ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ސިންގަޕޫރަށް ކުރެއްވި ނުރަސްމީ ދަތުރުފުޅު ނިންމަވާލެއްވުމަށްފަހު މިރޭ މާލެ ވަޑައިގެންފިއެވެ.
މިދިޔަ ހަފުތާގެ ތެރޭގައި ރައީސުލްޖުމްހޫރިއްޔާ ސިންގަޕޫރަށް ފެއްޓެވި މި ދަތުރުފުޅަކީ ނުރަސްމީ ދަތުރުފުޅަކަށް ވާތީ، މި ދަތުރުފުޅާ ގުޅޭ އިތުރު ތަފްސީލެއް ރައީސް އޮފީހުން މިހާތަނަށް ހާމަކުރައްވާފައެއް ނުވެއެވެ. އާންމުގޮތެއްގައި ރައީސުލްޖުމްހޫރިއްޔާ ކުރައްވާ ނުރަސްމީ ދަތުރުފުޅުތަކަކީ އަމިއްލަ ކަންކަމުގައާއި ބޭސްފަރުވާއަށް ކުރައްވާ ދަތުރުފުޅުތަކެކެވެ.
ރައީސް މުޢިއްޒު މީގެ ކުރިން ވެސް ނުރަސްމީ ދަތުރުފުޅުތަކެއްގައި ސިންގަޕޫރަށް ވަޑައިގެންފައިވެއެވެ. އެގޮތުން ކުރިން ކުރެއްވި ދަތުރުފުޅެއްގައި، ސިންގަޕޫރުގައި ދިރިއުޅޭ ދިވެހި އާއިލާތަކާ ރައީސުލްޖުމްހޫރިއްޔާގެ ދެމަފިރިކަނބަލުން ބައްދަލުކުރައްވައި، އެފަރާތްތަކުގެ ހާލު އޮޅުންފިލުއްވާފައިވެއެވެ.
މި ސަރުކާރު ވެރިކަމާ ހަވާލުވިފަހުން ރައީސުލްޖުމްހޫރިއްޔާ ގެންދަވަނީ ރާއްޖޭގެ ތަރައްޤީއަށް ބޭނުންވާ މުހިންމު މަޝްވަރާތަކަށާއި، ދައުލަތުގެ އެކި މުނާސަބަތުތަކަށް ރަސްމީ ދަތުރުފުޅުތައް ކުރެއްވުމުގެ އިތުރުން، އަމިއްލަފުޅު ކަންކަމުގައި ނުރަސްމީ ދަތުރުފުޅުތައް ވެސް ކުރައްވަމުންނެވެ.
