާބީ ބޭކަލުން ތުރުކުރެއްވި ފަދަ ކަޅު ކުލައިގެ ޙިޖާބު ލައިގެން ތިބެ، އެއްވެސް ލަދުވެތިކަމެއް ނެތި ހިލޭ ފިރިހެނުންގެ ކުރިމަތީގައި ބިންމަތީ އޮށޯވެ ފުރޮޅި ހެދުމަކީ ބަލައިގަނެވޭނެ ކަމެއް ނޫން ކަމަށް ޝެއިޚް ވިދާޅުވިއެވެ. ޝެއިޚް އެ ޢިޝާރާތް ކުރެއްވި ޢަމަލު ހިންގާފައިވަނީ ނ. އަތޮޅު ކެނދިކުޅުދޫގައެވެ.
މީގެ އިތުރުން، މި ޢަމަލުތަކަކީ މުޖާހިދުންނަށް ޖޯކުޖަހައި، ޝަހީދުންނަށް ފުރައްސާރަ ކުރުމުގެ ގޮތުން ހިންގާފައިވާ ކަންތައްތަކެއްގެ ގޮތުގައި ޝެއިޚް ސިފަކުރެއްވިއެވެ. އޭނާ ވިދާޅުވި ގޮތުގައި، ދިވެހިންގެ ތެރެއިން ބައެއް މީހުން މިދަނީ ދުނިޔޭގެ އެހެން އެއްވެސް ތަނަކުން ނުފެންނަ ފަދަ ދަށު ދަރަޖައިގެ ޖާހިލުކަމެއްގެ ތެރެއަށެވެ.
”އަމިއްލަ ވެޑިންގ ޑްރެސް ލައިގެން މި މީހުން މަގުމަތީ މިހެން ފުރޮޅުމުގެ ބަދަލުގައި، ކަޅު ޖުއްބާއާއި ލައި، ބޮޑުބުރުގާ އަޅައި މޫނު ނިވާކޮށްގެން މި ޖަރީމާ މި ހިންގީ ކާކަށް އޮޅުވާލަންބާ؟“ ޝެއިޚް ސުވާލު އުފެއްދެވިއެވެ.
މީސްތަކުންނަށް އޮޅުވާލެވުނު ނަމަވެސް، މާތްﷲ އަށް އެއްވެސް ކަމެއް އޮޅުވައިނުލެވޭނެކަން ހަނދާންކޮށްދެއްވަމުން، އެއީ އެކަލާނގެ ކޯފާއަށް ހުށަހެޅިގަނެފައިވާ ބައެއްގެ ގޮތުގައި ޝެއިޚް ސިފަކުރެއްވިއެވެ. އަދި މިފަދަ މީހުންގެ ސުންޕާކަމުން މި ޤައުމު ސަލާމަތްކޮށްދެއްވުން އެދި ޝެއިޚް ވަނީ ދުޢާ ކުރައްވާފައެވެ.
މި މައްސަލައާ ގުޅިގެން ގިނަ ބައެއްގެ ފާޑުކިޔުންތައް ސޯޝަލް މީޑިއާގައި އަމާޒުވަމުންދާއިރު، އިސްލާމީ މުޖުތަމަޢެއްގައި ޢީދު ފާހަގަކުރަންވާނީ ދީނީ އަދި އަޚްލާޤީ މިންގަނޑުތަކުގެ ތެރޭގައި ކަމަށް ގިނަ ބަޔަކު ދަނީ ބުނަމުންނެވެ.
މި ޢީދުގައި ވިލިމާލޭގައިވެސް މިސްކިތް ކުރިމަތީގައި ފާޅުކަންބޮޑުކޮށް މުންކަރާތް ފެތުރުމުން ފާޑުކިޔުން އަމާޒު ވުމާއެކު ވިލިމާލެ ދާއިރާގެ މެންބަރު މުހައްމަދު އިސްމާއިލް ވަނީ އެކަން ދިފާއުކޮށް، ކަންބޮޑުވުން ފާޅުކުރި ފަރާތް ކުށްވެރިކޮށް އޭނާގެ މީހުން ލައްވާ ފުރައްސާރަކޮށްފައެވެ.
