ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ޖަލުތަކުގެ ޙާލަތު ރަނގަޅުކުރުމަށްޓަކައި މުހިންމު މަސައްކަތްތަކެއް ކުރަމުންދާކަން ކޮމިޝަނަރ އޮފް ޕްރިޒަންސް ޑރ. ޙަސަން ޒަރީރު ހާމަކުރައްވައިފިއެވެ.
”އެކި އެމްވީ“ އިން ކުރި ސުވާލަކަށް ޖަވާބު ދެއްވަމުން ސީޕީ ޒަރީރު ވިދާޅުވީ، މި ސަރުކާރު ވެރިކަމާ ހަވާލުވިއިރު ޖަލުތަކުގެ ގިނަ ގޮޅިތަކެއް ހުރީ ކަރަންޓުގެ ޚިދުމަތް ނުލިބި، އަނދިރިކޮށް ކަމަށެވެ. ނަމަވެސް، 2025 ވަނަ އަހަރާ ހަމައަށް ހުރިހާ ގޮޅިއަކަށް ކަރަންޓު ދިނުމަށް ކަނޑައެޅި އަމާޒުގެ ދަށުން، މިހާރު ހުރިހާ ގޮޅިއަކަށް ކަރަންޓުގެ ޚިދުމަތް ފޯރުކޮށްދެވިފައިވާ ކަމަށް އޭނާ ވިދާޅުވިއެވެ.
ޖަލުތަކަށް ގެނެވުނު އިތުރު ބަދަލުތަކަށް އަލިއަޅުއްވާލައްވަމުން ކޮމިޝަނަރ ވިދާޅުވީ، ގައިދީން އިމަޖެންސީ ޙާލަތްތަކުގައި ހޮސްޕިޓަލަށް ގެންދިއުމަށްޓަކައި ފެންވަރު ރަނގަޅު އެމްބިއުލާންސްގެ ޚިދުމަތް މިހާރު ފަށާފައިވާ ކަމަށެވެ. އަދި ޖަލުގެ ސަލާމަތީ ކަންކަން ވަރުގަދަކުރުމުގެ ގޮތުން ފުރަތަމަ ފަހަރަށް ބޮޑީ ސްކޭނަރާއި ބެގޭޖް ސްކޭނަރު ހަރުކޮށް، ޖަލުގެ ބޭނުންތަކަށް ތިން އުޅަނދެއް އަލަށް ހޯދާފައިވާކަން އޭނާ ފާހަގަކުރެއްވިއެވެ.
މީގެ އިތުރުން، ޖަލުތަކުގައި މީހުން ގިނަވުމުގެ މައްސަލައަށް ޙައްލެއް ހޯދުމުގެ ގޮތުން މިދިޔަ ނޮވެމްބަރު 17 އިން ފެށިގެން މިހާތަނަށް 370 އެނދުގެ ޖާގަ އިތުރުކޮށްފައިވާ ކަމަށް ސީޕީ ޒަރީރު ވިދާޅުވިއެވެ. އަދި ގައިދީންގެ ދިރިއުޅުމުގެ ޙާލަތު ރަނގަޅުކުރުމަށްޓަކައި ފުރަތަމަ ފަހަރަށް އޭސީ ބެރެކްސްތަކުގައި ގައިދީން ބޭތިއްބުމާއި، ޖަލުގެ މިސްކިތްތަކާއި ނަމާދުކުރާ ތަންތަން އޭސީކޮށް ޒަމާނީ ފެންވަރަށް ތަރައްޤީކޮށްފައިވާ ކަމަށްވެސް ވިދާޅުވިއެވެ.
ޖަލުތަކަށް ގެނެވުނު ބައެއް މުހިންމު ބަދަލުތަކުގެ ތެރޭގައި:
- ގައިދީން އިމަޖެންސީގައި ހޮސްޕިޓަލަށް ގެންދިއުމަށް ފެންވަރު ރަނގަޅު އެމްބިއުލާންސްގެ ހިދުމަތް ފެށުން.
- ފުރަތަމަ ފަހަރަށް ބޮޑީ ސްކޭނަރާއި ބެގޭޖް ސްކޭނަރު ހަރުކުރުން.
- ނޮވެމްބަރު 17 އިން ފެށިގެން މިހާތަނަށް 370 އެނދުގެ ޖާގަ އިތުރުކުރުން.
- ޖަލުގެ ބޭނުންތަކަށް 3 އުޅަނދު އަލަށް ހޯދުން.
- ފުރަތަމަ ފަހަރަށް ގައިދީން އޭސީ ބެރެކްސްތަކުގައި ބޭތިއްބުން.
- ޒަމާނީ މިސްކިތްތަކާއި ނަމާދުކުރާ ތަންތަން އޭސީކުރުން.
ސީޕީ ޒަރީރު އިތުރަށް ވިދާޅުވީ، މި ސަރުކާރުން ޤައިދީންނަށް އެއްވެސް ބާވަތެއްގެ އަނިޔާވެރިކަމަކަށް ނުވަތަ ގޯނާއެއް ކުރުމަށް ފުރުޞަތު ނުދޭނެ ކަމަށެވެ. ޖަލުތައް ފާސްކުރުމުގައި ބޭނުންކުރަނީ ބައިނަލްއަޤުވާމީ މިންގަނޑުތަކަށް ފެތޭ ޒަމާނީ ވަސީލަތްތައް ކަމަށާއި، ކުރީގެ އަނިޔާވެރި އުޞޫލުތައް މިހާރު ނޯންނާނެ ކަމުގެ ޔަޤީންކަން އޭނާ އެރުވިއެވެ.
”ރައީސުލްޖުމްހޫރިއްޔާ އަބަދުވެސް އިރުޝާދު ދެއްވަނީ ޚިދުމަތްތައް ހަރުދަނާކުރުމަށް. އެމަނިކުފާނު ކަރެކްޝަންސްގެ އެއްވެސް މަސައްކަތަކަށް ނުފޫޒެއް ނުފޯރުއްވާ. ޖަލުތައް ހިންގަނީ މިނިވަންކަމާއެކު،“ ޑރ. ޒަރީރު ވިދާޅުވިއެވެ.
ޖަލުތަކަކީ ނަފްސާނީ ބަލިމީހުން ބައިތިއްބާ މަރުކަޒަކަށް ނުވި ނަމަވެސް، ޤައުމީ އަދި ބައިނަލްއަޤުވާމީ މިންގަނޑުތަކާ އެއްގޮތަށް ޖަލުތައް ބަލަހައްޓަމުންދާނެ ކަމުގެ ޔަޤީންކަން ކޮމިޝަނަރ އޮފް ޕްރިޒަންސް ވަނީ ދެއްވާފައެވެ.
