1447 ވަނަ އަހަރުގެ ޙައްޖުގެ މަތިވެރި އަޅުކަން އެއްވެސް ދަތިކަމެއްނެތް، އަމާން އަދި ހިތްހަމަޖެހުން ބޮޑު މާޙައުލެއްގައި ނިންމާލެވިފައިވާ ކަމަށް ސަޢޫދީ ޢަރަބިއްޔާ ސަރުކާރުން އިޢުލާނުކޮށްފިއެވެ.
މި އަހަރުގެ ޙައްޖު މޫސުން ކާމިޔާބުކަމާއެކު ނިމުމަކަށް އައިސްފައިވާ ކަން ރަސްމީކޮށް އިޢުލާންކުރެއްވީ މައްކާ ސަރަޙައްދުގެ ނައިބު ގަވަރުނަރު އަދި ޙައްޖާއި ޢުމްރާ ކޮމިޓީގެ ނައިބު ރައީސް، އަލް-އަމީރު ސުޢޫދު ބިން މިޝްޢަލް ބިން ޢަބްދު އަލް-ޢަަޒީޒެވެ. އަމީރު ސުޢޫދު މިކަން އިޢުލާނުކުރެއްވީ ޙައްޖުގެ މައިގަނޑު ރުކުންތައް ކަމުގައިވާ ޢަރަފާތު ބިމުގައި މަޑުކުރުމާއި، މުޛްދަލިފާގައި ރޭކުރުމާއި، އަދި މިނާގައި ޖަމްރާތަކަށް ހިލައުކުމުގެ ކަންކަން އަމާންކަމާއެކު ނިމުމާ ގުޅިގެންނެވެ.
مراسم الاستقبال والترحيب بضيوف #ختامه_مسك، احتفاءً بنجاح موسم #حج_1447هـ؛ وتقديرًا لجهود شركاء المنظومة في خدمة ضيوف الرحمن.#نجاح_موسم_الحج#حياكم_الله pic.twitter.com/b4FlagGE6y
— وزارة الحج والعمرة (@HajMinistry) May 29, 2026
ޙައްޖުގެ އަޅުކަން ކާމިޔާބުކަމާއެކު ނިމިފައިވާ ކަން ހާމަކުރައްވަމުން އަމީރު ވިދާޅުވީ، 1.7 މިލިޔަނަށްވުރެ ގިނަ ޙައްޖުވެރިން ބައިވެރިވި މި އަހަރުގެ ޙައްޖު ކާމިޔާބުވީ، ސަލާމަތީ، އިންތިޒާމީ އަދި ޚިދުމަތްތަކުގެ ފުރިހަމަ ނިޒާމެއްގެ ސަބަބުން ކަމަށެވެ. މީގެ ސަބަބުން ޙައްޖުވެރިންނަށް ފަސޭހަކަމާއި ހިތްހަމަޖެހުމާއެކު އަޅުކަން ފުރިހަމަކުރުމުގެ މަގު ތަނަވަސްވެގެންދިޔަ ކަމަށް އޭނާ ފާހަގަކުރެއްވިއެވެ.
މި އަހަރުގެ ޙައްޖު މޫސުން ކާމިޔާބުވީ ސަޢޫދީ ޢަރަބިއްޔާގެ އިސްވާރުންގެ ފުރިހަމަ އިރުޝާދުގެ ދަށުން، ވަސީލަތްތަކުގެ ބޭނުން ފުރިހަމަ ގޮތުގައި ހިފުމާއި، ހުރިހާ މަރުޙަލާއެއް މެދުނުކެނޑި މޮނިޓަރުކޮށް ބެލެހެއްޓުމުގެ ސަބަބުން ކަމަށްވެސް އަމީރު ވިދާޅުވިއެވެ. އޭނާ އިތުރަށް ވިދާޅުވީ، ”މި ޙައްޖު މޫސުމުން ފެނިގެންދިޔައީ މާތް ﷲ ގެ މެހުމާނުންނަށް ޚިދުމަތްކުރުމުގައި އިޚުލާޞްތެރިކަމާއެކު މަސައްކަތްކުރާ ޤައުމެއްގެ ތަސައްވުރު“ ކަމަށެވެ.
1447 ވަނަ އަހަރުގެ ޙައްޖު މޫސުން ކާމިޔާބުކަމާއެކު ނިމުމާ ގުޅިގެން، ރާއްޖޭގެ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު، ވަނީ ސަޢޫދީ ޢަރަބިއްޔާގެ ޙައްޖު އެންޑް ޢުމްރާ މިނިސްޓަރު ޑރ. ތައުފީޤުލް ރަބީޢާއަށް ތަހުނިޔާ ފޮނުއްވާފައެވެ.
މި އަހަރުގެ ކާމިޔާބީއަކީ ކުރިއަށް އޮތް އަހަރުގެ ތައްޔާރީތަކުގެ ފެށުން ކަން ފާހަގަކުރައްވަމުން އަމީރު ސުޢޫދު ވަނީ، ޙައްޖުވެރިންނަށާއި މުޅި އިސްލާމީ އުންމަތަށް ޚިދުމަތްކުރުމުގައި ސަޢޫދީ ޢަރަބިއްޔާގެ ކަމާބެހޭ އިދާރާތަކުން އަބަދުވެސް އިސް ދައުރެއް އަދާކުރާނެ ކަމުގެ ޔަގީންކަން ދެއްވާފައެވެ.
