ދުންފަތުގެ ނުރައްކާތެރި އަސަރުތަކުން ކުރިއަށް އޮތް ޖީލުތައް ސަލާމަތްކުރުމަކީ އެންމެންގެ ބޮލުގައި އެޅިފައިވާ ގައުމީ ޒިންމާއެއް ކަމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ވިދާޅުވެއްޖެއެވެ.
ދުނިޔޭގެ ދުންފަތުގެ އިސްތިއުމާލު ނުކުރާ ދުވަހާ ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައި މެޑަމް ސާޖިދާ ވިދާޅުވީ، ޒުވާނުންނަށް އަމާޒުކޮށްގެން އުފައްދާ ދުންފަތުގެ ބާވަތްތަކާއި، އެ ނޫންވެސް އެފަދަ ގެއްލުންދެނިވި ތަކެތިން ޒުވާން ޖީލުތައް ރައްކާތެރިކުރުމަށް ކުރާ މަސައްކަތްތައް އިތުރަށް ވަރުގަދަކުރަން ޖެހޭ ކަމަށެވެ. އަދި ނިކޮޓިންއަށް ދެވޭ ދެވިހިފުމުން ސަލާމަތްވެފައިވާ މިނިވަން މުޖުތަމައެއްގައި ދިރިއުޅުމުގެ ހައްގު ކޮންމެ ޒުވާނަކަށްމެ ލިބިގެންވާކަން އެކަމަނާ ފާހަގަކުރެއްވިއެވެ.
On #WorldNoTobaccoDay, let us reaffirm our shared responsibility to protect future generations from the harmful effects of tobacco and other products that continue to target young people. Our youth deserve the chance to be free from nicotine addiction.
The Maldives has taken… pic.twitter.com/tuVVLPVqg7
— First Lady Sajidha Mohamed (@sajidhaamohamed) May 31, 2026
ދުންފަތުގެ އިސްތިއުމާލު ނުކުރާ މުޖުތަމައެއް ބިނާކުރުމަށްޓަކައި ދިވެހިރާއްޖެއިން ތާރީޚީ މުހިންމު ފިޔަވަޅުތަކެއް އަޅާފައިވާކަން ފާހަގަކުރައްވަމުން، މެޑަމް ސާޖިދާ ވިދާޅުވީ މިކަމުގައި އާންމުން ހޭލުންތެރިކުރުވުމާއި، ތަޢުލީމު ދިނުމުގެ އިތުރުން އެންމެން ގުޅިގެން މަސައްކަތް ކުރުމަކީ ކޮންމެހެން ބޭނުންތެރި ކަމެއް ކަމަށެވެ.
”އަޅުގަނޑުމެން އެންމެން ގުޅިގެން މަސައްކަތް ކޮށްފިނަމަ، ކޮންމެ ދިވެހި ރައްޔިތަކަށް އުޖާލާ މުސްތަޤްބަލެއް ހޯދައިދީ، ދުޅަހެޔޮ ޖީލެއް ބިނާކުރެވިދާނެ،“ ރައީސުލްޖުމްހޫރިއްޔާގެ އަނބިކަނބަލުން ވިދާޅުވިއެވެ.
ދުނިޔޭގެ ދުންފަތުގެ އިސްތިއުމާލު ނުކުރާ ދުވަސް ފާހަގަކުރަނީ ދުންފަތުގެ ސަބަބުން ސިއްހަތަށް ކުރާ ނޭދެވޭ އަސަރުތަކާމެދު މީހުން ހޭލުންތެރިކޮށް، ދުންފަތުގެ ސިނާއަތުން ފަތުރާ ނުރައްކާތަކުން އާންމުން، ހާއްސަކޮށް ޒުވާނުން ސަލާމަތްކުރުމަށް ބާރުއެޅުމުގެ ގޮތުންނެވެ.
