ދިވެހިރާއްޖޭގައި ވެރިކަންތައް ބަލިކަށިކޮށްލުމުގެ ބޭނުމުގައި، ވެރިންގެ ޒާތީ ކަންކަމާ ގުޅުވައިގެން ދޮގު ވާހަކަ ފެތުރުމުގެ ސަގާފަތެއް އޮތް ކަމަށާއި، މިއީ ރާއްޖޭގެ ސިޔާސީ މައިދާނުގައި ވަރަށް ބޮޑަށް އިސްލާހުކުރަން ޖެހިފައިވާ ކަމެއް ކަމަށް ރައްޔިތުންގެ މަޖިލީހުގެ ހޯރަފުށީ ދާއިރާގެ މެންބަރު އަލީ މޫސާ ވިދާޅުވެއްޖެއެވެ.
އެމް.އެމް.ޓީވީގެ ”ބޮޑު ޚަބަރު“ ޕްރޮގްރާމުގައި ރޭ ވާހަކަދައްކަވަމުން އަލީ މޫސާ ވިދާޅުވީ، ވޭތުވެދިޔަ ސަރުކާރުތަކުގައިވެސް ވެރިކަމަށް ދަހިވެތިވެގެން، ވެރިކަން ބަލިކަށިކުރުމުގެ އުކުޅެއްގެ ގޮތުގައި ވެރިންގެ ޒާތީ މައުލޫމާތާއި އަބުރާ ބެހުމުގެ އަމަލުތައް ހިންގާފައިވާ ކަމަށެވެ. އަދި މީހުން ނުކުރާ ކަންކަން އެމީހުންގެ ބޮލުގައި އެޅުވުން ފަދަ ދަށު ދަރަޖައިގެ ކަންކަން ހުއްޓާލަން ޖެހޭ ކަމަށް އޭނާ ފާހަގަކުރެއްވިއެވެ.
މިއާއިއެކު އޭނާ ވިދާޅުވީ ނޫސްވެރިންގެ ޒިންމާވެސް މިކަމުގައި ކުޑަ ނޫންކަމަށާއި، ޚަބަރާއި މަޢުލޫމާތު ފެތުރުމުގައި ނޫސްވެރިންވެސް މިހާރަށްވުރެ ބޮޑަށް ސަމާލުވާން ޖެހޭކަމަށެވެ.
ޚަބަރު ހަދާއިރުވެސް ޝައްކު އުފެދޭގޮތަށް، ދެ
މާނަ ނެގޭ ގޮތަށް ޚަބަރު ފެތުރުމަކީ ނޫސްވެރިކަމުގެ އަޚްލާޤީ މިންގަނޑާ ޚިލާފު ކަމެއްކަން ފާހަގަކުރައްވައި، އަލީ މޫސާ ވިދާޅުވީ ކޮންމެ މީހަކީވެސް ކޮންމެވެސް ދާއިރާއެއްގައި މަސައްކަތްކުރާ މީހެއް ކަމަށާއި، އެމީހަކު ކުރާ ކުށަކަށް ނުވަތަ މައްސަލައަކަށް ބަލާއިރު އެއްވެސް މީހަކީ ގާނޫނަށްވުރެ މަތީގައި ހުރި، މައްސަލަ ނުބެލޭނެ މީހަކަށް ވެގެންނުވާނެ ކަމަށެވެ.
ނޫސްވެރިންގެ ޒިންމާއާ ގުޅޭގޮތުން ވާހަކަދައްކަވަމުން މެންބަރު ވިދާޅުވީ، ރައީސް ޑރ. މުޙައްމަދު މުޢިއްޒުގެ ވެރިކަމަކީ ނޫސްވެރިންނާ ނުހަނު ގާތް، ރައްޓެހި ވެރިކަމެއް ކަމަށެވެ. އެގޮތުން ރައީސް މުޢިއްޒު ކޮންމެ ހަފްތާއަކު ނޫސްވެރިންނާ ބައްދަލުކުރައްވައި ސުވާލުތަކަށް ޖަވާބު ދެއްވުމާއި، ކައުންސިލްތަކާއި ރައްޔިތުންނާ ގާތުން ބައްދަލުކުރައްވައި މައުލޫމާތު ދެއްވުމުގެ އިތުރުން، ވަޒީރުން މެދުވެރިކޮށްވެސް ހާމަކަން ބޮޑު ގޮތެއްގައި މައުލޫމާތު ފޯރުކޮށްދެއްވާކަން އޭނާ ފާހަގަކުރެއްވިއެވެ.
”ނޫސްވެރިން އެބަޖެހޭ ސައްހަ ތެދު މައުލޫމާތު ފަތުރަން. އަދި ލިޔާ ލިޔުންތަކުގައި ހަރުދަނާކަމެއް ހުންނަންޖެހޭނެ. އަޅުގަނޑުމެންނަކީ ގައުމެއް، އެހެންވީމާ ގައުމުގައި ހުރި ތަފާތު މައްސަލަތަކަށް އަމާޒުކޮށް އެ ވާހަކަތައް ދައްކަންވީ ނޫންތޯ؟“ އަލީ މޫސާ ސުވާލު ކުރެއްވިއެވެ.
މެންބަރުގެ ވާހަކައިގައި އިތުރަށް ވިދާޅުވީ، ޒިންމާދާރު ނޫސްވެރިކަމަކީ ކަންކަން ރަނގަޅަށް ދިރާސާކޮށް، ތެދުދޮގު ބަލައިގެން ޚަބަރު ފެތުރުން ކަމަށެވެ. އަދި ވެރިކަމަށް ދަހިވެތިވެގެން ވެރިންގެ އަބުރާ ބެހުމުގެ ބަދަލުގައި، ގައުމީ މަސްލަހަތު އިސްކޮށް، ހަގީގީ މައްސަލަތަކަށް ބަހުސްކުރުމަކީ މިއަދު ރާއްޖޭގެ ސިޔާސީ މަޝްރަހަށް ނުހަނު ބޭނުންތެރި ކަމެއް ކަމަށްވެސް އޭނާ ވިދާޅުވިއެވެ.
