އިއްޔެ ރޭގެ ވަގުތެއްގައި ކާކުކަން ނޭނގޭ ފަރާތަކުން ޗެނަލް 13 ގެ ސަރވަރތައް ހެކްކޮށްފައިވާ ކަމަށް ބުނެ އެ ޗެނަލުން ހެދީ ބުހުތާނު ދޮގެއްކަން ފަޅާއަރައިފިއެވެ.
ރޭގެ ވަގުތެއްގައި ޗެނަލް 13 އިން ކުޅުދުއްފުށީގެ ޢީދު ޝޯވ ލައިވްކޮށް ބްރޯޑްކާސްޓް ކުރަމުން ދަނިކޮށް، ކުއްލިއަކަށް ލައިވް ބްރޯޑްކާސްޓް ހުއްޓި ބަރަހަނާ މަންޒަރު ދައްކުވައިދޭ ވީޑިއޯއެއް ވަނީ އޮޅުމެއްގެ ތެރެއިން ބްރޯޑްކާސްޓް ކުރެވިފައެވެ. ”އެކި އެމްވީ“ އަށް މައުލޫމާތު ލިބިފައިވާ ގޮތުގައި މި ހާދިސާ ހިނގާފައިވަނީ ކޮންޓްރޯލް ރޫމުގައި ތިބި ބަޔަކު ޔޫޓިއުބް މެދުވެރިކޮށް އެފަދަ މަންޒަރެއް ބަލަން އުޅުމުގެ ތެރޭގައެވެ.
މި މައްސަލަ ފޫބެއްދުމުގެ ގޮތުން ޗެނަލް 13 އިން ބުނެފައިވަނީ، އެ ޗެނަލްގެ ސަރވަރތައް ރޭ 23:53 އެހާއިރު ކާކުކަން ނޭނގޭ ފަރާތަކުން ހެކްކޮށްފައިވާ ކަމަށެވެ. އަދި މިކަން ކޮށްފައިވަނީ ޗެނަލް 13 އަކީ ރާއްޖޭގައި ހިނގާ ކަންކަން ވަގުތުން ރައްޔިތުންނާއި ހަމައަށް ފޯރުކޮށްދޭ ޗެނަލަކަށްވެފައި، ރާއްޖޭގެ ކުރިއަރާފައިވާ މީޑިއާތަކުން އެއް މީޑިއާއަށްވީތީ ސީދާ އެ ޗެނަލަށް އަމާޒުކޮށް ހަމަލާއެއް ދިނުމުގެ ނިޔަތުގައި ކަމަށް ވަނީ ސިފަކޮށްފައެވެ.
ޗެނަލް 13 އިން ބުނާ ގޮތުގައި، އެ ޗެނަލްގެ ސަރވަރތައް ހެކްކުރީ، އެ ޗެނަލުން މި ފަހުން ގެނެސްދިން ”ކޮކްރަޗް ޖަންތާ ޕާޓީ“ ނުވަތަ އިންޑިއާގެ ކުރަފި ޕާޓީގެ ވެބްސައިޓް ޑައުންކުރި ވާހަކައާއި އެ ޕާޓީގެ މީސް މީޑިއާ އެކައުންޓްތައް ހެކްކުރި ވާހަކަ ގެނެސްދީފައިވަނިކޮށް ކަމަށެވެ. ނަމަވެސް މިއީ ރާއްޖެއާއި އެއްވެސް ގޮތަކުން ގުޅުންހުރި ވާހަކައަކަށް ނުވާތީ، ”ހެކަރުންތަކެއް“ ޗެނަލް 13 ގެ ސަރވަރތައް ހެކްކޮށްފާނެ ކަމަށް ނުބެލެވެއެވެ.
މި މައްސަލަ ދިމާވުމަށް މެދުވެރިވި އަސްލު ސަބަބު ދެނެގަތުމުގެ ބަދަލުގައި ސަރވަރތައް ހެކްކުރީ ކަމަށް ބުނެ ވާހަކަފަތުރަމުން އަންނައިރު ފާހަގަކޮށްލަންޖެހޭ ކަމަކީ، މި މައްސަލައާ ގުޅިގެން ކުރީގެ ރައީސް ޢަބްދުﷲ ޔާމީން ވެސް ހުންނެވީ އެކަމާ ކޯފާވެފައި ކަމަށެވެ. މި މައްސަލައާ ގުޅިގެން މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން (އެމްއެމްބީސީ) އިން ވަކި އެއްޗެއް ބުނެފައެއް ނުވެއެވެ.
