ރައްޔިތުންގެ މަޖިލީހުގެ ނައިބު ރައީސްކަމުގެ މަގާމަށް ވާދަނުކުރައްވާ ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އަދި ޕީއެންސީގެ ޕާލިމަންޓްރީ ގްރޫޕުގެ ލީޑަރު އިބްރާހިމް ފަލާޙު މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ ނައިބު ރައީސްގެ މަގާމު ހުސްވެފައިވަނީ އެ މަގާމުގައި ކުރިން ހުންނެވި ދިއްގަރު ދާއިރާގެ މެންބަރު އަޙްމަދު ނާޒިމް މަގާމުން ވަކިކުރަން ޕީއެންސީން މަޖިލީހަށް ހުށަހަޅާފައި ވަނިކޮށް، އޭނާ އަމިއްލައަށް މިއަދު އިސްތިއުފާ ދެއްވުމާ ގުޅިގެންނެވެ. ނާޒިމް މަގާމުން ވަކިކުރަން ނިންމި ހިސާބުން ފެށިގެން ޕީއެންސީގެ އިސް ފަރާތްތަކުން ވަނީ އެ މަގާމަށް އިންތިހާބުކުރާނެ ފަރާތަކާމެދު މަޝްވަރާކުރަމުންނެވެ.
ނޫސްތަކުގެ ސަމާލުކަމަށްދަންނަވަން
އަޅުގަނޑު މަޖިލީހުގެ ނައިބު ރައީސްކަމަށް ވާދައެއްނުކުރަން. pic.twitter.com/MdA4DUQsbS— Ibrahim Falah (@IbrahimFalahR) May 31, 2026
ރައްޔިތުންގެ މަޖިލީހުގެ ނައިބު ރައީސްކަމުގެ މަގާމަށް އިންތިހާބުކުރާނެ ފަރާތަކާމެދު ޕީއެންސީން މަޝްވަރާކުރަމުން އަންނަ ދަނޑިވަޅެއްގައި އެ މަގާމަށް ފަލާޙު ޝައުގުވެރިކަން ފާޅުކޮށްފައިވާ ކަމަށް ބުނެ ދެކެވޭ ވާހަކަތައް އޭނާ ވަނީ ދޮގު ކުރައްވައިފައެވެ. މިކަމާ ގުޅިގެން ”އެކި އެމްވީ“ އިން ފަލާޙުއާއި ސުވާލުކުރުމުން އޭނާ ވަނީ އެކަން ދޮގު ކުރައްވައިފައެވެ.
”ނޫސްތަކުގެ ސަމާލު ކަމަށް ދަންނަވަން. އަޅުގަނޑު މަޖިލީހުގެ ނައިބު ރައީސް ކަމަށް ވާދައެއްނުކުރަން،“ – މީސް މީޑިއާގައި ފަލާޙު ކުރެއްވި ކުރު ޕޯސްޓުގައި ލިޔުއްވާފައިވެއެވެ.
ރައްޔިތުންގެ މަޖިލީހުގެ ނައިބު ރައީސްކަމުގެ މަގާމަށް ބޭފުޅަކު އިންތިހާބުކުރާ ޖަލްސާ ބޭއްވުމަށް އެންމެ ފުރަތަމަ ތާވަލުކޮށްފައިވަނީ މިއަދު މެންދުރުފަހު 13:00 އަށް ނަމަވެސް، ފަހުން ވަނީ މާދަމާއަށް މި ޖަލްސާ ބޭއްވުމަށް ނިންމައިފައެވެ. ޖަލްސާ ފަސްކުރީ ކޮން ސަބަބަކާ ހުރެ ކަމެއް މަޖިލީހުން ބުނެފައެއް ނުވެއެވެ.
