ހދ. ކުޅުދުއްފުށީގައި ކޮންމެ އަހަރަކުވެސް ބާއްވަމުން އަންނަ މަށިމާލި ޕެރޭޑާ ގުޅޭގޮތުން ”އަދަދު“ ނޫހުން ޝާއިޢުކުރި ޚަބަރަކީ ހަގީގަތާ ޚިލާފު ވާހަކަތަކެއް ހިމެނޭ ޚަބަރެއް ކަމަށް ބުނެ، ދީނީ އިލްމުވެރިޔާ ޝެއިޚް އަލީ ޒައިދު އެކަން ދޮގުކުރައްވައިފިއެވެ.
އަދަދު ނޫހުން ރިޕޯޓުކޮށްފައިވަނީ ކުޅުދުއްފުށީ މަށިމާލި ޕެރޭޑުގައި ދައްކުވައިދިން ކަންކަން ހަރާމްކޮށްފައި ވަނީ ރައީސް ޑރ. މުޙައްމަދު މުޢިއްޒުގެ ސަރުކާރަށް ތާއީދުކުރައްވާ ބައެއް ޝެއިޚުން ކަމަށް ތުހުމަތު ކޮށްފައެވެ.
އެ ނޫހުން ލިޔެފައިވަނީ، ޝެއިޚް އަލީ ޒައިދު މި ދުވަސްވަރު ސަރުކާރަށް ވަރަށް ބޮޑަށް ތައުރީފު ކުރައްވަމުން ގެންދަވާ ކަމަށާއި، ޝެއިޚް އަލީ ޒައިދު ވަނީ އެ ޕެރޭޑުން ފެނުނީ ”ޝައިތާނީ އަމަލުތަކެއް“ ކަމަށް ވިދާޅުވެފައި ކަމަށެވެ.
މަށިމާލި ޕެރޭޑާއި ގުޅިގެން ޒައިދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، އިޖުތިމާއީ އަޚުލާގުން ބޭރުވެ، މީހުންނާ ފޮށި، ފުރައްސާރަކޮށް ހެދުމުގެ މައްޗަށް ބިނާކޮށްފައިވާ ހުތުރު އަމަލުތަކަކީ މުނިފޫހިފިލުވުމެއް ނޫން ކަމަށެވެ. އަދި އެއީ ހުތުރުވެގެންވާ ޝައިތާނީ އަމަލުތަކެއް ކަމަށާއި، މިފަދަ ނުބައި ކަންކަން ހިންގުމުން ދޭހަވަނީ އެ ބައެއްގެ އަހުލާގުގެ ފެންވަރު ކަމަށްވެސް ޒައިދު ވިދާޅުވިއެވެ.
ނަމަވެސް، އަދަދު ނޫހުގެ ޚަބަރާ ގުޅިގެން ޒައިދު ވަނީ ވަރުގަދަ ރައްދެއް ދެއްވާފައެވެ. ޒައިދު ވިދާޅުވީ އެއީ އޭނާއާ މެދު އެ ނޫހުން ފަތުރާފައިވާ ހަގީގަތާ ޚިލާފު ވާހަކައެއް ކަމަށެވެ.
”އަޅުގަނޑު ސަރުކާރަށް ތައުރީފެއް ނުކުރަން! ދަންނަވާހާ ވެސް އެއްޗަކީ މީހުންނާ މެދު ސާބިތު ނުހިފޭ ވާހަކަ ނުދައްކާށޭ! މީހުންގެ އަބުރާ އިއްޒަތަށް ރައްކާތެރިވާށޭ! ޕޮލިޓިކަލީ ފާޑުކިޔުމާއި ޒާތީވުމަކީ ދެ ކަމެކޭ،“ ޒައިދު ވިދާޅުވިއެވެ.
މީގެ އިތުރުން ޝެއިޚް ޒައިދު ވަނީ މީހުންގެ އަބުރަށް އުނިކަން އަންނަ ފަދަ ވާހަކަތައް ނުފެތުރުމަށާއި، ނޫސްވެރިކަމުގެ މިންގަނޑުތަކުގެ ތެރެއިން ހަގީގަތާ އެއްގޮތަށް މައުލޫމާތު ފެތުރުމަށް އިލްތިމާސް ކުރައްވާފައެވެ.
ކުޅުދުއްފުށީގައި ކޮންމެ އަހަރަކު ބާއްވާ މަށިމާލި ޕެރޭޑަކީ ގިނަ ބައެއްގެ ސަމާލުކަން ލިބޭ ހަރަކާތަކަށް ވާއިރު، ކޮންމެ ފަހަރެއްގެ ޕެރޭޑުގައިވެސް ފެނިގެންދާ ބައެއް ކަންކަމާ ގުޅިގެން ސޯޝަލް މީޑިއާގައި ބޮޑެތި ބަހުސްތަކެއް ވަނީ އުފެދިފައެވެ. އިސްލާމް ދީނުގެ ހުދޫދުން ބޭރު އެތައް މަންޒަރުތަކެއް މަށިމާލި ޕެރޭޑުން ދައްކުވައިދެއެވެ.
މިއީ އަޅުގަނޑާއި މެދު ޢަދަދު ނޫހުން ގެނެސްފައިވާ ޙަޤީޤަތާއި ޚިލާފު ވާހަކައެއް! އަޅުގަނޑު ސަރުކާރަށް ތަޢުރީފެއް ނުކުރަން! ދަންނަވާހާ ވެސް އެއްޗަކީ މީހުންނާއި މެދު ސާބިތު ނުހިފޭ ވާހަކަ ނުދައްކާށޭ! މީހުންގެ އަބުރާ ޢިއްޒަތަށް ރައްކާތެރިވާށޭ! ޕޮލިޓިކަލީ ފާޑު ކިޔުމާއި ޒާތީވުމާއި މީ… https://t.co/kwTwlFvYAm pic.twitter.com/VuVYHWLbsE
— Ali Zaid (@alizaid1000) May 29, 2026
މައިންބަފައިންނާއި، ދަރިން ހިމެނޭހެން ކުދިބޮޑު އެންމެން ބައިވެރިވެގެން ކުޅުދުއްފުށި ސިޓީގައި ކުރިއަށް ގެންދާ މި އިޖްތިމާއީ މިންގަނޑާ ޚިލާފު ޙަރަކާތް ހުއްޓާލުމަށް ގިނަބަޔަކު ދަނީ ގޮވާލަމުންނެވެ.
